اسىل تۇقىمدى «تايماس» سورتىن ورتالىق عالىمدارى 15 جىل بويى زەرتتەگەن. بيىل مەملەكەتتىك پاتەنت الدى. بۇل تۋرالى ورتالىقتىڭ جازدىق جۇمساق بيداي سەلەكتسياسى زەرتحاناسىنىڭ مەڭگەرۋشىسى, جاس عالىم ەلجاس قايىرجانوۆ ايتتى.
ماماندار جاڭا سورتتىڭ قۇرعاقشىلىققا ءتوزىمدى ەكەنىن ايتتى. «تايماس» ءپىسۋ تۇرىنە سايكەس ورتا ماۋسىمدىق سورتقا جاتادى. استىق ساپاسىنىڭ تەحنولوگيالىق كورسەتكىشى بويىنشا دا سورتى جوعارى بيداي سانالادى.
– مۇنداعى شيكى قامىرلىلىعىنىڭ مولشەرى – 32,3-34,5 پايىز, اقۋىز – 15,1-15,7 پايىز. سورتتىڭ ونىمدىلىگى دە اسا جوعارى. زەرتتەۋ جىلدارىندا جاڭا سورت ماكسيمالدى ونىمدىلىك كورسەتتى – 38,5 تس/گا. جاڭا ءونىم سولتۇستىك قازاقستان جاعدايىندا وسىرۋگە ۇسىنىلادى, – دەدى ە.قايىرجانوۆ.
ەلىمىزدىڭ سولتۇستىك وڭىرلەرىنە اسا بەيىندى جاڭا سورت القاپتاردا كەزدەسەتىن ءتۇرلى اۋرۋلارعا ءتوزىمدى. ءتىپتى سارى توت اۋرۋىن دا ەلەمەيدى. اتالعان اۋرۋ ءتۇرى بيدايدىڭ ءوسۋى مەن جەتىلۋىنە ايتارلىقتاي زيان كەلتىرەدى. وعان شالدىققان بيداي 30-40 پايىز ونىمدىلىگىن جوعالتادى. ال «تايماس» سورتى بۇعان ءتوزىمدى.
ە.قايىرجانوۆتىڭ ايتۋىنشا, قازىر ەليتالىق تۇقىم ءتۇرىن كوبەيتۋ جۇمىستارىنا دايىندىق جۇرگىزىلىپ جاتىر. الداعى ەكى جىل ىشىندە ونى جەتكىلىكتى مولشەردە كوبەيتىپ, تۇقىم رەتىندە وزگە تۇقىم شارۋاشىلىعىمەن اينالىساتىن شارۋا قوجالىقتارىنا جونەلتۋ جوسپارلانىپ وتىر.
بەردىبەك حاباي,
س.سەيفۋللين اتىنداعى قازاق اگروتەحنيكالىق ۋنيۆەرسيتەتى
