«بۇگىنگى تاڭدا ەلدى مەكەندەردەن 11 ملن تەكشە مەتردەن استام قار شىعارىلدى, الايدا بۇل جۇمىس بارلىق وڭىردە ءتيىستى دەڭگەيدە جۇرگىزىلىپ جاتقان جوق. ءوڭىر اكىمدەرى قار شىعارۋ جۇمىستارىن كۇشەيتۋلەرى قاجەت», دەدى ءاليحان سمايىلوۆ.
ەلىمىزدىڭ وڭتۇستىك وڭىرلەرىندە كۇردەلى جاعدايدىڭ قالىپتاسۋىنا سۋ بۇرۋ ارنالارىنىڭ, ارىقتاردىڭ, قورعانىش جەر ۇيىندىلەرىنىڭ بولماۋى سەبەپ بولعان. سالدارىنان تۇركىستان, جامبىل جانە الماتى وبلىستارىنداعى درەناجدىق جۇيەلەردىڭ جاۋىن-شاشىننىڭ كوپ مولشەرىنە قۋاتى جەتپەدى. ودان بولەك اتىراۋدا قار كۇرت ەرىپ, كوشەلەردى سۋ باسىپ قالعان.
«ارىقتاردى, نوسەر كارىزدەرىن تازارتىپ, ۋاقىتشا جەر ۇيىندىلەرى مەن بوگەتتەر سالۋ قاجەت. يندۋستريا جانە ينفراقۇرىلىمدىق دامۋ مينيسترلىگى مەن ءوڭىر اكىمدەرى جولداردى, كوپىرلەردى, سۋ وتكىزۋ قۇرىلىستارىن بەكىتۋ جۇمىستارىن جالعاستىرسىن», دەدى پرەمەر-مينيستر.
«قازگيدرومەتتىڭ» بولجامىندا ايتىلعانداي, ناۋرىز ايىندا ەلىمىزدىڭ وڭتۇستىك جانە شىعىس وڭىرلەرىندە اۋا تەمپەراتۋراسى مەن جاۋىن-شاشىن مولشەرى نورمادان جوعارى بولادى دەپ كۇتىلۋدە. بۇعان دايىن بولۋ كەرەك. ۇكىمەت باسشىسى «كوكتەم-2023» رەسپۋبليكالىق وقۋ-جاتتىعۋ شارالارى شەڭبەرىندە تاسقىن قاۋپى تۋىنداعان جاعدايدا ناقتى ءىس-قيمىل الگوريتمىن پىسىقتاۋدى, جارىلعىش زاتتار مەن ينەرتتى ماتەريالداردىڭ قاجەتتى قورىن دايىنداپ, حابارلاندىرۋ جۇيەلەرىنىڭ دايىندىعىن تەكسەرۋدى تاپسىردى.
«قوسىمشا كۇشتەر مەن قۇرالدار ورنالاساتىن جەرلەردى, ەۆاكۋاتسيالاناتىن حالىقتى قابىلداۋ پۋنكتتەرىن جانە اۋىل شارۋاشىلىعى جانۋارلارىن كوشىرۋ ءۇشىن قاۋىپسىز ۋچاسكەلەردى انىقتاۋ قاجەت», دەدى ءاليحان سمايىلوۆ.
