قاراشىعاناقتى كەڭەيتۋ جوباسىنىڭ 2021-2024 جىلدارعا جوسپارلانعان العاشقى كەزەڭىندە 5-ءشى گازدى قايتا ايداۋ كومپرەسسورى مەن باسقا دا ءوندىرىس نىساندارىنىڭ قۇرىلىسى ءجۇرىپ جاتىر. جوبانىڭ بۇل كەزەڭىندە 970 ميلليون دوللار ينۆەستيتسيا قۇيىلىپ, 3500-گە جۋىق ادام جۇمىسقا تارتىلادى.
جوبانىڭ 2023-2026 جىلدارعا جوسپارلانعان كەلەسى كەزەڭىندە 6-شى گازدى كەرى ايداۋ كومپرەسسورىنىڭ قۇرىلىسى جۇرگىزىلەدى. بۇل كەزەڭدە 735 ميلليون دوللار قارجى جۇمسالىپ, 1300 جاڭا جۇمىس ورنى اشىلادى.
قاراشىعاناقتى كەڭەيتۋ جوباسى سۇيىق كومىرسۋتەگىن ءوندىرۋ دەڭگەيىن 46 ميلليون تونناعا دەيىن ۇلعايتىپ, قازاقستان رەسپۋبليكاسى مەن قاراشىعاناق جوباسىنىڭ سەرىكتەستەرىنە قوسىمشا تابىس تابۋعا مۇمكىندىك بەرەدى.
قاراشىعاناق الەمدەگى ەڭ ءىرى مۇناي-گاز كەن ورىندارىنىڭ ءبىرى سانالادى
1997 جىلدان بەرى ينۆەستورلار قاراشىعاناق كەن ورنىن يگەرۋگە 30 ميلليارد دوللارعا جۋىق قارجى قۇيعان.
جوبا جۇزەگە اسىرىلا باستالعالى بەرى قپو ەل ەكونوميكاسىنا 57,4 ميلليارد دوللار كولەمىندە تابىس اكەلدى. ونىڭ ىشىندە 45,9 ميلليارد دوللار بيۋدجەتكە سالىقتار, تولەمدەر جانە ونىمدەگى ۇلەس ەسەبىنەن ءتۇستى.
«قاراشىعاناق پەتروليۋم وپەرەيتينگ ب.ۆ» 3,8 مىڭ ادامدى تۇراقتى جۇمىسپەن قامتىپ وتىر. ال كونسورتسيۋمعا ءتۇرلى قىزمەت كورسەتىپ, ءونىم جەتكىزەتىن 142 مەردىگەر مەكەمەدە 20 مىڭعا جۋىق ادام ەڭبەك ەتەدى.
كومپانيا 1998 جىلدان بەرى وڭىردەگى الەۋمەتتىك-ينفراقۇرىلىمدىق جوبالارعا 754,5 ميلليون دوللار بولگەن. بۇل قارجىعا باتىس قازاقستان وبلىسى بويىنشا 16 اۋرۋحانا مەن ەمحانا, 3 دەنە شىنىقتىرۋ-سپورت كەشەنى, 34 مەكتەپ پەن بالاباقشا, تەاترلار جانە مادەني ورتالىقتار جانە باسقا دا ينفراقۇرىلىمدار سالىنعان.
