استانادا ۇلتتىق ەكونوميكا ءمينيسترى الىبەك قۋانتىروۆ پجكر مۇشەلەرىمەن كەزدەسۋ وتكىزدى. جيىندا جاڭا سالىق كودەكسىنىڭ جوباسى تالقىلاندى. سونداي-اق كەزدەسۋگە ۇلتتىق ەكونوميكا ۆيتسە-ءمينيسترى ازامات ءامرين, قر قم مەملەكەتتىك كىرىستەر كوميتەتى توراعاسىنىڭ ورىنباسارى ج. نۇرجانوۆ, قر ۇەم سالىق جانە كەدەن ساياساتى دەپارتامەنتىنىڭ ديرەكتورى ەرلان ساعىناەۆ قاتىستى.
ۇەم باسشىسى اتاپ وتكەندەي, وسى قۇجاتتى ازىرلەۋ جونىندەگى جۇمىس توبىنىڭ قۇرامىنا مەملەكەتتىك ورگانداردىڭ وكىلدەرى, سالىق سالۋ سالاسىنداعى ساراپشىلار جانە كاسىپكەرلەر كىردى.
«مينيسترلىكتە جاڭا جىلدان باستاپ جاڭا سالىق كودەكسىنىڭ جوباسىن تالقىلاۋ باستالدى. ول سالىقتىق اكىمشىلەندىرۋدى تۇبەگەيلى قايتا قاراۋدى, تسيفرلاندىرۋدى, ءسان-سالتانات سالىعىن ەنگىزۋدى كوزدەيدى. بۇدان بولەك, سالىق مولشەرلەمەلەرىن سارالاۋ, ۇدەمەلى تابىس سالىعىنىڭ تەتىكتەرىن قاراستىرۋ بويىنشا جۇمىس جۇرگىزىلەتىن بولادى», دەدى ءا.قۋانتىروۆ.
كەزدەسۋ بارىسىندا قاتىسۋشىلار سالىقتىق اكىمشىلەندىرۋدى جەڭىلدەتۋ - بيزنەس سۋبەكتىلەرىنىڭ باستى سۇرانىستارىنىڭ ءبىرى بولىپ تابىلاتىنىن اتاپ ءوتتى. جۇمىس بەرۋشىلەرگە جۇكتەمەنى ازايتۋ ماقساتىندا ەڭبەكاقى تولەۋ قورىنان تولەمدەر سانىن جەڭىلدەتۋ جانە قىسقارتۋ بويىنشا جۇمىستى جالعاستىرۋ قاجەت.
سونداي-اق كورشى ەلدەرگە ەكسپورتتاي المايتىن جەر قويناۋىن پايدالانۋشىلارعا پرەفەرەنتسيالار بەرۋ جانە جتس (جەكە تابىس سالىعى) پروگرەسسيۆتى شكالاسىن ەنگىزۋ بويىنشا ۇسىنىستار ايتىلدى. سونىمەن قاتار بيزنەس سۋبەكتىلەرىن تارتۋ ءۇشىن تابىس شەگىن الىپ تاستاۋ جانە بولشەك سالىق رەجيمى بويىنشا قىزمەتتى كەڭەيتۋ ۇسىنىلدى.
ءسان-سالتانات سالىعى جىلجىمايتىن م ۇلىك وبەكتىلەرىنىڭ سانىمەن ەمەس, ولاردىڭ قۇنىمەن ەسەپتەلۋى كەرەك دەيدى قاتىسۋشىلار. سونىمەن قاتار ولار باعالى قاعازدار نارىعى بويىنشا سالىق سالۋ كەزىندە پايدالى مامىلەلەرمەن قاتار, جىل قورىتىندىسى بويىنشا سالدونى ەسەپتەۋ ءۇشىن تەرىس مامىلەلەردى دە ەسكەرۋدى سۇرايدى.
كەزدەسۋ قورىتىندىسى بويىنشا مينيستر بارلىق قاتىسۋشىلارعا بەلسەندىلىگى ءۇشىن العىسىن ءبىلدىرىپ, ايتىلعان ۇسىنىستار قوسىمشا زەردەلەنەتىنىن جەتكىزدى.
