«NAURYZ: سايالى ولكە» اعاش وتىرعىزۋ اكتسياسى
اعاش وتىرعىزۋ – ساۋاپتى ءىس, بابادان قالعان ميراس. بۇل ءىس-شارا قورشاعان ورتانى ساقتاۋعا, ەكولوگيالىق احۋالدى جاقسارتۋعا زور ىقپال جاسايدى. جىل باسى سانالاتىن ناۋرىز ايىندا تال ەگىپ, اينالانى كوگالداندىرۋ – يگى باستاما. اكتسياعا قحا جانىنداعى قۇرىلىمدار, ەتنومادەني بىرلەستىكتەر مەن جاقسىلىققا جاقىن جاندار قاتىسادى. شارا اياسىندا وبلىستا 10 مىڭعا جۋىق اعاش وتىرعىزۋ جوسپارلانىپ وتىر.
«NAURYZ: ۇلاعات» ۇلتتىق سالت-ءداستۇر راسىمدەرىن جاڭعىرتۋ ءىس-شارالارى
ۇلتتىق قۇندىلىقتاردى قايتا جاڭعىرتۋ – ۇلتتىق كودتى ساقتاۋدىڭ ءتيىمدى تەتىگى. ءاربىر حالىقتىڭ سالت-ءداستۇرى ۇرپاقتان ۇرپاققا جالعاسىپ, كۇندەلىكتى وتباسىلىق ءجون-جورالعىعا اينالىپ, پراكتيكالىق مانگە يە بولىپ وتىر. ناۋرىز مەيرامى قارساڭىندا ۇلتتىق سالت-داستۇرلەرىمىزدى جاڭعىرتۋعا باسىمدىق بەرىلىپ وتىر. ونى قحا جانىنداعى اقساقالدار كەڭەسى مەن انالار كەڭەسى ىسكە اسىرماق.
«NAURYZ: الامان» قازاق ءتىلىن مەڭگەرگەن ەتنوس جاستارى اراسىنداعى ينتەللەكتۋالدىق ويىندار
العاش رەت ۇيىمداستىرىلىپ وتىرعان سايىستىڭ ماقساتى – قازاق ءتىلىن ەركىن مەڭگەرگەن ەتنوس جاستارىنىڭ زياتكەرلىك الەۋەتىن ارتتىرۋ, مەملەكەتتىك ءتىلدىڭ قولدانىس اياسىن كەڭەيتۋ, ءوزارا ىنتىماقتاستىقتى نىعايتۋ. بۇگىندە الماتى وبلىسىندا قازاق ءتىلىن جەتىك بىلەتىن ەتنوس جاستارىنىڭ سانى ايتارلىقتاي كوپ.
«NAURYZ: بابادان ميراس» شەبەرلىك سىنىپتارى سەرياسى
قولونەر بۇيىمدارى مەن زەرگەرلىك اشەكەيلەر – كەز كەلگەن حالىقتىڭ باستى برەندى. قازاقتىڭ زەرگەرلىك ونەرىنىڭ تاريحى ارىدە جاتىر. قيىن ءارى قىزىقتى قولونەر ءتۇرى سان ءداۋىردىڭ سارابىنان ءوتىپ, بۇگىنگى كۇنگە قايماعى بۇزىلماي جەتتى. شەبەرلىك سىنىپتارىندا تامىرىن تەرەڭنەن الاتىن وسىناۋ ونەردىڭ ەرەكشەلىكتەرى تۋرالى كاسىبي زەرگەرلەر ءوز كەڭەستەرىمەن بولىسپەك.
«NAURYZ: ىزگىلىك كومەك» قايىرىمدىلىق اكتسياسى
ناۋرىز – كوكتەم مەن جاڭارۋ مەيرامى عانا ەمەس. سونداي-اق ول – ىزگى ىستەر مەن قايىرىمدىلىققا ماڭىز بەرىلەتىن كەزەڭ. اكتسيا اياسىندا الماتى وبلىسىنداعى ەتنومادەني بىرلەستىكتەر مەن مەتسەناتتار ءتۇرلى باعىتتاعى قايىرىمدىلىق ءىس-شارالارىن ۇيىمداستىرىپ, قوعامنىڭ ءالجۋاز توپتارىنا كومەك كورسەتەدى.
«NAURYZ: كادە» جاس ۇرپاققا ۇلتتىق ناقىشتاعى سىيلىقتار بەرۋ ءىس-شاراسى
كادە سىيلاۋ ارقىلى حالقىمىز ءبىر-بىرىنە شىنايى نيەتىن ءبىلدىرىپ, ءوزارا سىيلاستىقتى, تاتۋلىقتى, جاقىن قارىم-قاتىناستى نىعايتىپ وتىرعان. كادە – ادەت-عۇرىپ, جوسىن-جورالعىلاردىڭ داعدىلى, ءداستۇرلى جولمەن اتقارىلۋىن بىلدىرەتىن ۇعىم. حالقىمىزدىڭ وسى سالتىن جاس ۇرپاق اراسىندا كەڭىنەن دارىپتەۋ – بۇگىندە ۇلكەن ماڭىزعا يە.
«NAURYZ: تاعىلىم» اعا بۋىن وكىلدەرىمەن كەزدەسۋلەر سەرياسى
اعا ۇرپاق ونەگەسى – وتكەن عاسىردىڭ رۋحاني مۇراسى. بۇگىنگى بۋىن – كەلەر جۇزجىلدىقتا ءومىر ءسۇرىپ, ەلىمىزدى وركەنيەتكە جەتكىزەر ۇلى جولداعى جاسامپاز ۇرپاق. سول ۇرپاقتاردىڭ بىرلىگى مەن ساباقتاستىعى ەل دامۋىنىڭ نەگىزگى كەپىلى. ۇرپاقتار بىرلىگى مەن ساباقتاستىعىن ساقتاۋ – وسى كەزدەسۋلەردىڭ باستى يدەياسى بولىپ تابىلادى.
«NAURYZ: SOCIETY» چەللەندجى
ماقسات – بەرەكە-بىرلىكتىڭ, شىنايى جاناشىرلىقتىڭ جانە ءوزارا قامقورلىقتىڭ مەيرامىنىڭ ماڭىزى مەن مىندەتىن جاس ۇرپاق پەن وزگە ەتنوس وكىلدەرى اراسىندا كەڭىنەن ناسيحاتتاۋ.
«NAURYZ: بەرەكە, بىرلىك, كەلىسىم» جالپىحالىقتىق ەتنو-مادەني ءىس-شاراسى
بۇل ءىس-شارا شەڭبەرىندە «اسسامبلەيا اۋىلى» ۇلتتىق-ەتنوگرافيالىق كورمەسى, «شەبەرلەر اۋىلى» ۇلتتىق قولونەر كورمەسى, «دوستىق اۋىلى» ەتنوس وكىلدەرىنىڭ كورمەسى, «ۇلاعات اۋىلى» قحا جانىنداعى اقساقالدار جانە انالار كەڭەستەرىنىڭ كورمەسى, « ۇلىستىڭ ۇلى كۇنى» مەرەكەلىك كونتسەرتى, «ىزگىلىك» ۇلتتىق تاعامدار جارمەڭكەسى وتكىزىلەدى.
«NAURYZ: دارا ءداستۇر» باتا بەرۋ ءراسىمى
باتا – قازاق حالقىنىڭ دىنىمەن بىتە قايناسقان ءداستۇرىنىڭ كورىنىسى. قاسيەتتى دىنىمىزدە جاراتۋشىدان دۇعا ارقىلى مەدەت تىلەسە, داستۇرىمىزدە باتا ارقىلى جاقسى نيەت, ىقىلاس بىلدىرىلەدى, تىلەك ايتىلادى. ونى كوپتى كورگەن, ورتاسىنا سىيلى, اۋزى دۋالى, باتاگوي قاريالار بەرەدى.
