ء«بىز, Respublica پارتياسى ەكونوميكالىق وزگەرىستەردىڭ تۇپكى ناتيجەسى - قازاقستاندىقتاردىڭ ءال-اۋقاتىن جاقسارتۋ ەكەنىن ناقتى تۇسىنەمىز. سىزدەرگە قاراپايىم عانا مىسال كەلتىرەيىن, 2023 جىلى قازاقستاننىڭ كىرىس بولىگى - 17 ترلن تەڭگە, ال شىعىس بولىگى - 21 ترلن تەڭگە. دەمەك 2023 جىلى مەملەكەتتىك بيۋدجەتتىڭ تاپشىلىعى 4 ترلن تەڭگە بولادى. ەگەر مەملەكەتىمىز كاسىپورىن بولسا, وندا بۇل كاسىپورىن بانكروتقا ۇشىرار ەدى. قانداي سالانى قالاي دامىتۋدى قالاعانىمىز ماڭىزدى ەمەس. وعان اقشا جوق. مۇنى بيزنەس ۇستانىمى تۇرعىسىنان ايتىپ وتىرمىن. Respublica پارتياسى – ەكونوميكانىڭ شىنايى سەكتورىندا جۇمىس ىستەيتىن بيزنەسمەندەر», دەدى پارتيانىڭ تەڭ توراعاسى.
دينارا شۇكىجانوۆانىڭ اتاپ وتۋىنشە, سوڭعى 10 جىلدا قازاقستاندىقتار پاندەميانى, دەۆالۆاتسيانى, سانكتسيانى باستان كەشىردى جانە كۇن سايىن شىنايى ەكونوميكا جاعدايىندا جۇمىس ىستەپ جاتىر.
ء«بىز باسقاشا ءادىس ۇسىنعىمىز كەلەدى. ءبىز ەكونوميكانىڭ, قازاقستان ەكونوميكاسىنىڭ كىرىستى بولعانىن قالايمىز. سول ۋاقىتتا كەز كەلگەن قاراجاتتى دەنساۋلىق ساقتاۋعا, بىلىمگە جانە وزگە دە سالالاردى دامىتۋعا جۇمساۋعا بولار ەدى. قازىرگى ساتتە ءبارىمىز دە 30 جىلدان كەيىن الەمنىڭ جوعالىپ كەتپەيتىنىن جاقسى بىلەمىز. مۇمكىن زالدا وتىرعان كوپشىلىككە بۇل قىزىق ەمەس تە شىعار. بىراق مەنى بۇل تولعاندىرادى. 30 جىلدان كەيىن قىزىم قازىرگى مەنىڭ جاسىما كەلەدى. ونىڭ قالاي ءبىلىم الاتىنى, قايدا جۇمىس ىستەيتىنى جانە قالاي ەمدەلەتىنى وتە ماڭىزدى. ءبىز ينفراقۇرىلىمدى دامىتۋىمىز قاجەت. شيكىزاتتىق باعىتتان وڭدەۋگە بەت بۇرۋىمىز كەرەك», دەدى ول.
بۇعان دەيىن حابارلاعانىمىزداي, كتك تەلەارناسىنىڭ تىكەلەي ەفيرىندە پارلامەنت ءماجىلىسى سايلاۋىنا قاتىساتىن 7 ساياسي پارتيا وكىلدەرى اراسىندا پىكىرسايىس ءوتىپ جاتىر.
دەباتقا «Amanat» پارتياسىنان ايدوس سارىم, «اۋىل» حالىقتىق دەموكراتيالىق پارتياسىنان جيگۋلي دايراباەۆ, «Respublica» پارتياسىنان دينارا شۇكىجانوۆا, قازاقستان حالىق پارتياسىنان ەرمۇحامەت ەرتىسباەۆ, «بايتاق» جاسىلدار پارتياسىنان اينۇر ءسابيتوۆا, «اق جول» دەموكراتيالىق پارتياسىنان ءدانيا ەسپاەۆا, ال جالپىۇلتتىق سوتسيال-دەموكراتيالىق پارتياسىنان اسحات راحىمجانوۆ قاتىسىپ جاتىر.
