اتالمىش جارىس استانا قالاسىندا 2022 جىلى جاڭادان اشىلعان «ارعىماق» ات-ساۋىقتىرۋ سپورت كەشەنىنىڭ جۇلدەسى ءۇشىن ۇيىمداستىرىلدى.
ءىس-شارانىڭ اشىلۋ سالتاناتىنا استانا قالاسىنىڭ ۇلتتىق جانە وليمپيادالىق ات سپورتى تۇرلەرى فەدەراتسياسىنىڭ پرەزيدەنتى ەرلان كاناليموۆ, استانا قالاسى اكىمىنىڭ ورىنباسارى ەسەت بايكەن جانە وليمپيادالىق ات سپورتى تۇرلەرى بويىنشا مەملەكەتتىك جاتتىقتىرۋشى امانجول حاسەنوۆ قاتىسىپ, شاباندوزدارعا ساتتىلىك تىلەدى.
جارىسقا ەلىمىزدىڭ استانا, الماتى, شىمكەنت جانە قاراعاندى قالالارىنان 50-گە جۋىق شاباندوز قاتىستى. ولار بيىكتىگى مەن كۇردەلىلىگى بويىنشا بەس ءتۇرلى باعىتتا باق سىنادى.
«بۇل كەشەندە الداعى ۋاقىتتا ەرەكشە قاجەتتىلىگى بار بالالارعا ارنالعان جاڭا يپپوتەراپيا ورتالىعى قولدانىسقا بەرىلەدى. مۇنداعى باستى ماقسات – يپپوتەراپيا ارقىلى ەرەكشە كۇتىمدى قاجەت ەتەتىن بالالاردىڭ پسيحوفيزيولوگيالىق بەلسەندىلىگىن دامىتۋ. قالامىزدا مۇمكىندىگى شەكتەۋلى جانداردى قولداۋ بويىنشا بىرقاتار ۇلكەن اۋقىمدى جۇمىس ءجۇرىپ جاتىر. ەلوردادا 2 مىڭنان استام مۇمكىندىگى شەكتەۋلى جاندار بار. وسى جاڭادان اشىلعالى جاتقان يپپوتەراپيا ورتالىعى بۇلدىرشىندەردىڭ شيپاسىنا كومەكتەسسە, اتا-انالارعا ءۇمىت سىيلاسا, وڭ اسەرىن تيگىزسە, ودان اسقان قۋانىش جوق شىعار دەپ ويلايمىن», دەدى ەرلان كاناليموۆ.
جارىستىڭ قورىتىندىسى بويىنشا بالالار ساناتىندا الماتىلىق شاباندوز ءامينا اكشينا گوردىي اتىمەن ءبىرىنشى ورىندى ەنشىلەدى. ال ەلوردالىق جاندوس جاقىپ كامەلوت تۇلپارىمەن كۇمىس جۇلدەگەر اتاندى. ۇزدىك ۇشتىكتى قاراعاندى قالاسىنان كاپريول تۇلپارىمەن قاتىسقان كاميلا دۋرجۋباەۆا تۇيىندەدى.
دونەندەر جارىسىندا 100 سم-گە دەيىنگى كەدەرگىلەردى «كايلو رەن» سايگ ۇلىگىمەن مۇلتىكسىز ورىنداعان ماكسيم پاپيحينگە التىن جۇلدە بۇيىردى.
ەكىنشى, ءۇشىنشى ورىنداردى نۇربولات قارتقوجاق بۇركىت اتىمەن جانە تورنادو اتىمەن شىققان ۆيكتوريا كوتينا ەنشىلەدى.
بيىكتىگى 120 سم-گە دەيىن سىندا بەستى اتتار ساناتىندا «سالۆادور» سايگ ۇلىگىمەن قاتىسقان ماليكادجار چينگيز التىننان القا تاقتى. رافيا ەسىمدى تۇلپارىمەن مۇرات مانسۋر كۇمىس جۇلدەگەر اتانسا, نۇربولات كارتكوجاك «رابات» ەسىمدى تۇلپارىمەن قولا مەدالعا يە بولدى.
كەدەرگىلەردىڭ بيىكتىگى 125 سم-گە دەيىن بولاتىن ءتورتىنشى ساناتتا (6 جاستان جوعارى) ۇزدىك ۇشتىكتى سپەكتر سايگون تۇلپارىمەن ۆيكتوريا كوتينا ەنشىلەدى. كۇمىس جۇلدە ماريگولد سايگ ۇلىگىمەن ونەر كورسەتكەن ولەگ سوكولەنكوعا بۇيىردى. مۋشەك تۇلپارىمەن ايناگۇل مۇڭايتپاسوۆا ۇزدىك ناتيجەگە قول جەتكىزىپ التىندى ەنشىلەدى.
كەدەرگىلەردىڭ بيىكتىگى 130 سم بولاتىن بەسىنشى ساناتتا شىڭعىس ماليكادجار ەسىمدى شاباندوز ءوزىنىڭ ەكى اتىمەن دە قاتار سىنعا ءتۇسىپ التىن جانە قولا جۇلدەلەردى قانجىعالادى. بۇل سىندا فاندورين تۇلپارىمەن ازامات حاسەنوۆ ەكىنشى ورىن يەلەندى.
جۇلدە قورى 12 ميلليون تەڭگەنى قۇرايتىن جارىس جەڭىمپازدارى بەس نوميناتسيا بويىنشا كۋبوكتارمەن, مەدالدارمەن, ديپلومدارمەن جانە اقشالاي سىيلىقتارمەن ماراپاتتالدى.
ءىس-شارا استانا قالاسى اكىمدىگىنىڭ قولداۋىمەن جانە استانا قالاسىنىڭ ۇلتتىق جانە وليمپيادالىق ات سپورتى تۇرلەرىنىڭ فەدەراتسياسىنىڭ ۇيىمداستىرۋىمەن ءوتتى.
