قازاقستاندىق قايىرىمدىلىق قورلارىن بىرنەشە تۇرگە بولۋگە بولادى: قايىرىمدىلىقتى دامىتۋ, الەۋمەتتىك جوبالار, دەنساۋلىق ساقتاۋدى, مادەنيەتءتى جانە ءبىلىم بەرۋدى قولداۋ, بالالارعا كومەك, از قامتىلعان وتباسىلارعا كومەك, زاڭگەرلىك جانە الەۋمەتتىك كومەك, قارتتارعا كومەك, جانۋارلارعا كومەك. ولار مەتسەناتتاردىڭ, قامقورشىلاردىڭ قاراجاتى ەسەبىنەن ىستەپ تۇرادى.
23 اقپاندا استانادا «Bolashak Bright» قايىرىمدىلىق پلاتفورماسىنىڭ تۇساۋكەسەرى ءوتتى.
«كەشە, 22 اقپاندا ءبىزدىڭ قورىمىزعا 12 جىل بولدى. وسى ۋاقىت ارالىعىندا ءبىز ەلىمىزدە قايىرىمدىلىقتى جۇيەلى تۇردە دامىتىپ كەلەمىز. سوڭعى جىلدارى ءبىز باسقا قورلاردىڭ جۇيەلى دامۋىنا قالاي كومەكتەسسەك, ولارعا قالاي قولداۋ كورسەتسەك دەپ ءجيى ويلاناتىنبىز. ءبىز قايىرىمدىلىق مادەنيەتىن دامىتۋ جولىندامىز. «Bolashak Bright»-تىڭ ارقاسىندا جاناشىر ازاماتتارمەن بىرلەسىپ تاماشا جوبالاردى قولداي الاتىنىمىزعا سەنىمدىمىز. جوبانىڭ ارتىقشىلىعى – ءاربىر قايىرىمدىلىق جاساۋشى باعالى سىيلىق ۇتىپ الۋ مۇمكىندىگىنە يە بولادى», دەدى «بولاشاق» قورى قامقورشىلىق كەڭەسىنىڭ ءتورايىمى دينارا گاپلان.
تۇساۋكەسەرگە جوبانىڭ ۇيىمداستىرۋشىلارى, «Ninety One» توبىنىڭ مۇشەلەرى, سەرىكتەستەر, قايىرىمدىلىق قورلارىنىڭ باسشىلارى, بلوگەرلەر, جۋرناليستەر قاتىستى.
