اتالعان ءىس-شارادا تەكتونيكالىق تەربەلىس پەن باسقا دا سەيسميكالىق جاعدايلاردا ونەركاسىپتىك-ازاماتتىق ماقساتتاعى عيماراتتار مەن قۇرىلىستاردىڭ بەرىكتىگىن ارتتىرۋعا ارنالعان تەحنولوگيالار تانىستىرىلدى. ماسەلەن, Maurer كومپانياسىنىڭ دامۋ جانە قۇرىلىس ديناميكاسى باعىتىنىڭ باسشىسى پەتەر حۋبەر مەن اتالعان كومپانيانىڭ شىعىس ەۋروپا ءارى تمد-داعى ساۋدا جونىندەگى وڭىرلىك ديرەكتورى مارك برەسلەر وڭتۇستىك-شىعىس ازيا, سونداي-اق وڭتۇستىك پەن سولتۇستىك امەريكادا سىناقتان وتكەن بىرقاتار جاڭا سەيسميكالىق قورعانىس كونسترۋكتسياسىن ۇسىندى. ونىڭ ىشىندە ماياتنيكتى وقشاۋلاعىشتاردىڭ زاماناۋي كونسترۋكتسيالارى, تەربەلىستەردى بەيتاراپتاندىرۋعا ارنالعان جەتى ساتىلى باسەڭدەتكىش پەن ەلاستومەرلى تىرەك ەلەمەنتتەرىنىڭ ارتىقشىلىعى ءتۇسىندىرىلدى.
«سەيسميكالىق وقشاۋلاۋ ءتاسىلىنىڭ نەگىزگى يدەياسى تەربەلىس كەزەڭىن بارىنشا ارتتىرۋدا جاتىر. وسى ارقىلى عيماراتقا تۇسەتىن جۇكتەمە تومەندەيدى. ويتكەنى تەربەلىس نەعۇرلىم ۇلعايعان سايىن كونسترۋكتسيا ەلەمەنتتەرىندەگى ۇدەۋ اسەرى سوعۇرلىم ازايا تۇسەدى. بۇل ورايدا عيماراتتىڭ قوزعالۋىن باسەڭدەتۋ تۇتاستاي تەربەلىستى تەجەۋگە مۇمكىندىك بەرەتىنىن ايتا كەتەيىك», دەدى پ.حۋبەر.
ال مارك برەسلەر ايتقانداي, ەۋروپالىق وداقتا عيماراتتار مەن قۇرىلىستاردى جوبالاۋدا كوبىنەسە ەۋروكود-1998 ستاندارتى قولدانىلادى. ونىڭ ءبىرىنشى بولىگى عيماراتتار مەن قۇرىلىستارعا قاتىستى بولسا, ەكىنشى بولىگى كوپىرلەردى رەتتەۋگە بايلانىستى. وندا سەيسميكالىق وقشاۋلاۋ كومپونەنتتەرى, اتاپ ايتقاندا تىرەك كونسترۋكتسيالارىن رەتتەيتىن نورمالار بەلگىلەنىپ, بۇل ەۋروكود ءارتۇرلى سەيسميكالىق وقشاۋلاۋ جابدىقتارىن, ونىڭ ىشىندە وقشاۋلاعىشتار مەن تەربەلىس باسەڭدەتكىشتەرىن ازىرلەۋدىڭ نەگىزى سانالادى.
«قازقسعزي» اق-نىڭ جوعارى قاباتتى عيماراتتاردىڭ سەيسميكاعا ءتوزىمدى زەرتحاناسىنىڭ مەڭگەرۋشىسى جاسۋلان وماروۆتىڭ پىكىرىنە سۇيەنسەك, ەۋروپالىق تالاپقا ساي كەلەتىن زاماناۋي سەيسميكالىق وقشاۋلاعىش كونسترۋكتسيالار ەلىمىزدە بۇرىننان بەرى قولدانىلىپ كەلەدى. مىسال رەتىندە ول ءبىر ماياتنيكتى سىرعىمالى تىرەكتەردە تۇرعان الماتىداعى «مەتروپول» تۇرعىن ءۇي كەشەنىن كەلتىردى.
بۇدان بولەك «قازقسعزي» اق مەن Maurer-ءدىڭ ساراپشىلارى تاجىريبە الماسۋ ءۇشىن قازاق باس ساۋلەت-قۇرىلىس اكادەمياسىنىڭ قىزمەتكەرلەرى مەن ستۋدەنتتەرىنە ءدارىس وتكىزدى. تاياۋ پەرسپەكتيۆادا قۇرىلىس ماتەريالدارى مەن كونسترۋكتسيالاردى سەرتيفيكاتتاۋ بويىنشا, سونداي-اق عيماراتتار مەن قۇرىلىستاردىڭ سەيسميكاعا توزىمدىلىگى مەن قاۋىپسىزدىكتى كۇشەيتۋدەگى گەرمانيالىق تاجىريبەنى قازاقستاندا ەنگىزۋ جوسپارلانىپ وتىر.
