ەحاقم باسشىسى ءسوز باسىندا رەسپۋبليكادا 4,3 ملن جۇمىسپەن قامتىلعان ايەل بار ەكەنىن, بۇل جۇمىسپەن قامتىلعان حالىقتىڭ جالپى سانىنىڭ 48% - ىن قۇرايتىنىن اتاپ ءوتتى. ايەلدەردىڭ 35% - ى ساۋدا جانە قىزمەت كورسەتۋ سالاسىندا, 32% - ى ءبىلىم, دەنساۋلىق ساقتاۋ جانە عىلىم سالاسىندا, 14% - ى ونەركاسىپتە, قۇرىلىستا جانە كولىكتە, 9% - دان استامى اۋىل شارۋاشىلىعىندا جۇمىس ىستەيدى.
«وڭىرلىك جۇمىسپەن قامتۋ كارتالارى اياسىندا ايەلدەردى ناتيجەلى جۇمىسپەن قامتۋعا تارتۋ بويىنشا بەلسەندى جۇمىس جۇرگىزىلدى. ماسەلەن, 536 مىڭ ايەل ادام جۇمىسقا ورنالاستىرىلدى, بۇل بارلىق جۇمىسقا ورنالاستىرىلعان ازاماتتاردىڭ 55% - ىن قۇرادى. ال وسى جىلدىڭ ەكى ايىندا بۇل كورسەتكىش 92 مىڭنان استى», دەدى تامارا دۇيسەنوۆا.
مينيستر جاس ايەلدەردىڭ مەملەكەت سۋبسيديالايتىن جۇمىس ورىندارىنا جۇمىسقا ورنالاسۋ كەزىندە بەلسەندىلىگى جوعارى ەكەنىن ايتتى. وتكەن جىلى 30 مىڭعا جۋىق قىزدار العاش رەت جۇمىسقا ورنالاستى.
«مەملەكەتتىك قولداۋدىڭ تاعى ءبىر ماڭىزدى شاراسى - سودان كەيىن جۇمىسقا ورنالاسۋ نەمەسە ءوز ءىسىن اشۋعا اپاراتىن وقىتۋ. وتكەن جىلى 80 مىڭعا جۋىق ايەل كاسىپكەرلىك نەگىزدەرى بويىنشا كۋرستاردان ءوتتى. وقىتۋ قورىتىندىسى بويىنشا 13 مىڭعا جۋىق ايەل گرانت الدى. ونىڭ 58% - ى تاۋارلار مەن قىزمەتتەردى وندىرۋگە قاجەتتى تەحنولوگيالىق جابدىقتار مەن مۇكاممال ساتىپ الدى, ال 31% - ى مال شارۋاشىلىعىمەن اينالىسىپ, مال ساتىپ الدى», دەدى ەحاقم باسشىسى.
ايەلدەر بيزنەستى قۇرۋدىڭ ءساتتى مىسالدارى رەتىندە تامارا دۇيسەنوۆا كونديتەرلىك تسەح اشقان قىزىلوردا وبلىسى شيەلى اۋدانىنىڭ كوپبالالى اناسى گۇلزيا مۇراتبەكقىزىنىڭ جانە گيپس پەن رەزەڭكەدەن جاسالعان بۇيىمدار شىعارۋمەن اينالىسقان اقتوبە وبلىسىنىڭ تۇرعىنى اقمانات جولاۋشىباەۆانىڭ جوبالارى تۋرالى ايتىپ بەردى.
مينيستر سونداي-اق وتكەن جىلى زەينەتكەرلىك جاسقا دەيىنگى ادامدار ءۇشىن «كۇمىس جاس» جوباسى ىسكە قوسىلعانىن, ونىڭ شەڭبەرىندە 3 مىڭنان استام ادام جۇمىسقا ورنالاستىرىلعانىن, ونىڭ 50% - ىن ايەلدەر قۇرايتىنىن اتاپ ءوتتى. جوبا قاتىسۋشىلارى ونى ءساتتى دەپ سانايدى. ماسەلەن, شىعىس قازاقستان وبلىسىنىڭ شەمونايحا قالاسىنان تامارا سترەلنيكوۆا كىشى مەدبيكە رەتىندە جۇمىس تاپتى, ال قاراعاندى وبلىسىنىڭ وساكاروۆكا اۋىلىنان تاتيانا اداموۆيچ كونديتەر بولدى.
بيىل جوباعا قاتىسۋ جاسى 58 جاستان 50 جاسقا دەيىن تومەندەدى. جۇمىس ورىندارىن جۇمىس بەرۋشىلەر ۇسىنادى, قاتىسۋشىلار ءوز بىلىكتىلىكتەرىنە قاراي ءوز بەتىنشە تاڭداۋعا قۇقىلى. جالاقىنى مەملەكەت 3 جىل ىشىندە سۋبسيديالايدى.
«بيىلعى جىلى ايەلدەردى جۇمىسپەن قامتۋعا جاردەمدەسۋ جونىندەگى شارالاردى جانداندىرۋ بويىنشا جۇمىستار جالعاسادى. وسى ماقساتتا تەك بيۋدجەتتەن 177 ملرد تەڭگەدەن استام قارجى ءبولىندى, ونىڭ ىشىندە سۋبسيديالاناتىن جۇمىس ورىندارىنا 135 ملرد تەڭگە جانە نەسيەلەر مەن گرانتتار بەرۋگە 42 ملرد تەڭگە», دەپ اتاپ ءوتتى تامارا دۇيسەنوۆا.
مينيستر سونداي-اق بيىل انا مەن بالانى قولداۋ جونىندەگى شارالارمەن 2,1 ملن وتباسى قامتىلاتىنىن, ولارعا مەملەكەتتىك بيۋدجەت جانە مەملەكەتتىك الەۋمەتتىك ساقتاندىرۋ قورىنىڭ (بۇدان ءارى-ماسق) قاراجاتى ەسەبىنەن 1,2 ترلن تەڭگە باعىتتالاتىنىن حابارلادى.
«اعىمداعى جىلى جۇكتىلىك جانە بوسانۋ بويىنشا ماسق-دان الەۋمەتتىك تولەمدەردى 258 مىڭنان استام ايەل الادى. ايەلدەردىڭ تابىسىنا بايلانىستى ولاردىڭ ورتاشا مولشەرى 2 ايدىڭ قورىتىندىسى بويىنشا شامامەن 900 مىڭ تەڭگەنى قۇرادى.
1 قاڭتاردان باستاپ بالا تۋعا ارنالعان بىرجولعى جاردەماقىلاردىڭ مولشەرى ۇلعايتىلدى. بيىل ءبىرىنشى, ەكىنشى جانە ءۇشىنشى بالا تۋىلعان كەزدە وتباسى 131 مىڭ تەڭگە, ال ءتورتىنشى جانە 217 مىڭ تەڭگەدەن استام الادى.
مەملەكەت باسشىسىنىڭ تاپسىرمالارىن ورىنداۋ ءۇشىن بالا كۇتىمى بويىنشا الەۋمەتتىك تولەمدەردى جۇزەگە اسىرۋ كەزەڭى 1 جاستان 1,5 جاسقا دەيىن ۇلعايتىلدى. وتكەن جىلى تۋىلعان بالالاردى ەسكەرە وتىرىپ, مۇنداي تولەمدەردى 760 مىڭعا جۋىق وتباسى الادى», دەدى ەحاقم باسشىسى.
