قازاقستاندا اۆتوكولىك ءوندىرىسىنىڭ كولەمى التىنشى جىل قاتارىنان ءوسىپ كەلەدى. ال سوڭعى 12 ايدا ماشينا جاساۋ سالاسىنداعى اۆتوونەركاسىپتىڭ ۇلەسى رەكوردتىق كورسەتكىش - 38,6%-دى قۇرادى.
Energyprom ساراپشىلارى ناقتىلاعانداي, اۆتوموبيل جاساۋ سالاسىنداعى ءوندىرىستىڭ ەڭ ۇلكەن كولەمى ءداستۇرلى تۇردە قوستاناي وبلىسى مەن الماتى قالاسىنا تيەسىلى. اتالعان وڭىرلەردە ءوندىرىس كولەمى 89%-عا جەتتى.
ايتا كەتسەك, ەلىمىزدە جەڭىل كولىك ساتىلىمى وتاندىق ءوندىرىستىڭ ءوسۋى ەسەبىنەن ءوسىپ جاتىر. ماسەلەن, ىشكى نارىقتاعى ساتۋ كولەمى ءبىر جىل ىشىندە 4,7%-عا ۇلعايدى. سونىمەن قاتار وسى كەزەڭدە يمپورت بىردەن 22,9%-عا تومەندەدى.
قازاقستاندا ۇلكەن سۇرانىسقا يە 5 برەندتىڭ ىشىندە بىردەن تورتەۋى ءبىزدىڭ ەلىمىزدە شىعارىلادى. Chevrolet, Kia, جانە Lada – قوستانايلىق Allur, HYUNDAI - الماتى Hyundai Trans Kazakhstan زاۋىتىندا شىعارىلادى.
سونداي-اق ەلىمىزدە KamaTyresKZ شينالارىن شىعاراتىن زاۋىت جۇمىس ىستەي باستادى, Allur زاۋىتى KIA Sportage اۆتوموبيلدەرىنىڭ شاناقتارىن دانەكەرلەۋ جانە بوياۋمەن CKD-ءوندىرىسىن ىسكە قوسۋ ءۇشىن قۋاتىن كەڭەيتتى, بيىل زاۋىتتا KIA CERATO جانە Chevrolet Enix مودەلدەرى شىعارىلادى دەپ جوسپارلانىپ وتىر. بۇل رەتتە 2022 جىلى الماتىدا Chery, Haval جانە Changan اۆتوموبيلدەرىن شىعاراتىن جاڭا زاۋىت قۇرىلىسى باستالعانىن اتاپ وتكەن ءجون.
