شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, قۇتقارۋشىلار مەن گلۋبوكوە اۋدانىنىڭ اكىمدىگى سۋ تاسقىنى قاۋپى بار ەلدى مەكەندەرگە مونيتورينگ جۇرگىزدى. اۋداندا بۇگىنگى تاڭدا توڭنىڭ قالىندىعى – 48 سم, قار جامىلعىسىنىڭ بيىكتىگى – 134 سم.
گلۋبوكوە اۋدانىندا سۋ باسۋ قاۋپى جوعارى 15 ەلدى مەكەن بار. اتاپ ايتقاندا, پراپورششيكوۆو, ۋۆاروۆو, گلۋبوكوە, كامەننىي كارەر, بەلوۋسوۆكا, نوۆو-ۋلبينكا, تارحانكا, التاي, پروگرەسس, پرەدگورنوە, رازەزد, چەرەمشانكا, ۋشانوۆو, مالوۋبينكا جانە وپىتنوە پولە اۋىلدارى. ونداعى بارلىعى 92 ۇيدە 2 335 ادام تۇرادى.
«قازىرگى كەزدە سۋ تاسقىنى كەزەڭىنە دايىندىق جۇمىستارى جۇرگىزىلىپ جاتىر. اۋداندا 6,6 مىڭ تەكشە مەتر قار شىعارىلعان. اۆتوكولىك جولدارىنداعى 34 سۋ وتكىزۋ قۇرىلىسى, 14 شاقىرىم كانالدار جانە 22,3 شاقىرىم ارىقتار قار مەن مۇزدان تازارتىلدى. 9 200 دانا قاپ, 100 توننا ينەرتتى ماتەريال, 1,6 توننا جانار-جاعارماي دايىندالدى. سونداي-اق توتەنشە جاعداي بولىپ جاتسا, حالىقتى ەۆاكۋاتسيالاۋ ءۇشىن ۋاقىتشا ورنالاستىرۋ پۋنكتتەرىن ۇيىمداستىردىق. گيدرولوگيالىق جاعداي تۇراقتى», دەيدى گلۋبوكوە اۋدانىنىڭ اكىمى ەلدار تۋماشينوۆ.
قۇتقارۋشىلار ءاربىر ءۇيدى ارالاپ, سۋ باسۋ قاۋپى تونگەن جاعدايدا قالاي ارەكەت ەتۋ كەرەك ەكەنىن ءتۇسىندىرىپ ءجۇر. بۇل رەتتە وسىعان دەيىن شقو-داعى 13 جول ۋچاسكەسىن سۋ باسۋ قاۋپى بار ەكەنى حابارلانعانىن ايتا كەتكەن ءجون.
شىعىس قازاقستان وبلىسى
