كونفەرەنتسيانىڭ نەگىزگى عىلىمي بايانداماسىن ەۇۋ پروفەسسورى ۇلبوسىن ەسەنبەكوۆا «تسيفرلىق داۋىردەگى تەلەۆيزيا: جاڭا كەزەڭدەگى قىزمەتى مەن اۋديتوريا تالعامىنىڭ ەۆوليۋتسياسى» تاقىرىبىندا جاسادى. عالىم تسيفرلىق داۋىردەگى بۇقارالىق كوممۋنيكاتسيا قۇرالدارى بۇرىن ادامنىڭ قيالى جەتپەيتىن ترانسفورماتسيا تۋدىرعانىن, اقپاراتتىق قوعام مەن جوعارى تەحنولوگيالار داۋىرىندە ۇلتتىڭ ءتىلىن, مادەنيەتى مەن رۋحاني بولمىس-ءبىتىمىن ساقتاۋ, ونى جاڭا جاعدايعا بەيىمدەۋ كۇردەلى پروبلەماعا اينالعانىن ايتتى.
XX عاسىر مەن XXI عاسىردىڭ توعىسىندا باستالعان تەحنولوگيالىق سەرپىلىس جىلدان جىلعا كۇشەيىپ, جويقىن اقپاراتتىق تاسقىنعا ۇلاستى. وعان قارسى بولار توسقاۋىل دا جوق, ودان جاسىرىنىپ تا قالا المايسىڭ. اقپاراتتىق داۋىلدا جۇتىلىپ كەتپەس ءۇشىن جاڭا تەحنولوگيالىق ورتاعا بەيىمدەلىپ, وركەنيەت كوشىنەن قالماي, دامۋدىڭ ساپالى باسپالداعىنا كوتەرىلۋ كەرەك. باسقاشا تاڭداۋ جوق.
«بۇگىنگى قوعامنىڭ تالابى – كورەرمەنگە وي سالىپ, ساناسىنا ۇلتتىق بوياۋلارمەن اسەر ەتەتىن ۇلتتىق تەلەۆيزيا. ۇلتتىڭ, قوعامنىڭ گۋمانيتارلىق سۇرانىستارىنا سايكەس, ءارتۇرلى سوتسيۋمنىڭ قىزىعۋشىلىعىن تۋعىزاتىن, ۇلتتىق مۇددەنىڭ جاناشىرى بولاتىن تەلەۆيزيا جاساۋعا بولادى. ول ءۇشىن وتانشىلدىق رۋحتاعى كاسىبي ماماندار مەن جاڭا يدەيالاردى توقتاۋسىز گەنەراتسيالايتىن شىعارماشىل توپتىڭ بىرىككەن ۇجىمدىق قىزمەتى قاجەت», دەپ ۇ. ەسەنبەكوۆا ورامدى ويىن ورتاعا سالدى.
پروفەسسور ۇلتتىڭ ۇزدىك تەلەۆيزياسىن عىلىمي زەرتتەۋلەرگە ارقا سۇيەگەن, عىلىمي نەگىزدە جۇمىس ىستەيتىن, تسيفرلىق الەۋەتى مەن مادەنيەتى جوعارى قوعام عانا جاسايتىنىن, بىزدە بۇنداي الەۋەت قالىپتاسىپ كەلە جاتقانىن جەتكىزدى.
باسقوسۋدا ۋنيۆەرسيتەت رەكتورى ەرلان سىدىقوۆ جاڭا زامانداعى تەلەۆيزيانىڭ ورنىن, قوعامدىق ۇدەرىستەرگە ىقپالىنا, جاھاندانۋ زامانىندا جان-جاقتان اقپاراتتاردى سۇرىپتاپ, ۇلتتىق قۇندىلىقتارىمىزدى دارىپتەۋدە تەلەۆيزيانىڭ ورنى ەرەكشە ەكەنىنە توقتالدى. سونداي-اق ول ءار جىلدارى قازاق تەلەۆيزياسىن باسقارعان تۇلعالاردىڭ, شىعارماشىلىق ۇجىمنىڭ ەرەن ەڭبەگىن ەرەكشە اتاپ ءوتتى.
كونفەرەنتسيادا ايتىلعان تاعى ءبىر تىڭ وي – قازاق تەلەۆيزياسى اتاۋى تۇتاستاي جالپى ۇلتتىق اقپارات كەڭىستىگىندە جۇمىس ىستەپ جاتقان بارلىق قازاقستاندىق تەلەارنالارعا ءتان ەكەندىگى. قازاق ەلىنىڭ ەفيرىندە 1958 جىلى باستالعان حابار تاراتۋ – بارلىق وتاندىق تەلەارنالارعا ورتاق مەرەكە. ويتكەنى ەڭ العاش تەلەسيگنال تاراتۋ كۇنى بارلىق تەلەۆيزيا سالاسىنىڭ ماماندارى مەن تەلەجۋرناليستەرگە ورتاق ايتۋلى مەيرام بولۋى ءتيىس. قازاق تەلەۆيزياسىنىڭ مەرەيتويى – ەلدەگى بارلىق تەلەارنالاردىڭ مەيرامى.
حالىقارالىق كونفەرەنتسيانى جۇرگىزگەن ەۇۋ-ءدىڭ جۋرناليستيكا جانە ساياساتتانۋ فاكۋلتەتىنىڭ دەكانى پروفەسسور قايرات ساق ءوزىنىڭ قورىتىندى سوزىندە قازاق تەلەۆيزياسىنىڭ 65 جىلدىق مەرەيتويىنا ارنالعان جيىننىڭ مازمۇندى وتكەنىن ايتىپ, كونفەرەنتسيا جۇمىسىنا ونلاين قاتىسقان شەتەلدىك عالىمدارعا العىسىن ءبىلدىردى.
ەۋرازيا ۇلتتىق ۋنيۆەرسيتەتىندە ۇيىمداستىرىلعان ءىس-شارا ءتورت سەكتسيا بويىنشا جالعاستى. سەكتسيالاردا مودەراتور بولعان تەلەراديو جانە قوعاممەن بايلانىس كافەدراسىنىڭ مەڭگەرۋشىسى, بەلگىلى ايتىسكەر اقىن سەرىكزات دۇيسەنعازى جانە كافەدرانىڭ وقىتۋشىلارى كونفەرەنتسيانىڭ قورىتىندى ۇسىنىمدارىن ازىرلەدى.
