بيىل ەگىس القابى 23,4 گەكتاردى قۇرايدى. بۇل وتكەن جىلمەن سالىستىرعاندا 68,6 مىڭ گەكتارعا ارتىق. 2023 ءجىلى داندى داقىلدار, بۇرشاق جانە جەمشوپ داقىلدارى, قانت قىزىلشاسى مەن كۇرىش داقىلدارىن كوبەيتۋ جوسپارلانىپ وتىر. ال ماقسارى, سويا جانە قىشا سياقتى مايلى داقىلدار از ەگىلۋى مۇمكىن. سونداي-اق ماقتا القاپتارى قىسقارادى دەپ بولجانىپ وتىر. ءمينيستردىڭ ايتۋىنشا, جوسپارلانعان ەگىس كولەمى ىشكى نارىقتىڭ قاجەتتىلىكتەرىن تولىق قامتاماسىز ەتۋ ءۇشىن جەتكىلىكتى بولادى.
كوكتەمگى ەگىس جۇمىستارىن ساپالى جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەر وڭتايلى مەرزىمدە قاجەتتى رەسۋرستارمەن قامتاماسىز ەتىلەدى. قازىر ارنايى تەحنيكا پاركىندە 470 مىڭعا جۋىق تراكتور, سەپكىش جانە توپىراق وڭدەۋ قۇرالدارى بار, ونىڭ ىشىندە ءبىر مەزگىلدە بىرنەشە تەحنولوگيالىق وپەراتسيالاردى ورىندايتىن 5 مىڭنان استام زاماناۋي ەگىس كەشەنى بار.
كوكتەمگى جۇمىستاردى جۇرگىزۋ ءۇشىن وڭىرلەرگە 413 مىڭ توننا ديزەل وتىنى ءبولىندى, بۇل وتكەن جىلعى دەڭگەيدەن 13 مىڭ تونناعا ارتىق. وپەراتورلاردىڭ شىعىستارىن ەسكەرە وتىرىپ, فەرمەرلەر ءۇشىن ورتاشا باعا ليترىنە 204 تەڭگەنى قۇرايدى, بۇل نارىقتىق باعادان 15-20%-عا تومەن. بيىل اقپان ايىندا وڭتۇستىك وڭىرلەر ءۇشىن عانا ەمەس, استىق ەگەتىن سولتۇستىك وڭىرلەرى ءۇشىن دە ارزانداتىلعان ججم جونەلتۋ باستالدى.
ەربول قاراشوكەەۆ اتاپ وتكەندەي, بيىل شامامەن 704 مىڭ توننا تىڭايتقىش ەنگىزۋ جوسپارلانعان, ونىڭ 63%-ى وتاندىق ءونىم (اممياك سەليتراسى مەن امموفوس). تىڭايتقىشتاردى سۋبسيديالاۋ باعدارلاماسىنا جەرگىلىكتى بيۋدجەتتەردە 31,3 ملرد تەڭگە قاراستىرىلعان. سونىمەن قاتار فەرمەرلەردىڭ ايتۋىنشا, وڭتۇستىك وڭىرلەردە امموفوسپەن قامتاماسىز ەتۋدە بىرقاتار ماسەلە بولعان, قازىر ولار شەشىمىن تاۋىپ جاتىر.
بيىلعى جىلدىڭ قاڭتار ايىنان باستاپ العاش رەت 140 ملرد تەڭگە كولەمىنە كوكتەمگى ەگىس جۇمىستارىن قارجىلاندىرۋ ماسەلەسى پىسىقتالدى. كورسەتىلگەن قاراجاتتىڭ ءبولىنۋىن كۇتپەستەن, اگرارلىق نەسيە كورپوراتسياسى جەلتوقسان ايىندا قولدا بار رەسۋرستار ەسەبىنەن قارجىلاندىرۋدى باستادى. 39,7 ملرد تەڭگە كولەمىندەگى قارجى 1400-گە جۋىق اۋىل شارۋاشىلىعى تاۋارىن وندىرۋشىلەرگە اۋدارىلدى. جالپى 3200-دەن استام فەرمەردى قامتۋ جوسپارلانىپ وتىر.
