جالپى, كۇيشىنىڭ دومبىراسى قازىر ىقىلاس اتىنداعى حالىق مۋزىكالىق اسپاپتار مۋزەيى قورىندا تۇر. شاناعى قۇرالىپ جاسالعان, قالاقشا ءپىشىندى قىمبات قازىنانى العاشىندا قازانعاپ مۇراسىن تانىتۋعا ەرەكشە ۇلەس قوسقان داۋلەسكەر دومبىراشى سادۋاقاس بالماعانبەتوۆ ساقتاعان ەكەن. كەيىننەن بارىپ الماتىداعى مۋزەيگە وتكىزىلگەن. ال ونىڭ كوشىرمەسىن جاساتىپ, قىزىلورداعا جەتكىزگەن قازاقستاننىڭ ەڭبەك سىڭىرگەن قايراتكەرى, بەلگىلى جىرشى, قازانعاپ اتىنداعى قىزىلوردا مۋزىكالىق جوعارى كوللەدجىنىڭ ديرەكتورى ۇلجان بايبوسىنوۆا. كۇيشى اتىنداعى ونەر ورداسىن باسقارىپ وتىرعان ۇلجان مالىكايدارقىزى دومبىرا كوشىرمەسىن مۋزەيگە تاپسىرىپ, قازانعاپ قازىناسىن تۇگەندەۋگە قاتىستى جوسپارلارى جايلى ايتتى.
– ءاۋ باستا ءبىز كوشىرمەنى كوللەدج ءۇشىن جاساتقانبىز. كەيىن ويلانا كەلە وتكەن جىلدىڭ اياعىندا دايىن بولعان اسپاپتى مۋزەي قورىنا قوسقانىمىز ءجون دەگەن شەشىمگە كەلدىك. دومبىرانى جاساعاندار سىر وڭىرىنەن شىققان بەلگىلى قولونەر شەبەرلەرى اعايىندى ءدىلمانوۆتار. بۇگىن جينالعاندار ولاردىڭ قولىنان شىققان كوشىرمە اسپاپ دىبىسىنىڭ تۇپنۇسقادان ەش ايىرماشىلىعى جوعىنا كوز جەتكىزدى. جالپى, قازانعاپ قازىناسى ۇشان-تەڭىز دۇنيە. الدا «جادىگەرلەردى سويلەتۋ» اتتى جوبا اياسىندا تاريحي-تانىمدىق ءىس-شارالار وتكىزگىمىز كەلەدى. سونىڭ اياسىندا قازانعاپ اتامىزدىڭ كۇيلەرىن ناسيحاتتاپ, دومبىرانىڭ الماتىداعى تۇپنۇسقاسىن قىزىلورداعا ۋاقىتشا كورمەگە الدىرىپ, بەلگىلى قازانعاپتانۋشىلاردى شاقىرۋ ويدا بار, – دەيدى ول.
وسى ۋاقىتقا دەيىن قازانعاپتىڭ كوپ تۋىندىسى بىزگە بەلگىسىز بولىپ كەلگەن. جاقىندا عانا وسى باعىتتا 45 جىلدان بەرى زەرتتەۋ جۇرگىزىپ كەلە جاتقان بەلگىلى ونەر زەرتتەۋشىسى, قازانعاپ مەكتەبىنىڭ نەگىزگى وكىلدەرىنىڭ ءبىرى ابدۋلحاميت رايىمبەرگەنوۆ ۇشتومدىق جيناق شىعارىپ, ۇلى كۇيشىنىڭ سەكسەنگە جۋىق تۋىندىسىن جۇرتشىلىققا تانىستىردى. جالپى, ارال تەڭىزى جاعالاۋىنداعى قۇلاندى تۇبەگىنىڭ اقباۋىر دەگەن جەرىندە ون توعىزىنشى عاسىر ورتاسىندا دۇنيەگە كەلىپ, وزىندىك ورىنداۋشىلىق مەكتەبىن قالىپتاستىرعان قازانعاپتىڭ تۋىندىلارى كەيىنگىگە سول مەكتەپ وكىلدەرى ارقىلى جەتىپ, ەلدىڭ رۋحاني بايلىعىنا اينالعان.
قىزىلوردا
