بۇل سيمپوزيۋمگە ۋەفا-عا مۇشە بارلىق قاۋىمداستىقتاردىڭ, سونداي-اق جەتەكشى ەۋروپالىق كلۋبتاردىڭ ۇلتتىق قۇرامالارىنىڭ دارىگەرلەرى قاتىستى.
سپيكەرلەر مەديتسينا سالاسىنداعى ەۋروپالىق ماماندار دالادا جانە ودان تىس جەرلەردە قيىن جاعدايلاردا جۇمىس ىستەۋ جانە شەشىم تابۋ ادىستەرىن قامتيتىن تاقىرىپتاردا ءسوز سويلەدى. ولاردىڭ اراسىندا ۋەفا مەديتسينالىق وفيتسەرى زوران باحتيارەۆيچ, نەمىس فۋتبول اسسوتسياتسياسىنىڭ مەديتسينالىق كوميتەتىنىڭ وكىلى كلاۋس رەينسبەرگەر, نيدەرلاند كورولدىك فۋتبول اسسوتسياتسياسىنىڭ باس دارىگەرى ەدۆين گودحارت, «بارسەلونا» فك ايەلدەر سپورتتىق دەنساۋلىعىنىڭ مامانى ەۆا فەررەر, حوك مەديتسينالىق جانە عىلىمي كوميسسياسىنىڭ تاماقتانۋ جونىندەگى جۇمىس توبىنىڭ توراعاسى رون موەن جانە باسقالارى بولدى.
سيمپوزيۋم بارىسىندا نەگىزگى تەستىلەۋ, پوستكوۆيدتى قالپىنا كەلتىرۋدىڭ قيىندىقتارى, سونداي-اق ايەلدەر كوماندالارىنىڭ جاتتىعۋلارىنىڭ ەرەكشەلىكتەرى كوتەرىلدى.
«سيمپوزيۋمعا قاتىسۋشىلار دارىستەردىڭ ساپاسىنا جانە فۋتبول مەديتسيناسىنىڭ نەگىزگى مۇددەلى تاراپتارىمەن قارىم-قاتىناس جاساۋدىڭ بىرەگەي مۇمكىندىگىنە وتە ريزا بولدى. ۋەفا ۇنەمى فۋتبولشىلارعا جوعارى ساپالى مەديتسينالىق قىزمەت كورسەتۋگە ۇمتىلادى جانە سيمپوزيۋم كەزىندە تۋىنداعان ماسەلەلەر شەشىلەدى دەپ ۇمىتتەنەدى», دەپ ۋەفا مەديتسينالىق وفيتسەرى زوران باحتيارەۆيچ اتاپ ءوتتى.
بۇل ءىس-شارادا ەلىمىزدىڭ اتىنان فۋتبولدان قازاقستان قۇراما كوماندالارىنىڭ دارىگەرلەرى نۇرلان بيتۇعىلوۆ پەن احمادحون يسكانداروۆ قاتىستى.
«سيمپوزيۋمدا كوپتەگەن وزەكتى تاقىرىپتار تالقىلاندى. بۇگىنگى تاڭدا مەديتسينا كوماندالىق كۇش-جىگەردى قاجەت ەتەدى. سونىمەن قاتار جىل سايىن فۋتبولشىلاردىڭ جاراقاتتار ءتۇرى وزگەرگەنىنە بايلانىستى دياگنوستيكا دا وزگەرەدى. مۇنداي سيمپوزيۋمدار ءبىلىمىمىزدى جەتىلدىرەدى, وندا ەۋروپانىڭ كوپتەگەن ماماندارى تاجىريبەلەرىمەن بولىسەدى», دەدى قازاقستان قۇراماسىنىڭ دارىگەرى نۇرلان بيتۇعىلوۆ.
