ماۋلەن اشىمباەۆ اتالعان پروبلەمانى شەشۋ ءۇشىن مينيسترلەردى قارجى ءتارتىبىن ساقتاۋعا جانە قاراجاتتى ۇنەمدەۋگە شاقىردى.
«بىزدە كىرىستەرگە قاراعاندا شىعىستاردىڭ ەكى ەسە ۇلعايعانى بايقالىپ وتىر. بۇل رەتتە ۇكىمەت ول اقشانى ۇلتتىق قوردان نەمەسە بيۋدجەت تاپشىلىعىن ارتتىرۋ ارقىلى الاتىنى تۇسىنىكتى. الدە سالىق بازاسىن ۇلعايتۋ كەرەك پە؟ وسىعان بايلانىستى ءبارىمىز قارجى ءتارتىبىن ساقتاپ, ۇلتتىق قور قارجىسىن تەك ستراتەگيالىق ماقساتتارعا جۇمساۋىمىز قاجەت. سونداي-اق بىزگە ۇلتتىق قوردىڭ اكتيۆتەرىن ۇلعايتۋدىڭ ناقتى ستراتەگياسى كەرەك», دەدى ماۋلەن اشىمباەۆ.
سەنات توراعاسى ۇلتتىق قوردىڭ بازالىق ينفراقۇرىلىمدىق جانە باسقا دا ستراتەگيالىق شىعىستاردى قارجىلاندىرۋىن قولدايتىنىن, سونىمەن بىرگە مەملەكەت باسشىسىنىڭ ۇلتتىق قوردى 100 ملرد دوللارعا دەيىن جەتكىزۋ جونىندەگى تاپسىرماسىن ورىنداۋ قاجەتتىگىن اتاپ ءوتتى.
«ۇلتتىق قوردىڭ قارجىسى ازايىپ كەلەدى. سوڭعى 8 جىلدا قوردىڭ قاراجاتى 73 ميلليارد دوللاردان 57 ميلليارد دوللارعا دەيىن تومەندەگەن. ال ءبىزدىڭ الدىمىزدا ونى 100 ميلليارد دوللارعا دەيىن ۇلعايتۋ مىندەتى تۇر. سوندىقتان ۇلتتىق قوردىڭ اكتيۆتەرىن ۇلعايتۋ قاجەت. سوعان بايلانىستى ودان تۇسەتىن تابىس بالالارعا كوبىرەك باعىتتالادى», دەدى ماۋلەن اشىمباەۆ.
