«دوستىق» ۇيىندە وتكەن كەزدەسۋ بارىسىندا ۆەدومستۆو باسشىسى ازاماتتارعا ەڭ الدىمەن قوعامدىق قاۋىپسىزدىكتى قوعاممەن سەرىكتەستىكتە قامتاماسىز ەتۋ كونتسەپتسياسى تۋرالى ايتتى. قۇجاتتىڭ ماڭىزدىلىعىنا توقتالىپ, باستى باعىتتارىن سارالاپ, ەرەكشەلىكتەرىن ءتۇسىندىردى.
سونىمەن قاتار شارا بارىسىندا ايماقتاعى كريمينوگەندىك احۋال تۋرالى اقپارات بەرىلدى. مينيستر جالپى قىلمىستىڭ 66%-ى وبلىس ورتالىعىندا جاسالاتىنىن اتاپ ءوتتى. ماڭعىستاۋدا 71 ۇرلىق, 1 مال ۇرلىعى, سونداي-اق جىل باسىنان بەرى ءبىر اي ىشىندە 26 الاياقتىق فاكتىسى تىركەلگەنى ايتىلدى. وڭىردە اكىمدىك پەن پوليتسيانىڭ ناتيجەلى جۇمىسىنىڭ ارقاسىندا كوپشىلىككە ۇلگى بولعان اۋىلدار تۋرالى دا ماعلۇمات بەرىلدى. ماڭعىستاۋ اۋدانىنىڭ وڭدى اۋىلى مەن تۇپقاراعان اۋدانىنىڭ تاۋشىق اۋىلىندا قابىلدانعان شارالاردىڭ تيىمدىلىگىنىڭ ارقاسىندا بىردە-ءبىر قىلمىس تىركەلمەگەن.
اشىق فورماتتا وتكەن كەزدەسۋدە تۇرعىندار سۇراق قويىپ قانا قويماي, ءتۇرلى ماسەلە بويىنشا ءوز پىكىرلەرىن ايتىپ, ۇسىنىستارىن ءبىلدىردى. مارات احمەتجانوۆ ادەتتەگىسىنشە ايماق جۋرناليستەرىمەن جۇزدەسىپ, ولاردىڭ ساۋالدارىنا جاۋاپ بەردى. ال داۋلى ماسەلەمەن جۇگىنگەن ازاماتتاردى مينيستر جەكە قابىلدادى. قىزمەت باسشىلارىمەن بىرگە تۇيتكىلدى سۇراقتىڭ ءتۇيىنىن شەشۋگە اتسالىستى. الاياقتارعا الدانعاندار, تەرگەۋگە كوڭىلى تولماعاندار, قىلمىسى اشىلماي اۋرەگە سالىنعانداردىڭ بارلىعىنا قۇقىقتىق نەگىزدە جاۋاپ بەرىپ, ءاربىر ءىستى جەكە باقىلاۋعا الدى. مينيستر وبلىستىق پوليتسيا دەپارتامەنتىندە دە بولدى. مۇراجايعا سوعىپ, ولكە پوليتسياسىنىڭ تاريحىمەن تانىستى. ايتا كەتۋ كەرەك, 2019 جىلى جاڭارتىلعان مۋزەي سول جىلى قازاقستانداعى پوليتسيا دەپارتامەنتتەرى مۇراجايلارى اراسىندا ۇزدىك ۇشتىككە كىرگەن. مۇراجاي مەڭگەرۋشىسى اقبالا ەدىگەقىزىنىڭ سوزىنشە, كەڭ ءۇش زالدا 1,5 مىڭنان استام قۇندى جادىگەر بار.
