«استانا وپەرا» الەمدىك تەاترلارمەن ارىپتەستىك بايلانىس ورناتادى

استانا. 20 ماۋسىم. اتى اڭىزعا اينالعان ميلاندىق تەاتردىڭ ەلورداعا گاسترولدىك ساپارى اياسىندا «لا سكالا» مەن نەاپولداعى «سان كارلو» تەاترى باسشىلارى مەن «استانا وپەرا» تەاترى اراسىندا ارىپتەستىك جونىندەگى مەموراندۋمعا قول قويىلماق. بۇل تۋرالى egemen.kz ءتىلشىسى حابارلادى. اتالعان ءۇش مۋزىكالىق تەاترعا قاشاندا دوستىق پەن شىعارماشىلىق ارىپتەستىك دانەكەر ەكەنىن ايتا كەتكەن ءجون. كەزدەسۋ بارىسىندا تەاتر باسشىلارى الداعى جۇمىس جايىن تالقىلاۋدى جوسپارلاپ وتىر. ەسكە سالا كەتەيىك, استانالىق تەاتر يتاليالىق «لا سكالا» تەاترىمەن بىرىگىپ, بيىلعى جىلدىڭ مامىر ايىندا دج. ءپۋچچينيدىڭ «توسكا» وپەراسىن قويعان بولاتىن, سونداي-اق, الداعى كۇزدە قوس ونەر ورداسى دج.ۆەرديدىڭ «ايدا» (قويۋشى-رەجيسسەر – فرانكو دزەففيرەللي, يتاليا) وپەراسىنىڭ تۇساۋىن كەسپەك. ەجەلگى «سان كارلو» وپەرا تەاترىنىڭ ديرەكتورى روزاننا پۋركيا ءححى عاسىر عالاماتى – «استانا وپەرا» تەاترى جايلى بۇعان دەيىن ءوزىنىڭ ارىپتەستەرىنەن كوپ ەستىگەنىن اتاپ ءوتتى. «جاس تەاتردى كورىپ, بىرلەسكەن ارىپتەستىگىمىزدى تالقىلاپ قايتۋ مەن ءۇشىن ۇلكەن قۇرمەت» دەدى مامان. روزاننا پۋركيا ءوزارا گاسترولدىك الماسۋلار ۇيىمداستىرۋدى ۇسىندى, وسىلايشا, نەاپولدىق ترۋپپا الداعى جىلى ب.ەيفماننىڭ قويىلىمىنداعى ۆ. موتسارتتىڭ «رەكۆيەم» بالەتىنىڭ تۇساۋىن كەسۋدى جوسپارلاپ وتىر, ال «استانا وپەرا» تەاترىنىڭ ترۋپپاسى بۇعان جاۋاپ رەتىندە «سان كارلو»-داعى «كۇزگى بيلەر – 2015» فەستيۆالىنە قاتىساتىنىن مالىمدەدى. قوس تەاتردىڭ جوسپارىندا  گ.دونيتسەتتيدىڭ «Lucia di Lammermoor» قويىلىمىن بىرىگىپ قويۋ ماسەلەسى تاعى تۇر. قويىلىم ءوزىنىڭ جارقىن جاقتارىمەن جان باۋرايدى دەگەن سەنىم بار, وندا حالىقارالىق دەڭگەيدەگى كاست ونەر كورسەتپەك, قويۋشى- رەجيسسەرى – بىرنەشە كينەماتوگرافيالىق ماراپاتتاردىڭ يەگەرى, «وسكار» سىيلىعىنىڭ «ۇزدىك شەتەلدىك فيلم» اتالىمى بويىنشا نومينانتى دجيانني امەليو, ستسەنوگرافى – نيكولا رۋبەرتەللي. قاراشاش توقسانباي. دەرەككوز: egemen.kz. فوتو: astana.gov.kz.