ول ءبىلىم بەرۋ سالاسىنداعى ماسەلەلەردى ناقتى شەشۋگە جانە ونى ودان ءارى دامىتۋعا باعىتتالعان. العاشقى قۇجاتقا استانا قالاسىنىڭ اكىمدىگى قول قويدى. وقۋ-اعارتۋ ءمينيسترى عاني بەيسەمباەۆ استانا قالاسىنىڭ اكىمى جەڭىس قاسىمبەككە ءبىلىم سالاسىن دامىتۋعا ەرەكشە كوڭىل بولگەنى ءۇشىن العىسىن ءبىلدىردى.
استانا قالاسى اكىمدىگىنىڭ جوسپارى بويىنشا ەلوردادا تولىق كۇندىك توپتارى بار بالاباقشالار اشىلادى. كەزەكتە تۇرعانداردىڭ كوپتىگىنە بايلانىستى 39 مىڭعا جۋىق ورىنعا مەملەكەتتىك ءبىلىم بەرۋ تاپسىرىسىن ورنالاستىرۋ, 2200 ورىنعا ارنالعان 22 شاعىن ورتالىق اشۋ جوسپارلانۋدا.
«مەكتەپ قۇرىلىسىنا ەرەكشە كوڭىل بولەمىز. بيىلعى جىلى 24 جايلى مەكتەپتى جوبالاۋ باستالدى. جاڭا ۇلگىدەگى مەكتەپتەر ەكى اۋىسىمدا 90 مىڭعا جۋىق وقۋشى قابىلداۋعا مۇمكىندىك بەرەدى. سونىمەن قاتار جاڭا وقۋ جىلىندا 13 مەكتەپ اشۋدى جوسپارلاپ وتىرمىز. اتالعان شارالار ءۇش اۋىسىمدى جانە تىعىز مەكتەپتەر سانىن ازايتادى», دەدى استانا قالاسىنىڭ اكىمى جەڭىس قاسىمبەك.
عاني بەيسەمباەۆ ءبىلىم ساپاسىن ارتتىرۋعا عانا ەمەس, سونىمەن قاتار بالالاردىڭ قاۋىپسىزدىگىنە جانە ءبىلىم بەرۋ ۇيىمدارىنداعى ورىن تاپشىلىعىن ازايتۋعا باسا نازار اۋداردى.
«تەگىن تەحنيكالىق جانە كاسىپتىك بىلىممەن 100% قامتۋدى قامتاماسىز ەتۋ ءۇشىن مەملەكەتتىك تاپسىرىستى 2026 جىلعا دەيىن 15,5 مىڭ ورىنعا دەيىن ارتتىرۋ جوسپارلانۋدا. سونداي-اق 6950 مامان كاسىپورىنداردىڭ ماقساتتى تاپسىرىسى بويىنشا وقىپ, 100% جۇمىسقا ورنالاستىرىلادى. كوللەدج ستۋدەنتتەرىنىڭ ستيپەندياسىن 50% - عا ارتتىرۋ بويىنشا شارالار قابىلدانۋدا», دەپ اتاپ ءوتتى وقۋ-اعارتۋ ءمينيسترى عاني بەيسەمباەۆ.
800-گە جۋىق وقىتۋشى بىلىكتىلىكتى ارتتىرۋ كۋرستارىنان وتەدى. كەلەسى جىلى بارلىق ەلوردا مەكتەپتەرى ءبىلىم الۋشىلاردىڭ ءبىلىم جەتىستىكتەرىنىڭ مونيتورينگىنە (ببجم) جانە PISA-نىڭ جىل سايىنعى زەرتتەۋىنە قاتىسادى. ونىڭ قورىتىندىسى اياسىندا ءبىلىم بەرۋ ساپاسىن ارتتىرۋ بويىنشا ناقتى ۇسىنىمدار بەرىلەدى.
بۇگىندە مينيسترلىك وقۋشىلاردى تاماقتاندىرۋدىڭ ۇلتتىق باعدارلاماسىنىڭ جوباسىن ازىرلەپ جاتىر. استانا مەكتەپتەرىندە تاماقتاندىرۋدى ۇيىمداستىرۋ ءۇشىن «تسيفرلىق مەكتەپ اسحاناسى» پيلوتتىق جوباسىن ەنگىزۋ ۇسىنىلادى. جول كارتاسىنا مەكتەپكە دەيىنگى تاربيە مەن وقىتۋ, ورتا ءبىلىم بەرۋدى دامىتۋ, ءبىلىم بەرۋ ساپاسىن باعالاۋ, ينكليۋزيۆتى ءبىلىم بەرۋ, بالالاردىڭ قۇقىقتارىن قورعاۋ, قوسىمشا ءبىلىم بەرۋ, تەحنيكالىق جانە كاسىپتىك ءبىلىم بەرۋ جونىندەگى ءىس-شارالار, سونداي-اق ءبىلىم بەرۋ ۇيىمدارىندا سىبايلاس جەمقورلىققا قارسى ءىس-قيمىل جونىندەگى شارالار ەنگىزىلدى.
