ەلىمىزدەگى سوڭعى وڭ وزگەرىستەر كوڭىل قۋانتارلىق, اۋىز تولتىرىپ ايتۋعا بولاتىن تۇشىمدى رەفورمالارعا تولى. ولاردىڭ ىشىندەگى ەڭ ىرگەلى وزگەرىستەردىڭ ءبىرى – ەل پرەزيدەنتىنىڭ سايلاۋ مەرزىمىنىڭ جەتىجىلدىق ۋاقىتقا سوزىلۋى. كەلەسى تىڭ وزگەرىس, پارلامەنت سەناتىنداعى پرەزيدەنتتىك كۆوتاعا شەكتەۋلەر ەنگىزىلدى. سونداي-اق جوعارى زاڭ شىعارۋشى ورگاندا قازاقستان حالقى اسسامبلەياسى وكىلدەرىنىڭ وكىلدىگىندە وزگەرىستەر بولدى, زاڭ شىعارۋشى ورگاندارعا سايلاۋ فورماتى دا وزگەردى. ەندى پارلامەنت ءماجىلىسى دەپۋتاتتارىنىڭ 70 پايىزى پارتيالىق تىزىمدەر بويىنشا, ال قالعان 30 پايىزى ءبىر مانداتتى وكرۋگتەر بويىنشا سايلانادى. ساياسي پارتيالاردى تىركەۋ ءراسىمى ەداۋىر جەڭىلدەتىلدى: ساياسي پارتيانى ۇيىمداستىرۋ ءۇشىن ازاماتتاردىڭ باستاماشىل توبىنىڭ ەڭ از سانى 1 مىڭنان 700 ادامعا دەيىن قىسقاردى; پارتيالاردىڭ قۇرىلتاي سەزىن وتكىزۋ مەرزىمى 2 ايدان 3 ايعا دەيىن ۇلعايتىلدى; تىركەۋ شەگى 20 مىڭنان 5 مىڭعا دەيىن تومەندەدى; وڭىرلىك وكىلدىكتەردىڭ ەڭ از سانى 600-دەن 200 ادامعا دەيىن ازايدى. وسىنداي سايلاۋعا قاتىستى جەڭىلدىكتەر دە بيىلعى پارلامەنت سايلاۋىنا تۇسەتىن ۇمىتكەرلەر سانىنىڭ ۇلعايۋىنا اسەر ەتتى.
قازاقتا وتە جاقسى ناقىل ءسوز بار: «ويلاۋشى ويىن اياقتاعانشا, تاۋەكەلشىل ءىسىن تىندىرادى». ياعني ويلانىپ وتىراتىن ۋاقىتتان وتتىك, جىلدامداتىپ تاۋەكەل جاساپ ىسكە كوشپەسەك, ۋاقىت تا, زامان دا ءبىزدى كۇتىپ تۇرماسى انىق. ەلىمىزدىڭ تاۋەلسىزدىگىن العانىنا وتىز جىل عانا ۋاقىت ءوتتى. سالىستىرمالى تۇردە الساق, وتىز جاستاعى ەر-ازامات ەندى كەمەلدەنە باستايتىنى بەلگىلى, قولى اناۋ ايتقانداي ۇزىن ەمەس, وڭ-سولىن ەندى عانا تانىپ ۇلگەرگەن, وتىز جاسقا دەيىنگى جيناعان تاجىريبەسىن ومىرىنە پايدالانا باستاعان, كۇش-جىگەرىن, ءوزىن, وتباسىن دامىتۋعا اياق باسقان شاعى. ەندەشە, ەلىمىزگە دە اسا سىن كوزبەن قاراماي, وسى ۋاقىت ارالىعىندا جەتكىزگەن جەتىستىكتەرىنە قولداۋ ءبىلدىرىپ, بولاتىن ەلدىڭ ازاماتتارىنداي ءبىر-بىرىمىزگە جاناشىرلىق تانىتۋ اسا ماڭىزدى.
وتانداستار كەز كەلگەن جاڭاشىلدىقتى قولداپ, ەلىمىزدى كوزدىڭ قاراشىعىنداي قورعاپ, اۋىزبىرلىكپەن عانا جەتىستىككە جەتەتىنىمىزگە سەنىمدىمىن. سايلاۋالدى ناۋقاننىڭ قىزعان ساتىندە ءاربىر كانديداتپەن جەكە-جەكە تانىسۋعا, ولاردىڭ دەپۋتاتتىق مانداتقا جەتكەننەن كەيىنگى جوسپارلارىن تىڭداۋعا مۇمكىندىكتەر تۋىنداپ وتىر. توقسان اۋىز ءسوزدىڭ توبىقتاي ءتۇيىنى, ەلىمىزگە جاناشىر, كورگەندى-كورەگەن, ۇلتارالىق قۇندىلىقتاردى دۇرىس تۇسىنەتىن, كوڭىلى اشىق, كوكىرەگى وياۋ ازاماتتاردىڭ دوداعا تۇسۋىنە شىنايى تىلەكتەسپىز. دەسە دە سايلانۋشىلار سانى كوپ, باسەكە قارقىندى, شىنايى جۇيرىكتەر وزسا ەكەن, ەلگە جاناشىر, ديپلوماتيالىق قارىم-قاتىناستاردى جەتە تۇسىنەتىن شىنايى دارابوز ازاماتتار جەڭىسكە جەتسە ەكەن دەپ وي تۇيىندەيمىز.
ەڭلىك قاسابەكوۆا,
فيلوسوفيا, ساياساتتانۋ جانە ءدىنتانۋ ينستيتۋتى ءدىنتانۋ ورتالىعىنىڭ اعا عىلىمي قىزمەتكەرى
