ء«ىى ەليزاۆەتا پاتشايىمنىڭ قۇرمەتىنە سكۆەردى سالتاناتتى اشۋ شاراسىنا قوش كەلدىڭىزدەر! پاتشايىم ۇلىبريتانيا تاريحىندا ەڭ ۇزاق, 70 جىل بويى باسقارعان, اسا مارتەبەلى كورنەكتى كوشباسشى, دانا بيلەۋشى جانە بريتان حالقىنىڭ بىرلىگى مەن تاباندىلىعىنىڭ سيمۆولى رەتىندە ەستە قالدى. ونىڭ ابىرويى, قادىر-قاسيەتى جانە كەرەمەت جەتىستىكتەرى الەمدەگى ميلليونداعان ادامداردى شابىتتاندىرادى. قازاقستاندا ءىى ەليزاۆەتا لايىقتى سۇيىسپەنشىلىك پەن قۇرمەتكە يە», دەدى قر سىرتقى ىستەر ءمينيسترىنىڭ ورىنباسارى رومان ۆاسيلەنكو سكۆەردىڭ اشىلۋ سالتاناتىندا.
ونىڭ ايتۋىنشا, ەلوردا گۇلزارلارىنىڭ بىرىنە مارتەبەلى پاتشايىمنىڭ ەسىمىن بەرۋ تۋرالى شەشىمدى مەملەكەت باسشىسى قاسىم-جومارت توقاەۆ تىكەلەي ءوزى قابىلدادى. اتالعان سىي ءىى ەليزاۆەتانىڭ مەرەيتويىنا وراي ۇيىمداستىرىلدى.
«وكىنىشكە قاراي, ءىى ەليزاۆەتا پاتشايىم قازاقستاندا بولىپ ۇلگەرمەدى. وسى ورايدا, III چارلز كورول جانە كورول وتباسىنىڭ باسقا دا مۇشەلەرى ءبىزدىڭ ەلگە كەلەدى دەپ ۇمىتتەنەمىز. ۇلىبريتانيامەن ىنتىماقتاستىق قازاقستاننىڭ سىرتقى ساياساتىندا باسىم ورىن الاتىنىن اتاپ وتكىم كەلەدى. ەكى ەل اراسىنداعى ديپلوماتيالىق قاتىناستىڭ 30 جىلدان استام ۋاقىتى ىشىندە ساياسي, ساۋدا-ەكونوميكالىق, ينۆەستيتسيالىق, مادەني-گۋمانيتارلىق سالا بويىنشا ستراتەگيالىق ارىپتەستىك جوعارى دەڭگەيگە جەتتى», دەدى ءمينيستردىڭ ورىنباسارى.
سونداي-اق ر.ۆاسيلەنكو ۇلىبريتانيانىڭ سىرتقى ىستەر ءمينيسترى دجەيمس كلەۆەرليدىڭ ەلىمىزگە ساپارى قازاق-بريتان قارىم-قاتىناسىنىڭ ودان ءارى جان-جاقتى دامۋىنا قۋاتتى سەرپىن بەرەتىنىنە سەنىم ارتتى.
