اباي اتىنداعى قازۇپۋ باسقارما توراعاسى–رەكتور دارحان ءبىلالوۆ ۋنيۆەرسيتەتتىڭ ءبىلىم بەرۋ, عىلىمي-زەرتتەۋ قىزمەتىمەن تانىستىرىپ, مەكتەپتەرمەن بايلانىستى نىعايتۋ جانە ەلىمىزدىڭ بولاشاق پەداگوگتارىن قالىپتاستىرۋ باعىتىندا ىسكە اسىرىلىپ جاتقان جوبالارمەن ءبولىستى.
جيىن بارىسىندا ءبىلىم سالاسىنداعى ءبىرىنشى كەزەكتەگى مىندەتتەر, «پەداگوگ» ۇعىمىنىڭ قۇندىلىعى, ءبىلىم بەرۋ مەن كادرلار دايارلاۋ ساپاسىن ارتتىرۋ, قازاقستاندىق مۇعالىمدەردىڭ مارتەبەسىن كوتەرۋ ماسەلەلەرى تالقىلاندى. بۇل شارالار جاس ۇستازدارعا ۇلكەن مۇمكىندىكتەر بەرەتىنى باسا ايتىلدى.
مينيستر قازاقستاندىق ءبىلىم بەرۋ جۇيەسىن الەمدىك برەندكە اينالدىرۋ, پەداگوگيكالىق ءبىلىم بەرۋ تۇجىرىمداماسىنىڭ قۇندىلىعىن ارتتىرۋ, مۇعالىمدەردىڭ مىقتى بازاسىن جانە مەكتەپ ديرەكتورلارىنىڭ كادرلىق رەزەرۆىن قۇرۋ, جاس مۇعالىمدەر قاتارىنان مىقتى كادرلار دايارلاۋ, جوعارى پەداگوگيكالىق ەتيكاسى بار مامانداردى قالىپتاستىرۋ, مەملەكەتتىك ءتىل مارتەبەسىن نىعايتۋ, مەكتەپتەر مەن رەسپۋبليكالىق كىتاپحانالار ءۇشىن جاعداي جاساۋ ماسەلەلەرىنە نازار اۋداردى. عاني بەيسەنباەۆ كىتاپحانالارعا جاعداي جاساۋ جانە ولاردى عىلىمي-پەداگوگيكالىق, ادىستەمەلىك قۇرالدارمەن قامتاماسىز ەتۋ, ءبىلىم بەرۋ باعدارلامالارى مەن ستاندارتتارىنا ءتيىمدى يننوۆاتسيالار ەنگىزۋ, ادىستەمەلىك ۇسىنىستار, ينكليۋزيۆتى ءبىلىم بەرۋ جۇيەسىن دامىتۋ, مەكتەپ وقۋلىقتارىنىڭ اۆتورلارىنا قويىلاتىن تالاپتار بويىنشا جۇرگىزىلىپ جاتقان جۇمىستاردى اتاپ ءوتتى.
كەزدەسۋدە ستۋدەنتتەر مەن وقىتۋشىلار وزدەرىن تولعاندىرعان ساۋالدارىن قويىپ, ورتا ءبىلىم بەرۋ جۇيەسىن جەتىلدىرۋ بويىنشا ءوز ويلارىن ورتاعا سالدى.
