ۆو ۆان تحۋونگ وتانىنا, بيلەۋشى ۆەتنام كوممۋنيستىك پارتياسىنا جانە ۆەتنام حالقىنا ادال بولۋعا انت بەردى. مەملەكەت باسشىسىنىڭ ۇلىقتاۋ ءراسىمى داۋىس بەرۋ قورىتىندىلارى جاريالانعاننان كەيىن بىردەن ءوتتى.
52 جاستاعى ۆو ۆان تحۋونگ قازىرگى ۆەتنام تاريحىنداعى 12-پرەزيدەنت بولدى. ول 1970 جىلى 13 جەلتوقساندا وڭتۇستىكتەگى ۆين لونگ پروۆينتسياسىندا دۇنيەگە كەلگەن. 1992 جىلى وڭتۇستىك حوشيمين ۋنيۆەرسيتەتىنىڭ فيلوسوفيا فاكۋلتەتىن ماركستىك-لەنيندىك فيلوسوفيا ماماندىعى بويىنشا, ال 1999 جىلى ۆەتنام ۇلتتىق ۋنيۆەرسيتەتىنىڭ الەۋمەتتىك جانە گۋمانيتارلىق عىلىمدار ۋنيۆەرسيتەتىندە فيلوسوفيا ماگيسترى دارەجەسىن الدى. وسى جىلدار ىشىندە ۆەتنام كوممۋنيستىك جاستار وداعىندا, جەرگىلىكتى پارتيا ۇيىمدارىندا جاۋاپتى قىزمەتتەر اتقارىپ, 2007 جىلى ماۋسىمدا ۇلتتىق جينالىسقا دەپۋتات بولىپ سايلاندى.
پرەزيدەنتتى, پرەمەر-ءمينيستردى جانە پارلامەنت توراعاسىن قوسا العاندا, بارلىق جەتەكشى كادرلاردى سايلاۋ ۆەتنام كوممۋنيستىك پارتياسى ورتالىق كوميتەتىنىڭ ۇسىنىسى بويىنشا ۆەتنام سوتسياليستىك رەسپۋبليكاسىنىڭ كونستيتۋتسياسىنا سايكەس ۇلتتىق جينالىس وتەدى.
1 ناۋرىزدا حانويدا وتكەن ۆەتنام كوممۋنيستىك پارتياسى ورتالىق كوميتەتىنىڭ 13-شاقىرىلىمىنداعى كەزەكتەن تىس پلەنۋمىندا بيلىك پارتياسى وتستاۆكاعا كەتكەن نگۋەن سۋان فۋكتىڭ ورنىنا ەل پرەزيدەنتتىگىنە ۆو ۆان تحۋونگتىڭ كانديداتۋراسى ۇسىنىلدى. جاڭا پرەزيدەنت ەلدى 2026 جىلعا دەيىن باسقارادى.
69 جاستاعى نگۋەن سۋان فۋك قازىرگى ۆەتنام تاريحىنداعى وكىلەتتىلىگى اياقتالماي تۇرىپ وتستاۆكاعا كەتكەن تۇڭعىش پرەزيدەنت بولدى.
