قازانعاپتىڭ ۇسەن تورەنىڭ اۋلىندا قوناق بولىپ جاتقان كەزى. ۇسەننىڭ ماپەلەپ باپتاپ وتىرعان يتەلگىسى بار ەكەن.
- جالىعىپ جاتقانشا بوي جازىپ, يتەلگىنى اڭعا سالىن, سىناپ قايتايىق. يتەلگى دەپ بىرەۋ سىيعا تارتقان ەدى, بىراق بوكتەرگىگە ەش اتىس بولماسا قايتسىن, - دەيدى دە قازانعاپتى ەرتىپ, قۇس سالۋعا بارادى.
ايتقانداي-اق, ۇسەن تورەنىڭ يتەلگى دەپ اسىراعانى بوكتەرگى تەكتەس قۇس بولىپ شىعادى. ەركىندىككە شىققان بوكتەرگى اسپاندا ءبىراز قالىقتاعان سوڭ توعايعا ءسىڭىپ, قاراسىن كورسەتپەي كەتەدى. ۇسەن تورە قۇستى ءارى قۋادى, بەرى قۋادى. «قيتۋ-قيتۋ, قايت-قايت» دەپ شاقىرسا دا, قۇس يەسىنە قايتىپ ورالمايدى. بوكتەرگىنى قۋا-قۋا شارشاپ شالدىعىپ, استىنداعى اتى بولدىرىپ, ۇسەن تورە ۇيىنە كەلەدى.
- بوكتەرگىنى اسىراپ وپا تاپپايدى ەكەنسىڭ, ەڭبەگىڭ ەش بولادى ەكەن. وپاسىز نەمە مەنى قوناقتىڭ كوزىنشە جەرگە قاراتىپ كەتتى-اۋ, - دەپ تاماق تاتپاي, كوڭىلىنىڭ قوشى بولماي ۇسەن تورە جاتىپ قالادى.
ۇسەننىڭ كوڭىلىن سەرگىتەيىن دەگەن ويمەن قازانعاپ: - تورە, جاقسىلىقتى بىلمەگەن يت پەن قۇسقا سونشاما قاپالانىپ قايتەسىڭ. وندايلار ادامدا دا كەزدەسپەي مە؟ سوندايدىڭ ءبارىن تەرىپ ءجۇرۋ تورە باسىڭىزعا لايىق بولاما؟, - دەپ باسۋ ايتىپ, كۇي تارتادى.
بۇل كوڭىلدى كۇيدى تىڭداعاننان كەبىن اشۋى تارقاپ, ساباسىنا تۇسكەن ۇسەن تورە: - قاراعىم-اي, زەيىلىمدى ءبىر اشتىڭ-اۋ, يت پەن قۇسى قۇرىسىن, - دەپ قازانعاپقا ريزا بولعان ەكەن.
اڭىزدى ايتۋشى – باقىت باسىعاراەۆ
