كوميتەت توراعاسى اندرەي لۋكين ءوز سوزىندە قىلمىستاردىڭ كوپشىلىگى ءبىلىم دەڭگەيى جانە تابىسى تومەن وتباسىلارداعى ەرلى-زايىپتىلار, بىرگە تۇراتىندار نەمەسە تۋىستار اراسىندا جاسالاتىنىن اتاپ ءوتتى.
«الكوگوليزاتسيا, سونىڭ سالدارىنان قاقتىعىستار, جانجالدار, تۇرمىستىق زورلىق-زومبىلىق جانە تاعى باسقا ارەكەتتەر وسىنداي نەگىزدە تۋىندايدى. بۇگىنگى تاڭداعى ستاتيستيكا – ونىڭ ايقىن دالەلى. وتباسىلىق-تۇرمىستىق زورلىق-زومبىلىقتى جويۋ ءۇشىن جالپى وتباسى ينستيتۋتى جانە تاربيەمەن جۇمىس ىستەۋ جونىندە پارمەندى شارالار قابىلداۋ قاجەت», دەدى سەناتور لۋكين.
ىشكى ىستەر ءمينيسترىنىڭ ورىنباسارى يگور لەپەحا سەناتورلارعا مەكەمەنىڭ وتباسىلىق-تۇرمىستىق زورلىق-زومبىلىق سالاسىنداعى اكىمشىلىك باپتار بويىنشا سانكتسيالاردى كۇشەيتەتىن ۇسىنىستارى تۋرالى ايتىپ بەردى.
بىرىنشىدەن, تۇرمىستىق قۇقىق بۇزۋشىلىقتاردى تىركەۋدىڭ ارىز جازۋدان انىقتاۋ سيپاتىنا كوشەدى. تاجىريبە بويىنشا, وتىنىشتەردىڭ كوبىسى كەرى قايتارىلادى نەمەسە پوليتسياعا جۇگىنۋ پروتسەسىنە مۇلدەم جەتپەيدى. بۇل تۇزەتۋ پوليتسياعا جابىرلەنۋشىلەردىڭ ارىزىنسىز اكىمشىلىك قۇقىق بۇزۋشىلىق تۋرالى ءىس قوزعاۋعا مۇمكىندىك بەرەدى.
ەكىنشىدەن, تاراپتاردىڭ تاتۋلاسۋ راسىمىنە قويىلاتىن تالاپتاردى قاتاڭداتۋ ۇسىنىلادى. جاڭا رەداكتسيادا «جانجالقوي» ادام زورلىق-زومبىلىقتى العاش جاساعان كەزدە عانا سوتتا تاتۋلاسا الاتىنى, ال قىلمىس قايتالانعان جاعدايدا بۇل قۇقىق الىنىپ تاستالاتىنى تۋرالى جازىلعان. بۇل وزگەرتۋلەر «جانجالقوي» جانە باسقا ادامداردىڭ زارداپ شەككەندەرگە پسيحولوگيالىق قىسىم جاساۋدىڭ قاتال تاجىريبەسىن توقتاتۋعا مۇمكىندىك بەرەدى.
دەپۋتاتتار بۇل تۇزەتۋلەردى قولداپ, بارلىق مۇددەلى قۇرىلىمداردىڭ ۇيلەستىرىلگەن ارەكەتتەرى ازاماتتاردى وتباسىلىق-تۇرمىستىق قاتىناستار سالاسىنداعى زورلىق-زومبىلىقتان قورعاۋعا مۇمكىندىك بەرەتىنىن اتاپ ءوتتى.
