فۋتبول. الەم چەمپيوناتى: يتاليا – كوستا-ريكا 0:1

استانا. 20 ماۋسىم. بۇگىن تۇندە يتاليا – كوستا-ريكا كەزدەسۋىمەن D توبىنداعى ەكىنشى تۋر ويىندارى اياقتالدى. وندا كوستاريكالىقتار 1:0 ەسەبىمەن جەڭىسكە جەتتى. بۇل تۋرالى egeven.kz حابارلادى. يتاليا – كوستا-ريكا 0:1 (0:1). 20 ماۋسىم. رەسيفي. «ارەنا پەرنامبۋكۋ» ستاديونى. تورەشى - ەنريكە وسسەس (چيلي). يتاليا: دجانلۋيدجي بۋففون, ماتتەو دارميان, اندرەا باردزالي, دجوردجي كەلليني, ينياتسيو اباتە, انتونيو كاندرەۆا (لورەنتسو ينسينە, 57), اندرەا پيرلو, دانيەلە دە روسسي, تياگو موتتا (انتونيو كاسسانو, 46), كلاۋديو ماركيزيو (الەسسيو چەرچي, 69), ماريو بالوتەللي. كوستا-ريكا: كەيلور ناۆاس, كريستيان گامبوا, وسكار دۋارتە, ميحاەل ۋمانا, دجانكارلو گونسالەس, جۋنيور دياس, ەلتسين تەحەدا (حوسە كۋبەرو, 68), كريستيان بولانوس, جوەل كەمپبەلل (ماركوس ۋرەنيا, 74). گول: برايان رۋيس (44). ەسكەرتۋلەر: ماريو بالوتەللي (69) – حوسە كۋبەرو (71). چەمپيونات باستالار الدىندا جانكۇيەرلەر «ولىمگە باس تىككەندەر توبى» دەگەن ءادىل ات بەرگەن D كۆارتەتىندە فاۆوريت يتاليا دا, انگليا دا, ۋرۋگۆاي دە ەمەس, كوستا-ريكا بولادى دەپ كىم ويلاعان! كەرىسىنشە جۇرتتىڭ ءبارى انىق اۋتسايدەر ستاتۋسىن وسى قۇراماعا تەلىپ قويعان جو پا ەدى؟! ال ورتالىق امەريكانىڭ جاساعى ۋرۋگۆايدان كەيىن يتاليانى دا ۇتىپ كەتىپ, برازيليا چەمپيوناتىنداعى ازىرگە ەڭ باستى سەنساتسيانى جاساپ وتىر. ەكى بىردەي بۇرىنعى الەم چەمپيونىن تىزە بۇكتىرگەن ۇجىم وسىلاي ەكى ويىندا مۇمكىن بولعان 6 ۇپايدى تۇگەل الىپ, توپتىڭ ەڭ الدىنا شىعىپ, كەلەسى پلەي-وفف كەزەڭىنە ءبىرىنشى بولىپ ءوتتى. ەڭ باستىسى, كوستا-ريكا وسىنىڭ الدىنداعى سياقتى يتاليامەن كەزدەسۋدە دە لايىقتى جەڭىسكە جەتتى. شىنى كەرەك, چەزارە پراندەلليدىڭ شاكىرتتەرى «لوس تيكوستان» تيتتەي باسىم بولمادى. راس, يتاليالىق ماريو بالوتەللي كوماندالاسى اندرەا پيرلو بەرگەن ەكى كەرەمەت پاس ارقىلى گول سوعۋى كەرەك ەدى. بىراق بۇل مۇمكىندىكتەردى ول دۇرىس پايدالانا المادى. اپپەنين جىگىتتەرىنىڭ وسىلاردان باسقا گول سوعۋعا قولايلى ساتتەرى بولعان جوق. تايمنىڭ سوڭىندا كوستاريكالىقتار ايتارلىقتاي باسىمدىلىق كورسەتتى. سول شابۋىلدار لەگىندە چيليلىك تورەشى ەنريكە وسسەس يتاليانداردىڭ جوەل كەمپبەللدى ءوز ايىپ الاڭدارىندا انىق شالىپ قۇلاتقانىنا پەنالتي بەرۋگە باتىلدىق تانىتا المادى.  دەگەنمەن, ارادا ءبىر مينۋت وتكەندە ادىلدىك سالتانات قۇرعانداي بولدى – امەريكالىقتار برايان ءرۋيستىڭ كومەگىمەن گول سوعىپ, العا شىقتى. وسىدان كەيىن يتاليا قۇراماسى ەكىنشى تايمدا ويىن تىزگىنىن ءبىرجولا قولىنا الاتىنداي كورىنگەن. الايدا, ءىس جۇزىندە ءبارى باسقاشا شىقتى. كوستاريكالىق قاقپاشى كەيلور ناۆاستىڭ داربازاسىنا تونگەن قاۋىپتىڭ قاتارى ءبىرىنشى تايمداعىدان دا ازايىپ كەتتى. ال «لوس تيكوس» ءسات سايىن العا ۇمتىلىپ, قارسى شابۋىلدار ۇيىمداستىرۋلارىن جالعاستىرا بەردى. ولار كەيدە كادىمگىدەي قاۋىرت شىقتى. وسى ارالىقتا سكۋادۋرا ادزۋرا وفسايدقا ءتۇسىپ قالۋلارىن جيىلەتتى. وسىلايشا قارسى جاقتىڭ ەكپىنىن باسىپ وتىرعان حورحە لۋيس پينتونىڭ جىگىتتەرى جەڭىستى جاريا ەتەتىن ەسەپتى كەزدەسۋ سوڭىنا دەيىن ساقتاپ قالدى. دامير قوجامقۇل. دەرەككوز: egemen.kz. فوتو: Sportbox.ru.