اۋەلى كوماندالىق سپرينتتە دەنيس مەزەنتسەۆ, ميحايل بروۆكو, ميحايل ماتريۋحين ۇشتىگى ءسىبىر فەدەرالدى وكرۋگىنان كەيىنگى 2-ءشى ناتيجە كورسەتتى. ءبىزدىڭ قۇرامانىڭ كورسەتكىشى – 1:36.75 سەكۋند. جەڭىمپازدان 6 سەكۋند قالىپ كەتتى. ۇزدىك ۇشتىكتى بەلارۋس تۇيىندەدى.
قىزدار اراسىنداعى سپرينتتە قازاقستان قۇراماسىنا ءسال ساتتىلىك جەتىسپەدى. ايزادا رىمبەك, ۆارۆارا گلۋحوۆا مەن ەكاتەرينا لاريونوۆا 4-ساتىعا تۇراقتادى.
وسىدان كەيىن وتانداسىمىز ۆارۆارا گلۋحوۆا ماسس-ستارتتا قارسىلاس شاق كەلتىرمەي, حالىقارالىق جارىستاعى العاشقى التىنىن موينىنا تاقتى. ول 6:11.61 سەكۋندتا جۇگىرىپ ءوتتى. كۇمىس مەدال بەلارۋس سپورتشىسى پالينا سەۆەتسكە, قولا رەسەيلىك ەكاتەرينا وستروۆسكاياعا بۇيىردى.
ايتا كەتەيىك, ۆارۆارا كۋباستاعى ويىنداردا جاقسى ناتيجە كورسەتكەن ۇلتتىق قۇراما كوشباسشىسى. ونىڭ قالعان قاشىقتىقتاعى ناتيجەلەرى مىنانداي:
-500 مەتردە 5-ورىن;
-1000 مەتردە 7-ورىن;
-1500 مەتردە 9-ورىن;
-3000 مەتردە 5-ورىن;
-كوماندالىق سپرينتتە 4-ورىن;
-ماسس-ستارتتا 1-ورىن:
«وسىعان دەيىن جۇلدەگە ءسال قولىم جەتپەي كەلدى. ەڭ قىسقا قاشىقتىقتا مەدال الىپ, جارىستى ءساتتى باستاعىم كەلگەن. بىراق قارسىلاستارىم مەنەن مىقتى بولدى. باعانا كوماندالىق سپرينتتە 4-ورىن العاندا جۇلدەسىز قالعانىمىزعا ازداپ اشۋلاندىم. ماسس-ستارت ءبىزدىڭ سوڭعى جارىسىمىز ەدى. سوندىقتان بارىمدى سالدىم. التىنشى اينالىمدا اياعىم تىرىسا باستادى. سوعان قاراماستان كوش باستاپ كەلە جاتقان سپورتشىدان قالماي, بار كۇشىمدى سوڭعى اينالىمعا ساقتادىم. مارەگە جاقىنداعاندا ءبارى ءوزىم ويلاعانداي بولدى. قازىر قۋانىشىمدا شەك جوق», دەدى ۆارۆارا گلۋحوۆا.
قازىر قازاقستان 3 التىن, 5 كۇمىس پەن 5 قولا مەدالمەن جالپى ەسەپتە 4-ورىنعا كوتەرىلدى. ايتا كەتەيىك, كۋزباسس ايماعىنداعى قىسقى ويىندار ەرتەڭ اياقتالادى.
