نازىك جاندىلار گۇل تىلىندە سويلەسكەن.
كونە زاماندا سويلەۋ جانە ءجۇزىن كورسەتۋ قۇقىعىنان ايىرىلعان شىعىستىڭ ايەلدەرى بىردە-ءبىر ءسوزى جوق ءتىل ويلاپ تابادى. ولار ىشكى سەزىمدەرى مەن كوڭىل-كۇيلەرىن ءدال وسى گۇلدەردىڭ كومەگىمەن جەتكىزۋدى ۇيرەنەدى. گۇل – ءۇنسىز اڭگىمەلەردىڭ سيمۆولىنا اينالادى. كەيىنىرەك بۇل ءداستۇر ەۋروپادا كەڭىنەن تاراپ, تانىمالدىلىقتىڭ شىڭىنا جەتتى. گۇل شوقتارىنىڭ كومەگىمەن ادامدار ايتۋعا باتىلى بارماعان سوزدەردى, ياعني بىرەۋگە دەگەن سۇيىسپەنشىلىگىن, ىشىندە جاتقان ويلارى مەن تىلەكتەرىن جەتكىزىپ ءجۇردى. ۋاقىت وتە ارنايى حابارلاماسى بار گۇل شوقتارىن دايىندايتىن «فلوريستەر» پايدا بولدى. قازىر بۇل ءتىل تانىمالدىلىعىن جوعالتتى. دەسە دە گۇل شوقتارىن جاسايتىن كەيبىر ەرەجەلەر ءالى كۇنگە دەيىن قولدانىلادى.
ادام اتا مەن حاۋا انا
كەي اڭىزدارعا كوز جۇگىرتىپ قاراساق, جۇماق تۇرعىندارى ادام اتا مەن حاۋا انا تاڭعاجايىپ گۇلدەر وسەتىن باقتا ءومىر سۇرگەن. قۇداي كۇنا جاساعانى ءۇشىن ادام اتانى جازالايمىن دەگەن ويمەن باقتى قيراتادى, ال ونداعى وسىمدىكتەر قۋراپ قالادى. ادام اتا مەن حاۋا انا جازالانىپ, جەرگە جىبەرىلەدى. حاۋا انا جۇماقتاعى ساتتەرىن اڭساپ, گۇلدەردىڭ ءيىسىن ساعىنادى. ول كەزدە جەر بەتى تەپ-تەگىس ءشول دالا ەدى. ادام اتا حاۋا انانىڭ قينالعانىن كورىپ, وعان جۇماقتى ەسىنە تۇسىرەتىن ءبىر شوق گۇل سىيلاعىسى كەلەدى. ول گۇل ىزدەيدى, بىراق ەش جەردەن تاپپايدى. سودان سوڭ ءۇمىتىن ۇزگەن ادام اتا تىزەرلەپ وتىرىپ جىلايدى. ناتيجەسىندە ەر ادامنىڭ كوز جاسى اققان جەردەن ادەمى گۇل شوقتارى ءوسىپ شىعادى. قۋانىشتان باسى اينالعان ول گۇلدەردى تەرىپ الىپ, حاۋا اناعا سىيلايدى. سودان بەرى ايەل ادامدارعا گۇل شوقتارىن بەرۋ داستۇرگە اينالىپ كەتكەن دەسەدى.
مۇندا بۇل ءداستۇردىڭ شىعۋىنا قاتىستى بارلىق نۇسقانى قاراستىرمادىق. ماڭىزدىلارى – وسى. الايدا بۇل گۇل سىيلاۋ ءداستۇرىنىڭ شىعۋ تاريحى ءدال وسىلاي بولدى دەگەن ءسوز ەمەس. بۇل ءداستۇر بارلىق ەلدە كەڭ تارالعان. دەسەك تە, گۇل بەرۋ – ەر ادامداردىڭ ايەلدەرگە دەگەن قۇرمەتى مەن ماحابباتىن ءبىلدىرۋدىڭ نەگىزگى جولدارىنىڭ ءبىرى بولىپ قالا بەرەدى.
