«شپاگا» جاتتىعۋى بويىنشا باق سىناعان رۋسلان قۇربانوۆ باستاپقى باسەكەلەردىڭ بارلىعىندا باسىمدىق تانىتىپ, جارتىلاي فينالعا دەيىن ەش كەدەرگىسىز جەتتى. ءدال وسى مەجەدە ونىڭ جولى كونو كوكيمەن قيىستى. بۇل ەسىم جانكۇيەرلەرگە جاقسى تانىس. 25 جاستاعى جاپونيانىڭ ماقتانىشى 2021 جىلى توكيودا الاۋى تۇتانعان وليمپيا ويىندارىندا جەڭىس تۇعىرىنىڭ ەڭ بيىك ساتىسىنا كوتەرىلسە, بىلتىر كايردە وتكەن الەم چەمپيوناتىندا قولا مەدال يەلەندى. بۇعان قوسا, كوكيدىڭ ازيا ويىندارىنىڭ جەڭىمپازى, قۇرلىق بىرىنشىلىگىنىڭ ەكى دۇركىن قولا جۇلدەگەرى جانە باسقا دا تولىپ جاتقان اتاقتارى بار. قازاقستاننىڭ ەڭ ۇزدىك سەمسەرلەسۋشىسى داڭقتى قارسىلاسىمەن ەش ايانباي ايقاستى. دەسەك تە جەڭىس 15:10 ەسەبىمەن جاپونيالىقتىڭ ەنشىسىندە كەتتى. ءسويتىپ, بۇل جارىستى قۇربانوۆ قولا مەدالمەن قورىتىندىلادى.
