كەڭەستە اتالعان باعىتتىڭ قازاقستاندىق بولىگىندەگى بەلسەندى جۇمىستىڭ ارقاسىندا رەسپۋبليكا اۋماعى بويىنشا ترانزيتتىك جۇكتەردىڭ ءوتۋ مەرزىمى 12 كۇننەن 6 كۇنگە دەيىن, ياعني, وتكەن جىلمەن سالىستىرعاندا ەكى ەسە قىسقارعانى اتاپ ءوتىلدى. سونىمەن قاتار 2023 جىلدىڭ قورىتىندىسى بويىنشا بۇل كورسەتكىشتى 5 كۇنگە دەيىن جەتكىزۋ جوسپارلانۋدا.
جالپى, تحكب شەڭبەرىندە قىتايدان قارا تەڭىزدەگى پورتتارعا جۇكتەردى جەتكىزۋ مەرزىمى 38-53-تەن 19-23 كۇنگە دەيىن قىسقاردى, ال وسى جىلدىڭ سوڭىنا قاراي 14-18 كۇنگە جەتۋى ءتيىس. مۇنداي ىلگەرىلەۋ قاتىسۋشى ەلدەردىڭ باعىتتاعى كەدەرگىلەردى جويۋ, وتپەلى تاريفتەردى ەنگىزۋ جانە باسقا دا شارالاردى جۇزەگە اسىرۋ بويىنشا بىرلەسكەن جۇمىسىنىڭ ارقاسىندا مۇمكىن بولدى.
كەڭەسكە قاتىسۋشىلار قازاقستاننىڭ تەمىرجول ينفراقۇرىلىمىن ودان ءارى جاڭعىرتۋ, جىلجىمالى قۇرام پاركىن جاڭارتۋ, ساۋدا فلوتىن جانە اقتاۋ مەن قۇرىق پورتتارىنىڭ قۋاتىن ارتتىرۋ جونىندەگى شارالاردى تالقىلادى.
اتاپ ايتقاندا, اقتاۋ پورتىندا كونتەينەرلىك حاب قۇرۋ, قايتا تيەۋ تەحنيكاسىنىڭ پاركىن جاڭارتۋ جانە مۇناي قۇيۋ ايلاقتارىن قالپىنا كەلتىرۋ, ال قۇرىق پورتىندا جاڭا ايلاق سالۋ, كوپفۋنكتسيونالدى جانە استىق تەرمينالدارىن ىسكە قوسۋ جوسپارلانۋدا. سونداي-اق 2030 جىلعا دەيىن كاسپيدە 10 مۇناي قۇيۋ بارجاسى, 8 پاروم, 6 تانكەر جانە كونتەينەرلىك كەمە جۇمىس ىستەي باستايدى دەپ كۇتىلۋدە.
پرەمەر-مينيستر بۇل قۇجاتتى مەملەكەتارالىق دەڭگەيدە ودان ءارى پىسىقتاۋ ءۇشىن ونى قر مەملەكەتتىك جاۋاپتى ورگاندارىمەن كەلىسۋ راسىمدەرىن جەدەلدەتۋ قاجەتتىگىن اتاپ ءوتتى.
