بوتانيكالىق باق جوعارى ساتىلى وسىمدىكتەر فلوراسى زەرتحاناسىنىڭ جەتەكشى عىلىمي قىزمەتكەرى, بيولوگيا عىلىمدارىنىڭ كانديداتى ايجامال شورمانوۆانىڭ ايتۋىنشا, ءوزىنىڭ ادەمى گۇلدەرىمەن ەرەكشەلەنەتىن الاتاۋ بايشەشەگىنىڭ بيىكتىگى 10-30 سم بولىپ كەلەدى. قىزىل كىتاپقا كىرگەن وسىمدىكتىڭ بۇل ءتۇرلى ەرەكشە قورعاۋدى قاجەت ەتەدى. بۇگىندە گۇل وسىرۋشىلەر مەن عالىمدار ءۇشىن ۇلكەن ماڭىزعا يە الاتاۋ بايشەشەگى ەلىمىزدىڭ جوڭعار, ىلە الاتاۋى, كەتپەن, تەرىسكەي, قىرعىز جانە تالاس, سىرداريا قاراتاۋىندا كەزدەسەدى. بايشەشەك ەرتە كوكتەمدە, ياعني اقپان ايىنىڭ سوڭىندا, ناۋرىزدىڭ باسىندا گۇلدەيدى.
بايشەشەكتىڭ لاتىنشا اتاۋى – «كروكۋس». گۇلدى-ساندىك وسىمدىكتەردى ينترودۋكتسيالاۋ زەرتحاناسىنىڭ مەڭگەرۋشىسى ەسكەندىر ساتەكوۆ انتروپوگەندى اسەرلەردىڭ سالدارىنان, ياعني قۇرىلىس قارقىنداعان, مال جايىلعان, كەن وندىرىلگەن ايماقتاردا بايشەشەكتىڭ جويىلىپ كەتۋ قاۋپى زور ەكەنىن ايتادى. عالىمنىڭ ايتۋىنشا, ەلىمىزدە بايشەشەكپەن قاتار ەرتە كوكتەمدە گۇلدەيتىن كەسسەلرينگ لاپىزى, قاراتاۋ كروكۋسى, تاعى دا باسقا دالا گۇلدەرى بار. ولاردى ساندىك ءۇشىن دە, دارىلىك ماقساتتا دا پايدالانۋعا بولادى. ەرتە كوكتەمدە قار استىنان قاۋلاپ شىعاتىن بايشەشەك ەلىمىزدىڭ وڭتۇستىك وڭىرلەرىنە ءتان.
