باتىس قازاقستان وبلىستىق توتەنشە جاعدايلار دەپارتامەنتىنىڭ حابارلاۋىنشا, ءبورلى اۋدانىنىڭ اقبۇلاق اۋىلىندا – 14, قىزىلتالدا – 16, كەڭتۇبەك اۋىلىندا – 15, اقسۋدا – 3, باقتىارالدا – 5 ءۇي, اقساي قالاسىنىڭ وزىندە 1 ءۇي سۋ ىشىندە تۇر. بۇدان بۇرىن سۋ باسقان سىرىم اۋدانىنداعى 5 ۇيدەن, تەرەكتى اۋدانىنداعى 1 ۇيدەن سۋ سورىلىپ شىعارىلعان.
قۇتقارۋشىلاردىڭ جانە جەرگىلىكتى اكىمدىك قىزمەتكەرلەرىنىڭ ۇيىمداستىرۋىمەن 265 ادام قاۋىپسىز جەرگە كوشىرىلدى. مۇنىڭ 168-ءى – ءبورلى اۋدانىنان بولسا, 26 ادام سىرىم اۋدانىنان, 65 ادام قاراتوبە اۋدانىنىڭ قورجىن اۋىلىنان. ايتا كەتەيىك, سىرىم اۋدانىندا قازىر قاۋىپ سەيىلىپ, 20 ادام جىمپيتىعا, 6 ادام ولەڭتى اۋىلىنا, ءوز ۇيىنە ورالدى.
ادامدارمەن بىرگە قاۋىپتى اۋماقتان 282 باس مال دا شىعارىلعانىن جازعان ەدىك. ازىرگە 6 باس قوي-ەشكى ولگەنى بەلگىلى بولدى.
وزەننەن لىقسىپ شىققان مۇز سىرىم اۋدانىندا ەلەكتر باعانالارىن قيراتىپ كەتكەن بولاتىن. ازىرگە جامبىل اۋىلىندا 48 ابونەنت جارىقسىز وتىر. وقيعا ورنىنا جوندەۋشىلەر جول قيىندىعىنا بايلانىستى جەتە الماي وتىر.
«جىمپيتى-قاراتوبە» باعىتىنداعى وبلىستىق ماڭىزى بار اۆتوجولدىڭ ءبىر بولىگى تاسقىن سۋ كەسىرىنەن بۇزىلىپ, قازىر قاراتوبە اۋدانىنا قاراستى الاكول, اقتاي, قوسكول, اققوزى, قورجىن, بەسوبا, قوسباز, ساۋلە, قاراقامىس ەلدى مەكەندەرىنە قاتىناس ءۇزىلىپ قالدى. وقيعا ورنىندا جەرگىلىكتى بيلىكتىڭ كۇشىمەن بىرنەشە ەكسكاۆاتور, تيەگىش تراكتور جولدى قالپىنا كەلتىرۋگە كىرىستى.
سوڭعى ءبىر تاۋلىك ىشىندە وبلىستىق جانە اۋداندىق ماڭىزى بار 6 جول بولىگىنەن قارعىن سۋ اسىپ تۇسكەنى تۋرالى حابار كەلىپ وتىر. ولار ءبورلى, سىرىم, تەرەكتى اۋداندارى اۋماعىندا.
ودان بولەك, 11 جەردە جول جابىندىسى ءب ۇلىنىپ, قارىم-قاتىناس ۋاقىتشا توقتاتىلعان. جوعارىدا ايتىلعان قاراتوبەلىك 9 اۋىلدان بولەك, شىڭعىرلاۋ اۋدانىنىڭ الماز, اقتاۋ, سەگىزساي اۋىلدارىمەن كولىك قاتىناسى توقتادى.
توتەنشەلىكتەردىڭ حابارلاۋىنشا, سوڭعى ءبىر تاۋلىك ىشىندە 996 ادام قۇتقارۋ, تابيعي اپاتتىڭ بەتىن قايتارۋ ىسىنە اتسالىسقان. ولاردىڭ ىشىندە قۇتقارۋ قىزمەتىنەن بولەك ىشكى ىستەر قىزمەتكەرلەرى, ۇلتتىق ۇلان جاۋىنگەرلەرى, جەرگىلىكتى تۇرعىندار, ەرىكتىلەر دە بار. ايتا كەتەيىك, «قازاۆياقۇتقارۋ» مەكەمەسىنىڭ تىكۇشاعى دا 5 ادامدىق ەكيپاجىمەن قۇتقارۋ جۇمىستارىنا اتسالىسۋدا.
سوڭعى ءبىر تاۋلىكتىڭ ىشىندە عانا 3750 دانا قاپشىق قۇم قاۋىپتى جەرلەرگە توسەلگەن.
بۇعان دەيىن ورال قالاسىندا, شىڭعىرلاۋ, ءبورلى جانە بايتەرەك اۋداندارىندا جەرگىلىكتى ماسشتابتاعى تابيعي سيپاتتاعى توتەنشە جاعداي جاريالانسا, بۇعان ەندى قاراتوبە مەن قازتالوۆ اۋداندارى قوسىلدى.
وڭىردەگى تابيعي اپاتتىڭ بەتىن قايتارۋعا كومەكتەسۋ ءۇشىن اتىراۋ مەن ماڭعىستاۋدان كومەك كەلگەنىن ايتقان ەدىك. اتىراۋ وبلىستىق تجد-ءنىڭ 49 مامانى ەكى توپقا ءبولىنىپ, قاراتوبە مەن ءبورلى اۋداندارىنا اتتانسا, ماڭعىستاۋلىق 62 قۇتقارۋشى ورال قالاسىنا جانە قازتالوۆ اۋدانىنىڭ جالپاقتال اۋىلىنا بەكىتىلگەن.
اپاتقا قارسى قۇرىلعان وبلىستىق جەدەل شتاب مۇشەلەرىنەن قۇرىلعان ءبىر توپ دەركول مەن شاعان وزەندەرىنىڭ احۋالىن اۋەدەن بايقاپ قاراۋ ءۇشىن تىكۇشاقپەن بارلاۋ جاساپ قايتتى.
وكىنىشكە قاراي, قارالى حابار دا بار: شىڭعىرلاۋ اۋدانىنىڭ اقتاۋ ەلدى مەكەنىنەن 11 ناۋرىز كۇنى كەشكىسىن 39 جانە 46 جاستاعى ەكى ەر ادام تراكتورمەن اقساي قالاسىنا قاراي شىققان ەكەن. سول كۇيى حابارسىز جوعالعان. وقىس وقيعا تۋرالى حابار ءتيىستى ورىندارعا تەك 14 ناۋرىز كۇنى كەشكىسىن, 17.17. ساعاتتا تۇسكەن. قاراشىعاناق پەترولەۋم وپەرەيتينگ ب.ۆ. كومپانياسىنىڭ جول تالعامايتىن كولىگىمەن 5 ادام – اراسىندا اۋداندىق اۋرۋحانا دارىگەرى بار قۇتقارۋشىلار تۇنگى ساعات 23:25-تە جولعا شىققان. الايدا قاراڭعى ءتۇن, اينالا سۋ, لايساڭنان جول تاپپاي, تۇنگى ساعات 3:00-دە ىزدەۋ جۇمىسىن توقتاتۋعا ءماجبۇر بولعان. ناۋرىزدىڭ 15-ىندە باتىس قازاقستان وبلىستىق پوليتسيا دەپارتامەنتى 1984 جىلى تۋعان ەر ادامنىڭ ءمايىتى تابىلعانىن راستادى. جوعالعان ەكىنشى ادام امان-ساۋ. الدىن الا حابارلارعا قاراعاندا, تراكتور بۇزىلىپ, ەكى ەر ادام مالشى قىستاعىنا جاياۋ بارماق بولعان. الايدا بىرەۋى جەتە الماعان.
وتكەن تاۋلىكتە شىدەرتى, دەركول, شەجىن, كوپىرلى اڭقاتى, ولەڭتى, شىڭعىرلاۋ جانە سارىوزەندە سۋ دەڭگەيى تومەن تۇسە باستاعانى بايقالعان.
الايدا جايىق وزەنىندە, كوشىم مەن شاعاندا, قازتالوۆ اۋدانىنداعى قاراوزەندە, بايتەرەك اۋدانى اۋماعىنداعى شاعىن رۋبەجكا, بىكوۆكا وزەندەرىندە سۋ كوتەرىلىپ جاتىر. وبلىستىق جەدەل شتاب, بارلىق اۋداندا ۇيىمداستىرىلعان 13 شتاب جاعدايدى تولىق باقىلاۋعا الىپ وتىر.
