رەسەي قازاعى ديماشقا ارناپ كۇي شىعاردى

عاسىردان عاسىرعا ۇلاسىپ كەلە جاتقان كۇي ونەرىنىڭ ورنى ەرەكشە. ءاندى تامىلجىتا سوزبەن جەتكىزەتىن قازاق، دومبىرانىڭ پەرنەسىمەن كۇيدى توگەتىن دە قازاق.

زامان تالابىنا ساي كۇيلەرى دە بار. ءار كەزەڭنىڭ ءوز ءۇنى، ءوز ەرەكشەلىگى دە بار. بۇگىن اڭگىمەمىزگە ارقاۋ بولىپ وتىرعان ول، جۇرەگى قازاق دەپ سوققان رەسەيدەگى قانداسىمىزدىڭ قازاقتىڭ ماڭدايعا بىتكەن جۇلدىزى ديماش قۇدايبەرگەنگە ارناپ شىعارعان كۇيى «ديماشتىڭ بايجۇماسى» بولىپ وتىر.

كۇيدىڭ اۆتورى - رەسەيدىڭ التاي ولكەسىندەگى قوساعاش اۋدانىنداعى قانداسىمىز جانايدار نۇرساليەۆ. كۇيدى ورىنداۋشى ونىڭ ۇلى - 12 جاستاعى نۇرداۋلەت نۇرساليەۆ.

«جالپى ءار كۇيدى ءبىر تۇلعاعا ارناعاندا بايجۇما دەگەن تىركەس بولعان. قۇرمانعازىنىڭ بايجۇماسى، دينانىڭ بايجۇماسى دەگەن. سوندىقتان دا كۇيدى »ديماشتىڭ بايجۇماسى» دەپ اتادىم.

18 عاسىردىڭ اياعى مەن 19 عاسىردىڭ باسىندا بايجۇما اتتى كۇيشى ءومىر سۇرگەن. بىزگە جەتكەن تۋىندىسى «قارت بايجۇما» كۇيى. بايجۇمانىڭ وسى شىعارماسىن كۇيدىڭ ەرەكشە ءتۇرى رەتىندە ءتۇسىنىپ، سوعان ەلىكتەگەن كۇيشىلەر قۇرمانعازى، داۋلەتكەرەي، تۇركەش، دينا، ناۋشا، ورىنشالار ءوز بايجۇمالارىن شىعارعان»، دەيدى التايلىق اۆتور.

جانايدار نۇرساليەۆ قازىرگى تاڭدا قوساعاشتا دومبىرا مەكتەبىندە ساباق بەرەدى. رف، التاي رەسپۋبليكاسىنىڭ ەڭبەك سىڭىرگەن ءارتىسى، بىرنەشە اندەر مەن كۇيلەردىڭ اۆتورى. 2022 جىلى وتانداستار قورىنىڭ تاراز قالاسىندا ۇيىمداستىرعان شەتەلدەگى دارىندى قانداس ونەرپازدارعا ارنالعان «قاسيەتتى قازاق ەلى» شىعارماشىلىق فەستيۆال سايىسىنىڭ كۇي نوميناتسياسى بويىنشا جۇلدەگەرى.

«شىعارمامدى وزىمە ءدارىس بەرگەن ۇستازىم ورىنباي دۇيسەنوۆكە جىبەردىم. تىڭداپ وڭ باعاسىن بەردى. قازاق ەلىنە دە ۇنايدى دەگەن ويدامىن. جۇرەكتەن شىققان كۇي جۇرەككە جەتەدى دەگەن سەنىمدەمىن. وسى ورايدا، ەكى اراعا دانەكەر بولىپ، ونەرىمىزگە كوڭىل ءبولىپ، قولداپ جۇرەتىن اتاجۇرتىمىز قازاقستانعا، سونىمەن قاتار «وتانداستار قورىنا» العىسىمىز شەكسىز»، دەيدى جانايدار.

ديماشقا ۆيدەو سالەمدەمە جولداعان نۇرداۋلەت بولسا، رەسەيدەگى «بەلىي پاروحود» فوندىنىڭ ءسوليستى. ءانشى،ءارى كۇيشى. ەستەرىڭىزگە سالا كەتسەك، جۋىردا استانادا «Euro Stars» ءىىى حالىقارالىق ونەر بايقاۋىندا گران-ءپريدى جەڭىپ العان بولاتىن.