قازاقستاننىڭ بارلىق وڭىرىندە 2023-2024 وقۋ جىلىندا نازارباەۆ زياتكەرلىك مەكتەپتەرىنىڭ 7-سىنىپتارىندا وقۋ ءۇشىن «وركەن» ءبىلىم بەرۋ گرانتىن تاعايىنداۋعا كونكۋرستىق ىرىكتەۋ باستالدى. قۇجاتتار 2022 جىلعى 1 جەلتوقساننان 2023 جىلعى 10 قاڭتارعا دەيىن قابىلدانعان بولاتىن.
قۇجاتتار
«وركەن» ءبىلىم بەرۋ گرانتىنا قاتىسۋ ءۇشىن قاجەت قۇجاتتار:
- ءوتىنىش;
- ساۋالناما تولتىرۋ;
- ۇمىتكەردىڭ تۋ تۋرالى كۋالىگىنىڭ كوشىرمەسى, ۇمىتكەردىڭ جسن-ءى;
- زاڭدى وكىلىنىڭ جسن-ءى كورسەتىلگەن جەكە كۋالىگىنىڭ كوشىرمەسى;
- 3ح4 فوتوسۋرەت;
- ۇمىتكەردىڭ سوڭعى وقۋ جىلىنداعى ۇلگەرىمى مەن ءتارتىبى تۋرالى تابەلىنىڭ كوشىرمەسى (وقۋىن جالعاستىراتىن بولسا, وقۋ جىلىنىڭ I جارتى جىلدىعىنداعى ۇلگەرىمى مەن ءتارتىبى تۋرالى تابەلىنىڭ كوشىرمەسى).
تالاپ ەتىلگەن قۇجاتتار وقيتىن مەكتەپ باسشىسىنىڭ قولىمەن راستالىپ, ءتيىستى ءبىلىم بەرۋ ۇيىمىنىڭ مورىمەن بەكىتىلۋى كەرەك. قۇجاتتاردى 6-سىنىپتىڭ 1-ءشى جارتىجىلدىعى اياقتالعانعا دەيىن تاپسىرسا 5-سىنىپتىڭ تابەلى قابىلدانادى. 6-سىنىپتىڭ 1-ءشى جارتى جىلدىعى اياقتالعان سوڭ تاپسىرسا 6-سىنىپتىڭ 1-ءشى جارتىجىلدىق تابەلى قابىلدانادى.
بارلىق قۇجات مۇقاباسى ءتۇسسىز 10 فايلدىق پلاستيكالىق پاپكاعا سالىنادى. قۇجاتتار كەلەسى جاعدايدا قابىلدانبايدى:
- ءوتىنىشتى كونكۋرستىق ىرىكتەۋگە قاتىسۋعا بەلگىلەنگەن مەرزىمىنەن كەشىكتىرىپ تاپسىرسا;
- قۇجاتتار تولىق بولماسا.
تەستىلەۋ
قۇجاتتارىن تاپسىرعان ۇمىتكەرلەر كونكۋرسقا قاتىسۋ ءۇشىن نازارباەۆ مەكتەپتەرىندە ەكى كۇن قاتارىنان تەست تاپسىرادى. تىركەۋگە كەشىككەن ۇمىتكەرلەر تەستىلەۋگە جىبەرىلمەيدى جانە تەستىلەۋدىڭ ءبىرىنشى كۇنى بولماعان ۇمىتكەر تەستىلەۋدىڭ ەكىنشى كۇنىنە قاتىسا المايدى.
ۇمىتكەر وزىمەن بىرگە كەلەسى زاتتاردى الۋى كەرەك:
- رۇقسات قاعازى;
- قارا سياسى بار شاريكتى قالام (گەلدى ەمەس);
- زاتتاڭباسى جوق بوتەلكەدەگى سۋ.
تەستىلەۋ كەزىندە كەلەسى زاتتاردى قولدانۋعا تىيىم سالىنادى:
- ۇيالى تەلەفون, فوتو/بەينە قۇرىلعىلار;
- كىتاپتار مەن سوزدىكتەر, سىزبالار;
- تسيركۋل, سىزعىشتار, ماركەرلەر, قارىنداشتار مەن وشىرگىشتەر;
- تاماق جانە سۋسىندار (سۋدان باسقا);
- كالكۋلياتورلار;
- قۇلاققاپتار;
- بلوكنوتتار;
- كەپكا, شاپكالار;
- باسقا ەلەكتروندىق قۇرىلعىلار (سمارت-ساعات).
ۇمىتكەردەن تەستىلەۋ كەزىندە تىيىم سالىنعان زاتتار تابىلسا ول اۋديتوريادان شىعارىلادى جانە ونىڭ تەستىلەۋ ناتيجەلەرى جويىلادى.
جاراتىلىستانۋ-ماتەماتيكالىق باعىتتاعى پاندەردى مەڭگەرۋ قابىلەتتىلىگىن انىقتاۋ بويىنشا تەست ءۇش بولىمنەن تۇرادى:
- ماتەماتيكا – 40 تاپسىرما;
- ساندىق سيپاتتامالار – 60 تاپسىرما;
- جاراتىلىستانۋ – 20 تاپسىرما.
تىلدىك تەست:
- قازاق ءتىلى – 20 تاپسىرما;
- ورىس ءتىلى – 20 تاپسىرما;
- اعىلشىن ءتىلى – 20 تاپسىرما.
ەكى كەشەندى تەست تاپسىرمالارىن ورىنداۋعا ارقايسىنا 120 مينۋتتان بەرىلەدى.
كەشەندى تەستىلەۋدىڭ ناتيجەلەرى تەڭەستىرىلگەن بالل تۇرىندە شىعارىلادى. مۇمكىن بولاتىن ماكسيمالدى تەڭەستىرىلگەن بالدىڭ جالپى سانى – 1500 بالل. ونىڭ ىشىندە:
- ماتەماتيكا – 400 بالل;
- ساندىق سيپاتتامالار – 300 بالل;
- جاراتىلىستانۋ – 200 بالل;
- قازاق ءتىلى – 200 بالل;
- ورىس ءتىلى – 200 بالل;
- اعىلشىن ءتىلى – 200 بالل.
بايقاۋدىڭ ناتيجەلەرى كەشەندى تەستىلەۋ اياقتالعان كۇننەن 40 كۇننەن اسپاي res.nis.edu.kz سايتىندا جاريالانادى جانە كەشەندى تەستىلەۋ وتكىزىلگەن عيماراتقا ورنالاستىرىلادى. ۇمىتكەر سايتقا كىرىپ, «مەنىڭ ناتيجەلەرىم» باتىرماسىن باسىپ, تەستىلەنۋشىنىڭ سايكەستەندىرۋ كودى (تسك) مەن جسن ەنگىزۋى قاجەت.
