جۇرگىزۋشىلەر اراسىندا كولىك ءتارتىبىن جاقسارتۋ, جول-كولىك وقيعالارىنىڭ سانىن ازايتۋ, سونداي-اق جول قوزعالىسى ەرەجەلەرىن بۇزۋدىڭ الدىن-الۋ ماقساتىندا استانا قالاسى پوليتسيا دەپارتامەنتىنىڭ قىزمەتكەرلەرى «قاۋىپسىز جول» جەدەل-پروفيلاكتيكالىق ءىس-شاراسىن وتكىزىپ جاتىر.
بۇل ءىس-شارانىڭ ناتيجەسىندە ءتارتىپ ساقشىلارى ءجپىش-ءتىڭ ەكىنشى كۇنىنىڭ قورىتىندىسى بويىنشا 1400-گە جۋىق جول قوزعالىسى ەرەجەلەرىن بۇزۋ فاكتىسىن انىقتادى. ونىڭ ىشىندە كولىكتى ماس كۇيدە باسقارۋ بويىنشا 25 دەرەك, قارسى جولاققا شىعىپ كەتۋ بويىنشا 10 دەرەك, كولىك قۇرالىن باسقارۋ كەزىندە تەلەفون پايدالانۋ بويىنشا 60 دەرەك, قاۋىپسىزدىك بەلدىگىن تاقپاۋ بويىنشا شامامەن 165 دەرەك انىقتالدى.
سونىمەن قاتار پوليتسيا قىزمەتكەرلەرى جۇرگىزۋشىلەردىڭ وقيعا ورنىنان بوي تاسالاپ كەتكەن 27 جول-كولىك وقيعاسىن تىركەدى. سونىڭ ءبىرى تۋرالى ايتار بولساق, Chevrolet كولىگىنىڭ جۇرگىزۋشىسى 9 جاستاعى قىزدى قاعىپ, وقيعا ورنىنا بوي تاسالاعان. بۇل تۋرالى قىزدىڭ اناسى «102» ارناسىنا بىردەن حابارلاعان.
پوليتسەيلەر وقيعا ورنىنا دەرەۋ جەتىپ, بەينەباقىلاۋ كامەرالارىنىڭ كومەگىمەن 20 مينۋت ىشىندە جۇرگىزۋشىنى انىقتاعان. ول جولاۋشىلاردى تاسىمالداعان 24 جاستاعى تاكسي جۇرگىزۋشىسى بولىپ شىقتى.
قازىر تەرگەۋ ءجۇرىپ جاتىر. پوليتسەيلەر جۇرگىزۋشىلەردى جول كولىك وقيعاسى بولعان جاعدايدا ەشقايدا قاشىپ كەتپەۋىن سۇرايدى. ول ادام ءبارىبىر قولعا تۇسەدى. سەبەبى قالا كوشەلەرىنە ورناتىلعان بەينەباقىلاۋ كامەرالارى قۇقىقبۇزۋشىلىقتى ءتۇسىرىپ قانا قويماي, وقيعا ورنىنان بوي تاسالاپ كەتكەن قۇقىق بۇزۋشىنى تەز ارادا ۇستاۋعا سەپتىگىن تيگىزەدى.
