اڭگىمەنىڭ القيسساسىن ديماشپەن باستاماساق اسقاق كوڭىلىمىزدى الاسارتىپ الارداي الاسۇرعانىمىز راس. مۇنىڭ وعان قانداي قاتىسى بار دەپ مۇڭدانۋىڭىز دا مۇمكىن. ايتسە دە شىنايى ونەردە ەشقانداي ەرەجە بولمايدى. تالانت جەردىڭ ارعى بەتىندە دە تالانت ەكەنىن تاعى ايتقىمىز كەلەدى. قازاق بالاسىنىڭ ميللياردتاعان قىتايدى تاڭداي قاقتىرعانى ەسىڭىزدە مە؟ سول الەمدىك دودادا ءدۇلدۇل ۇل «The show must go on», ياكي «شوۋ جالعاسۋى كەرەك» كومپوزيتسياسىن ورىنداپ, اعىلشىنداردى دا جىلاتقان ەدى. جىلاماي قايتسىن, جەتپىسىنشى جىلدارى كۇللى باتىس ەلدەرى «بوگەمالىق راپسوديا» ساناپ, ونەرىنە تابىنعان فرەددي مەركيۋريدى قايتا تىرىلتكەندەي بولدى. ءبىز بۇگىن سول كۇنى بريتاندىقتاردىڭ نەگە ەلجىرەي ەگىلگەنىن ايتقىمىز كەلەدى.
داڭقى كوككە ورلەگەن «Queen» روك-توبىنىڭ ءانشىسى فرەددي مەركيۋري مۋزىكادا ەركىندىكتىڭ جىرشىسى سانالدى. ونەردەگى مودەرنيزمگە جاڭاشا رەڭ بەردى, عۇمىرىنىڭ سوڭىنا دەيىن بوگەميا ءستيلىن جاڭعىرتتى. ولەر الدىندا «Innuendo» اتتى سوڭعى ستۋديالىق البومىن جارىققا شىعارىپ, ماڭگىلىك ساعىنىشقا اينالدى. بۇل ونىڭ سپيد دەرتىمەن كۇرەسىپ جۇرگەن كەزى ەدى. پلاستينكامەن جۇمىس ىستەپ جاتقاندا ءانشىنىڭ دەنساۋلىعى كۇرت ناشارلاپ, ۇزاق ءومىر سۇرمەيتىنىنە كوزى جەتەدى. بالكىم, بۇل تاعدىردىڭ «شوۋ جالعاسۋى كەرەك» ءانى ارقىلى اجالىنىڭ جاقىنداعانىنان حابار بەرگەنى بولار. كىم ءبىلسىن؟! ودان وڭگە جاڭا تۋىندىنى شىرقاۋعا شاماسى دا, ۋاقىتى دا جەتپەدى.
كومپوزيتسيا توپ بارابانشىسى رودجەر تەيلور مەن مۋزىكانت دجون ديكون جازعان اككوردتىق پروگرەسسيادان باستالدى. ءماتىننىڭ نەگىزگى بولىگىن كينوكومپوزيتور برايان مەي جازعان, بىراق بۇل پروتسەسكە فرەددي مەركيۋري دە قاتىسقان. اسىرەسە ءماتىنىن جازۋدا شەشۋشى ءرول اتقارعانى ايتىلادى. ونى مەي بىلايشا ەسكە الادى:
«باستاپقىدا بۇل انشەيىن اككوردتاردىڭ ۇيلەسىمى سەكىلدى كورىندى. بىراق مەن ونىڭ ماڭىزدى نارسەگە اينالۋى مۇمكىن ەكەنىن سەزىندىم. جانىمدى ناعىز اۋەنگە دەگەن قۇمارلىق باسىپ الدى. شىعارمانى ىجداعاتتىلىقپەن قولعا الدىم. ءبىز فرەدديمەن بىرگە وتىرىپ, تاقىرىپتىڭ قانداي بولۋى كەرەكتىگىن ويلاستىردىق. ءسويتىپ, ءماتىنىن جازدىق. تۋىندىنىڭ ونىڭ ومىرىندە ماڭىزدى ورىن الاتىنىن ۇعىندىم. ءارى قاراي ءبارى اڭىز», دەيدى اۆتور جازباسىندا.
ءاننىڭ ءون بويىندا جەكە ادامنىڭ كۇرەسكەرلىك رۋحى جاتىر. شىعارما قۇرىلىمى كوپتەگەن بەينەلى مەتافوراعا تولى. ءاربىر جولدى ءارتۇرلى تەڭەۋمەن تۇرلەندىرىپ, اقيقاتپەن استاستىرعان. ادەتتە, كومپوزيتسيانىڭ جاسالۋ تاريحىن بىلەتىن مۋزىكا اۋەسقويلارى فرەدديدىڭ جەكە قاسىرەت تۋرالى جىرلاعانىنا سەنىمدى. باقساڭىز, فينالعا جاقىنداعان سايىن كەيىپكەردىڭ باتىلدىعى, ءومىر سۇرۋگە دەگەن قۇشتارلىعى ارتادى. «مەن جەڭىسكە ەرىك تابۋىم كەرەك», «مەن شوۋدى جالعاستىرۋ ءۇشىن كۇش تابۋىم كەرەك», «مەنىڭ جۇرەگىم ىشتەن جارىلىپ جاتىر» دەگەن جىگەرلى سويلەمدەر ورىنداۋشىنىڭ جان ازابىنان حابار بەرەدى.
جالپى, اتالعان روك-توپتا ءىشىنارا جازىلماعان ەرەجە بار. ول ءاننىڭ ءسوزى قانداي بولسا دا تالقىلانبايدى. كەيدە ءماتىن اۆتوردىڭ جەكە كوزقاراسىنا قۇرىلۋى مۇمكىن, سوندىقتان ونى تۇزەۋ ادەپسىزدىك بولىپ سانالادى. مۋزىكانتتار مۇنى جاقسى باعامدادى. شىعارماداعى قاسىرەتكە تولى, مۇڭلى سويلەمدەر نەنى بىلدىرەتىنىن, نەگە ءجيى كەزدەسەتىنىن ەشكىم سۇرامادى.
«The Show Must Go On» ءانىن تاسپاعا جازۋ بارىسىندا مەركيۋري ءوزىن ناشار سەزىنەدى. مۇنى بايقاعان برايان مەي تۋىندىنى جاقسى نوتادا الىپ شىعارىنا كۇمانمەن قارايدى. ونىسى ءجون دە, سەبەبى فالتسەت تىم جوعارى بولعاندىقتان, انشىگە قىسىم كوبىرەك ءتۇستى. بىراق ونەرپاز سوڭعى دەمى قالعانشا بار داۋسىمەن ايقايلاپ, جۇرەكپەن ورىنداپ شىعادى. ءارى انگە قايتالانباس ءوڭ بەرىپ, كورەرمەننىڭ جان دۇنيەسىنە ماڭگى ۇمىتپاستاي مولدىرلىك قۇيادى.
وكىنىشكە قاراي, توپتىڭ حيتكە اينالعان عاجايىپ ءانىن فرەددي كوپشىلىك الدىنا ورىنداي المادى. سوندىقتان بەينەكليپتىڭ تۇسىرىلىمىنە توپ فرونتمەنىنىڭ قاتىسۋى تۋرالى اڭگىمە بولعان جوق. ءبىز تاماشالاپ جۇرگەن جەلىدەگى نۇسقاسى ءانشىنىڭ دەنساۋلىعى سىر بەرمەي تۇرعان شاقتاعى بەينەسى. وسىلايشا, ءاننىڭ تاريحى فرەدديمەن باستالىپ, فرەدديمەن اياقتالدى. ول تۋرالى «بوگەمالىق راپسوديا» اتتى فيلم دە جارىققا شىقتى. ارينە, وتە ايانىشتى. سودان دا بولار, اعىلشىندار ءاندى ءالى كۇنگە دەيىن جۇرەگى ەلجىرەپ تىڭدايدى.
ال ءبىزدىڭ ديماش كورەرمەنگە سول سەزىمدى سىيلاي الۋىمەن قۇندى. سول ساتتە ونىڭ ءۇنى, ءاندى سەزىنۋى تىڭدارماندارىن تاڭداي قاقتىردى. ونەرپازدىڭ بار ىنتاسىمەن سالعان ءانى الەمدى ءالى دە الديلەپ تۇرعانداي.
قاراڭىزشى, 2005 جىلى Music Choice تەلەكانالى 50 مىڭعا جۋىق ەۋروپالىقتان وزدەرىنىڭ جەرلەۋ راسىمىندە قانداي ءان ورىندالۋىن سۇرايدى. سوندا بارشا جانكۇيەر ءبىراۋىزدان «شوۋ جالعاسۋى كەرەك» دەپ جاۋاپ بەرىپتى.
