«كودەكس جوباسىندا جاردەماقىنى كوتەرۋ, باسقا دا اتاۋلى الەۋمەتتىك كومەكتى ارتتىرۋ جونىندە نورمالار بار. وسى رەتتە مۇمكىندىگى شەكتەۋلى ازاماتتارعا تاعى ەكى باعىت بويىنشا قولداۋ كورسەتۋدىڭ ماڭىزى زور دەپ ەسەپتەيمىز. بىرىنشىدەن, ەڭبەك ەتكىسى كەلەتىن مۇگەدەكتىگى بار ازاماتتاردى جۇمىسقا ورنالاستىرۋعا كومەكتەسۋىمىز قاجەت. بۇل ولاردىڭ ءوز-وزدەرىن قامتاماسىز ەتۋگە جانە ورتاعا بەيىمدەلۋىنە وڭ ىقپالىن تيگىزەدى. سوندىقتان وسى باعىتتاعى زاڭنامالاردى پىسىقتاپ, ەڭبەك كودەكسىنە, باسقا دا ءتيىستى زاڭدارعا قاجەتتى وزگەرىستەردى ەنگىزۋ ماسەلەسىن قاراستىرۋىمىز كەرەك. سەبەبى قازىرگى تاڭدا جۇمىس بەرۋشىلەردىڭ كوبى مۇگەدەكتىگى بار ازاماتتاردى الۋعا ونشا قۇشتار ەمەس ەكەنىن كورىپ ءجۇرمىز», دەدى سەنات سپيكەرى.
سونىمەن قاتار پالاتا توراعاسى بۇعان دەيىن پارلامەنت دەپۋتاتتارىنىڭ باستاماشى بولۋىمەن الەۋمەتتىك كاسىپكەرلىك تۋرالى زاڭ قابىلدانعانىن, ونىڭ نەگىزگى ماقساتتارىنىڭ ءبىرى مۇگەدەكتىگى بار ادامداردى جۇمىسقا ورنالاستىرۋ ەكەنىن, الايدا قازىرگى تاڭدا بۇل نورما ءوز دەڭگەيىندە جۇمىس ىستەمەي جاتقانىن اتاپ ءوتتى. سوندىقتان ول بۇل باعىتتاعى ماسەلەلەردى دە پارلامەنت پەن ۇكىمەت بىرلەسىپ, اقىلداسىپ شەشۋ كەرەكتىگىن تىلگە تيەك ەتتى.
ماۋلەن اشىمباەۆ بۇگىندە شىعارماشىلىقپەن اينالىسىپ جۇرگەن مۇمكىندىگى شەكتەۋلى ازاماتتاردىڭ از ەمەس ەكەنىن, ولارعا وسى باعىتتا جۇيەلى قولداۋ كورسەتۋ كەرەكتىگىن دە ءسوز ەتتى.
«قازىرگى تاڭدا مۇگەدەكتىگى بار ازاماتتار, اسىرەسە, جاستار شىعارماشىلىقپەن اينالىسىپ, سول ارقىلى ومىردەن ءوز ورنىن تابۋعا ۇمتىلادى. كەيبىر ونەر ۇجىمدارى ولاردى جۇمىسقا العانىمەن, شەشۋدى قاجەت ەتەتىن ماسەلەلەر تۋىنداپ وتىر. ويتكەنى ەڭبەك كودەكسىندە بۇل باعىتتاعى كەيبىر ماسەلەلەر كورسەتىلمەگەن. وسىنداي تۇيتكىلدەردى وڭتايلى شەشىپ, مۇگەدەكتىگى بار ادامدارعا شىعارماشىلىقپەن اينالىسۋعا مۇمكىندىكتەر جاساپ بەرۋىمىز كەرەك», دەدى سەنات توراعاسى.
ايتا كەتەيىك, بۇگىن سەنات وتىرىسىندا دەپۋتاتتار قازاقستان رەسپۋبليكاسىنىڭ الەۋمەتتىك كودەكسىنىڭ جوباسىن جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر ەنگىزۋ تۋرالى», «اكىمشىلىك قۇقىق بۇزۋشىلىق تۋرالى قازاقستان رەسپۋبليكاسىنىڭ كودەكسىنە وزگەرىستەر ەنگىزۋ ءتۋرالى» ۇش زاڭ جوباسىن ءبىرىنشى وقىلىمدا قارادى.
