قر توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆتىڭ سوزىنشە, توتەنشە جاعدايلار مينيسترلىگىنەن ەشقانداي حات جىبەرىلگەن جوق, مينيستر مۇنداي حاتقا قول قويماعان.
«اتالمىش حاتتا جەر سىلكىنىسىنە قاتىستى بولجام بولدى. بۇل بولجام جونىندە اقپاراتتى وتكەن جۇمادا قر توتەنشە جاعدايلار مينيسترلىگىنە قاراستى سەيسمولوگيا ينستيتۋتىنىڭ ديرەكتورى داۋلەت سارسەنباەۆ ينستيتۋتتا وتكەن بريفينگتە تاراتتى, وندا وسى اپتادا الماتى قالاسى, الماتى جانە جەتىسۋ وبلىستارىندا 3-3,5 باللعا دەيىن جەر سىلكىنىسى بولجانعانى ايتىلعان, بۇل اتالعان وڭىرلەر ءۇشىن قالىپتى جاعداي. مۇنداي جاعدايدا ەش دۇربەلەڭ بولماۋى كەرەك. حالىققا ءبارىن مالىمدەپ وتىرامىز», دەدى رۋسلان يمانقۇلوۆ.
ۆەدومستۆو وكىلىنىڭ ايتۋىنشا, وتكەن اپتادا سەيسميكالىق بولجاۋ كوميسسياسى وتىرىسىنىڭ قورىتىندىسى كەزىندە ماماندار جەر سىلكىنىسىنە بولجام جاساعان.
ء«بىز بىردەن ساعات 18:30-دا بريفينگ ۇيىمداستىرىپ, قاجەتتى اقپاراتتى تاراتتىق. سوندىقتان جاسىراتىن ەشتەڭە جوق. قانداي دا ءبىر قاجەتتىلىك تۋسا نەمەسە قانداي دا ءبىر بولجام جاسالسا, قاجەت اقپاراتتى دەر كەزىندە جەتكىزەمىز», دەپ قوستى رۋسلان يمانقۇلوۆ.
