ەۋرازيالىق ەكونوميكالىق قوعامداستىق سوتىنىڭ مۇمكىندىكتەرىن كەڭىرەك پايدالانۋ كەرەك

استانا. 20 ماۋسىم. ساراپشىلار ەۋرازيالىق ەكونوميكالىق وداق كولەمىندە ورىن الاتىن كەيبىر ماسەلەلەردى شەشۋگە قۇقىقتىق تەتىكتەردى پايدالانۋدىڭ ماڭىزى زور دەپ ەسەپتەيدى. بۇل تۋرالى «24kz» حابارلادى. نەگىزىندە, قازاقستان, رەسەي, بەلارۋس ەلدەرىنە قاراستى مەملەكەتتىك ورگاندار, شارۋاشىلىق ەتۋشى سۋبەكتى وكىلدەرى مەن جەكە كاسىپكەرلەر ەۋرازيالىق ەكونوميكالىق قوعامداستىق سوتىنا وزدەرىنىڭ قۇقىعىن, بيزنەس مۇددەلەرىن قورعاۋدى ءوتىنىپ جۇگىنە الادى. دەگەنمەن, اتالعان قوعامداستىق سوتىنا ەلىمىزدىڭ تاراپىنان ەشقانداي ءوتىنىش تۇسپەگەن. بۇگىندە قىتاي, ءۇندىستان سىندى بىرقاتار مەملەكەتتەر وسى حالىقارالىق سوت ورگانىنىڭ ءادىل دە بەدەلدى ورىن ەكەنىنە كوز جەتكىزگەن. وسى ماسەلەگە قاتىستى ەۋرازيالىق ەكونوميكالىق قوعامداستىق سوتىنىڭ سۋدياسى جولىمبەت بايىشەۆ: «ەۋرازيالىق ەكونوميكالىق وداق اياسىندا تاۋارلار مەن قىزمەتتەر اينالىمىن شەكتەيتىن نەمەسە قاندايدا ءبىر كەدەرگىلەر بولسا, ولارعا قاتىستى شەشىمدى تەك ەۋرازيالىق ەكونوميكالىق قوعامداستىقتىڭ سوتى عانا قابىلداي الادى», – دەيدى. قازىرگى تاڭدا ماماندار ەۋرازيالىق ەكونوميكالىق قوعامداستىق سوتىنىڭ مۇمكىندىكتەرىن كەڭىرەك پايدالانىپ, بۇل ينستيتۋتتىڭ قىزمەتى مەن بەدەلىنە لايىقتى مارتەبە بەرۋ كەرەك دەپ وتىر. جولدىباي بازار. دەرەككوز: «24kz». فوتو: Belta.by.