بۇل جىر سايىسى وسىمەن ەكىنشى رەت وتكىزىلىپ وتىر. 2021 جىلى اقتوبەدە «ەر ەدىگە» جىر مەكتەبى اشىلىپ, سول جىلى العاش رەت «ەدىگە دەگەن ەر ەكەن» رەسپۋبليكالىق جىرشىلار بايقاۋى وتكىزىلىپ, ونەر ورتالىعى ساحناسىندا «قىرىمنىڭ قىرىق باتىرى», «ەدىگە» جىرىنىڭ ەل جادىنداعى نۇسقالارى شىرقالعان بولاتىن.
ەكى جىلدىڭ ىشىندە اقتوبەدەگى «ەر ەدىگە» مەكتەبى شاكىرتتەرىنىڭ سانى 40-تان استى. حالىق داستاندارىن جانى سۇيەتىن مەكتەپ وقۋشىلارى مەن جوعارى وقۋ ورنىنىڭ ستۋدەنتتەرى ءدارىس الاتىن مەكتەپكە جىراۋ ادىلبەك سارين جەتەكشىلىك ەتەدى. جۇيەلى جۇمىستىڭ ناتيجەسى بولار, وسى جىر مەكتەبىنىڭ شاكىرتتەرى رەسپۋبليكالىق, وبلىستىق بايقاۋلاردا ۇزدىك شىعىپ ءجۇر. سونىمەن بىرگە اقتوبە قالاسىنىڭ ءتورت مەكتەبىندە ادىلبەك ءساريننىڭ باسشىلىعىمەن جىراۋلىق ونەرگە باۋليتىن ءتورت ۇيىرمە اشىلدى.
بۇل جولى «قوبىلاندى دەگەن ەرى بار...» بايقاۋىنىڭ باس جۇلدەسى باتىس قازاقستان وبلىسىنىڭ تۋماسى, قۇرمانعازى اتىنداعى قازاق ۇلتتىق كونسەرۆاتورياسىنىڭ 4-كۋرس ستۋدەنتى البينا سابىروۆاعا بۇيىردى. سايىستىڭ قازىلار مۇشەسى بيىلدان باستاپ «جىل جىرشىسى – 2023» اتاعىن بەكىتىپ, ونى بىرنەشە داستاندى جاتقا بىلەتىن ءارى ۇزدىك ورىندايتىن جاس جىرشىعا تابىستايتىن بولىپ كەلىستى. بيىل وسى اتاققا «ەر ەدىگە» جىر مەكتەبىنىڭ شاكىرتى سامال مەدەۋباەۆا لايىق دەپ تانىلدى. سامال اقتوبەدەگى ا.جۇبانوۆ اتىنداعى مۋزىكالىق كوللەدجدىڭ 4-كۋرس ستۋدەنتى, وننان استام كولەمدى داستاندى جاتقا ايتاتىن قابىلەتتى جاس. وسى بايقاۋدا پاۆلودار وبلىسىنان كەلگەن جىگەر بوكەننىڭ جىردى قوبىزدا ورىنداۋ شەبەرلىگىنە ءتانتى بولعان «ەر ەدىگە» جىر مەكتەبىنىڭ جەتەكشىسى ادىلبەك سارين وعان ءوز اتىنان ات مىنگىزدى. جىگەر پاۆلودارداعى «شاڭىراق» مادەني ورتالىعىندا جۇمىس ىستەيدى. داۋىس دياپازونى وتە جوعارى ءارى جىردى قوبىزدا جىرلايتىن تالانتتى جىرشى قوبىلاندى جىرىن ەمەس, ءوز قالاۋىمەن باسقا جىردى ورىنداعانى ءۇشىن جۇلدەدەن قاعىلدى. قازىلار القاسى ءبىرىنشى ورىندى سىمبات جومارتوۆا, ەكىنشى ورىنعا جامبىل وبلىسىنان كەلگەن بەكارىس كوشتاەۆقا بەردى. بەكارىس قازاق ۇلتتىق ونەر ۋنيۆەرسيتەتىنىڭ ءداستۇرلى مۋزىكالىق ونەر فاكۋلتەتىندە ءداستۇرلى جىر ماماندىعى بويىنشا ءدارىس الىپ ءجۇر. ول قوبىلاندى باتىر جىرىنىڭ ماراباي جىراۋ نۇسقاسىن جىرلاپ قانا قويماي, جامبىلدىڭ تولعاۋلارىن دا تاماشا ورىنداپ, كورەرمەن ىقىلاسىنا بولەندى. سونداي-اق اقتوبە وبلىسى اكىمىنىڭ جۇلدەسى «ەر ەدىگە» جىر مەكتەبىنىڭ شاكىرتى عاني قايروللاەۆقا, «قوبىلاندى باتىر» اتىنداعى جۇلدە استانا قالاسىنان كەلگەن ابدۋرراحمان ەستاي ۇلىنا بۇيىردى. «جاس جىرشى» نوميناتسياسىن «ەر ەدىگە» جىر مەكتەبىنىڭ شاكىرتى جانەركە قۇتتىعاي الدى.
ايتا كەتۋ كەرەك, وسى سايىسقا قاتىسۋشىلاردىڭ جاس ەرەكشەلىگى 17 جاس پەن 40 جاس اراسىندا بولىپ بەلگىلەنگەن. بايقاۋعا قاتىسۋشىلاردىڭ اراسىندا جىرشى جىگىتتەرگە قاراعاندا, جىرشى قىزداردىڭ سانى كوبىرەك ەكەن. سونداي-اق اقتوبەدەگى «ەر ەدىگە» جىر مەكتەبىندە ءدارىس الۋعا قىز بالالار كوبىرەك ىقىلاس تانىتادى ەكەن. بۇل ءوز كەزەگىندە جىر ونەرىنە ەر بالالاردى كوبىرەك باۋلۋ قاجەتتىگىن كورسەتەدى. مەكتەپ مۇعالىمدەرى وسى ماسەلەدە جاقسىلاپ ويلانۋعا ءتيىس.
اقتوبە وبلىستىق مادەنيەت باسقارماسى مۇحتار اۋەزوۆ اتىنداعى ادەبيەت جانە ونەر ينستيتۋتى ماماندارىمەن بىرلەسە قوبىلاندى باتىر جىرىنىڭ عىلىمعا بەلگىلى 29 نۇسقاسىن بىرگە جيناقتاپ شىعارۋدى قولعا الىپ جاتىر. «ەر ەدىگە» جىر مەكتەبىنىڭ ورىنداۋىنداعى «قوبىلاندى باتىر» جىرىنىڭ نۇرپەيىس بايعانين جانە ماراباي نۇسقالارى تسيفرلىق فورماتتا جانە كىتاپ تۇرىندە شىعارىلماق.
اقتوبە وبلىسى
