ەڭ الدىمەن, سايلاۋالدى ۇگىت-ناسيحات ناۋقانى الەۋمەتتىك جەلىلەردىڭ دامىعان زامانىندا ءوتىپ جاتىر. بۇل دەگەنىڭىز, بىرىنشىدەن – ۇمىتكەرلەرگە ۇگىت-ناسيحات جۇمىسىن جۇرگىزۋگە كەڭ مۇمكىندىك. ەكىنشىدەن, ءاربىر كانديدات ءوز وڭىرىندەگى تۇيتكىلدى ماسەلەلەرمەن ءجىتى تانىسىپ, ونى جەرگىلىكتى بيلىك ورگاندارىنا جەتكىزۋگە مۇمكىندىك الدى. سول ارقىلى ءار ءوڭىردىڭ وزىندىك كۇرمەۋلى ماسەلەلەرىنىڭ جول كارتاسىن جاساۋعا بولادى. بۇل دا بولسىن وسى سايلاۋالدى ناۋقاننىڭ تيىمدىلىگىنىڭ ءبىر دالەلى دەپ ايتۋعا نەگىز بار. ۇگىت-ناسيحات ونلاين جانە وففلاين تۇردە, جەكە كەزدەسۋلەر فورماتىندا دا ءوتىپ جاتىر. البەتتە, ءتۇرلى فورماتتىڭ ءوز تيىمدىلىگى بار. كانديدات الدىمەن ءوز سايلاۋشىسىمەن جەكە كەزدەسۋ وتكىزىپ بارىپ, ودان كەيىن عانا ونلاين قوسىلۋ ارقىلى جۇزدەسكەنى ابزال. ويتكەنى جەكە وففلاين كەزدەسۋلەر حالىقتىڭ ءوز كانديداتىن جاقسى تانىپ-بىلۋگە سەپتىگىن تيگىزەدى. الەۋمەتتىك جەلىلەر ارقىلى كەز كەلگەن ۋاقىتتا حالىقپەن بايلانىسۋعا بولادى.
بيىلعى سايلاۋدىڭ تاعى ءبىر ەرەكشەلىگى – پارتيالاستار ءوز تۇجىرىمداماسىن تەلەدەبات الاڭىندا دا بىلدىرۋگە مۇمكىندىك الدى. سايلاۋالدى ناۋقاننىڭ قىزعان تۇسىندا پىكىرسايىس ءوز دەڭگەيىندە ءوتتى. كىمنىڭ كىم ەكەنى ادەتتە سويلەگەنىنەن-اق بايقالادى. ەڭ الدىمەن پىكىرسايىستىڭ تىكەلەي ەفيردە وتكەنى قاي تۇرعىدان دا ۇتىمدى بولعانىن ايتا كەتۋ كەرەك. تەلەۆيزيادا الدىن الا جازىپ الىنىپ, «كەدىر-بۇدىرى» كەسىلىپ تاستالاتىن تالاي پىكىرسايىستى كوردىك. بۇل جولى ولاي بولعان جوق. قالاي بولعاندا دا تىكەلەي ەفيردە ءسوز العاندار ەركىن كوسىلگەنىنىڭ كۋاسى بولدىق.
بيىلعى سايلاۋدىڭ تاعى ءبىر ەرەكشەلىگى – ءبىر مانداتتى وكرۋگ بويىنشا بارلىق نيەت ەتكەن جاندارعا ۇمىتكەر رەتىندە سايلاۋعا تۇسۋگە مۇمكىندىك بەرىلۋى. بۇرىن تانىلماي جۇرگەن جاندار دا سايلاۋ ارقىلى بەلسەندىلىگىن پاش ەتتى. ياعني ۇمىتكەر تۇلعا سايلاۋدا جەڭىسكە جەتسە دە, جەتپەسە دە وزىنە ەلەكتورات اراسىندا جاقسى بەدەلگە يە بولدى دەۋگە تولىق نەگىز بار.
سوندىقتان بارشا جۇرتتى 19 ناۋرىزدا وتەتىن سايلاۋدا بەلسەندى بولۋعا شاقىرامىن.
قانات اۋەسباي,
سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ پرورەكتورى
