قاسىم-جومارت توقاەۆقا بىلتىر حالىقارالىق ۋنيۆەرسيتەتتەردىڭ ءۇش وكىلدىگى اشىلعانى جانە بيىل بەس جاڭا فيليال اشىلاتىنى جونىندە اقپارات بەرىلدى.
بۇدان بولەك, مينيستر 2023-2029 جىلدارعا ارنالعان جوعارى ءبىلىم مەن عىلىمدى دامىتۋ تۇجىرىمداماسىنىڭ جوباسىن ۇسىندى. قۇجاتتا اتالعان سالانى دامىتۋدىڭ بارلىق ستراتەگيالىق مىندەتى مەن كورسەتكىشى قامتىلعان.
مەملەكەت باسشىسىنا عىلىمي قىزمەتكەرلەردىڭ جالاقىسى 2 ەسە وسكەنى جانە ىرگەلى زەرتتەۋ جۇمىستارىمەن اينالىساتىن عزي-دى تىكەلەي قارجىلاندىرۋ ماسەلەسى جونىندە باياندالدى. الداعى 3 جىلدا عىلىمي جۇمىستاردى قارجىلاندىرۋ 3,5 ەسەگە ارتادى.
مينيسترلىك ستۋدەنتتەر مەن ماگيسترانتتاردىڭ ستيپەندياسىن كەزەڭ-كەزەڭمەن ءوسىرۋدى جانە ستۋدەنتتەر جاتاقحانالارىندا 7 جىل بويى جىل سايىن جاڭادان 10 000 ورىن اشۋدى جوسپارلاپ وتىر.
ساياسات نۇربەكتىڭ ايتۋىنشا, 15 وڭىرلىك جانە 5 پەداگوگيكالىق جوو بازاسىندا عىلىمدى اكىمشىلەندىرۋدىڭ جاڭا مودەلىن ەنگىزۋ جانە اكادەميالىق باسىمدىق ورتالىقتارىن قۇرۋ ماسەلەسى پىسىقتالىپ جاتىر.
قاسىم-جومارت توقاەۆ جوعارى ءبىلىم الۋعا قولجەتىمدىلىكتى ارتتىرۋدىڭ جانە ۋنيۆەرسيتەت ينفراقۇرىلىمىن دامىتۋدىڭ ماڭىزدىلىعىن اتاپ ءوتتى. سونداي-اق جۋىق ارادا عىلىمدى اكىمشىلەندىرۋدىڭ جاڭا مودەلىنە كوشۋ قاجەتتىگىن ايتتى.
