كەزدەسۋ بارىسىندا تاراپتار جەڭىل ونەركاسىپتى دامىتۋ جانە قۇرىلىس ماتەريالدارىن ءوندىرۋ ماسەلەلەرىن, سونىمەن بىرگە حيميا ونەركاسىبى ءۇشىن ماماندار دايارلاۋ بويىنشا وزەكتى سۇراقتاردى تالقىلادى. وسى رەتتە ونەركاسىپ سالاسىنداعى ىنتىماقتاستىق قازاقستان مەن رەسەيدىڭ اراسىنداعى ەكىجاقتى قاتىناستاردىڭ نەگىزگى باعىتى ەكەنىن ايتا كەتكەن ءجون.
«ەكىجاقتى ارىپتەستىگىمىزدىڭ باعىتتارى اراسىندا ونەركاسىپتىك كووپەراتسيانىڭ الار ورنى ەرەكشە. قازىر 26 بىرلەسكەن جوبا ءساتتى ىسكە اسىرىلىپ, تاعى دا 7 مىڭنان استام جۇمىس ورنىن اشۋدى كوزدەيتىن 23 ءىرى جوبا جۇزەگە اسىرىلىپ جاتقانىن ايتا كەتۋ كەرەك», دەدى قر يدم باسشىسى.
بۇل رەتتە 2022 جىلدىڭ شىلدەسىندە قازاقستان ەكاتەرينبۋرگتەگى «يننوپروم-2022» حالىقارالىق ونەركاسىپتىك كورمەسىندە ارىپتەس مەملەكەت رەتىندە تابىستى ونەر كورسەتكەنىن ايتا كەتكەن ورىندى. ناتيجەسىندە ىسكەرلىك قارىم-قاتىناستى جوعارى دەڭگەيگە ارتتىرۋعا باعىتتالعان بىرلەسكەن ءىس-قيمىل باعدارلامالارى مەن 27 ەكىجاقتى شارتتارعا قول قويىلدى.
ۆەدومستۆو باسشىسى مارات قاراباەۆ بيىل وتاندىق ونەركاسىپ كاسىپورىندارى ەكاتەرينبۋرگ قالاسىندا وتەتىن «يننوپروم» حالىقارالىق كورمەسىنە قاتىساتىنىن اتاپ ءوتتى. سونىمەن قاتار وسى جىلدىڭ قىركۇيەگىندە استانادا مەملەكەت باسشىسىنىڭ, سونداي-اق ەاەو, پاكىستان, تۇركيا, ءۇندىستان, يران, ءازىربايجان جانە باسقا دا ەلدەردىڭ ۇلتتىق ەكسپوزيتسيالارى مەن جەكەلەگەن كومپانيالارىنىڭ قاتىسۋىمەن «يننوپروم قازاقستان» كوشپەلى ونەركاسىپتىك كورمەسىن وتكىزۋ جوسپارلانىپ وتىر.
ەسكە سالايىق, ماسكەۋگە جاساعان جۇمىس ساپارى بارىسىندا مارات قاراباەۆ كورشىلەس مەملەكەتتىڭ قۇرىلىس جانە تۇرعىن ءۇي-كوممۋنالدىق شارۋاشىلىق جونىندەگى ءمينيسترى يرەك فايزۋللينمەن, رف كولىك ءمينيسترى ۆيتالي ساۆەلەۆپەن جانە رەسەي فەدەراتسياسىنىڭ ەنەرگەتيكا ءمينيسترى نيكولاي شۋلگينوۆپەن كەزدەستى.
اتالعان كەزدەسۋلەردە ساۋلەت, قالا قۇرىلىسى جانە تۇتاستاي قۇرىلىس سالاسىن دامىتۋ, بيتۋم جەتكىزۋ ماسەلەلەرى, سونداي-اق جۇك ءارى جولاۋشىلار اۆتوتاسىمالى باعىتىنداعى ەكىجاقتى ۇكىمەتارالىق كەلىسىم جوباسىن دايىنداۋ ماسەلەلەرى قارالعان.
