وتكەن جىلى قاينار اۋىلىندا ۇلىستىڭ ۇلى كۇنىنە وراي ۇيىمداستىرىلعان مادەني ءىس-شارادا التى-جەتى جاستاعى جەتكىنشەكتەر لاق كوتەرۋدەن جارىسقان. سول سايىستا التى جاستاعى ايبار دا 15-20 كگ تارتاتىن لاقتى وتىز ءۇش رەت كوتەرىپ, قۇلاپ قالعانى الەۋمەتتىك جەلىلەردە لەزدە تاراپ, كوپشىلىكتىڭ كوزايىمىنا اينالىپ ەدى. مىنە, سودان بەرى اۋىلدىڭ شيكىوكپەلەرى قوراداعى قوزى-لاقتى اينالشىقتاپ, مويىنعا سالىپ كوتەرە كەتۋگە قۇشتار. كوگەندەگى قوزى-لاققا مازا بەرمەي جۇرگەن جۇگىرمەكتەردىڭ بار ويى – بيىلعى ناۋرىز مەرەكەسىندە جەڭىمپاز اتانۋ.
دالا بالاسىنىڭ قالا بالاسىنا قاراعاندا شىمىر, شىدامدى ەكەنى اۋەل باستان بەلگىلى عوي. اۋىلدىڭ بالاسى كۇنۇزاققا تەلەديدارعا تەلمىرىپ, سمارتفوننىڭ بەتىن سيپاپ وتىرا بەرمەيدى. قىستا تاي ۇيرەتسە, كوكتەمدە اسىق وينايدى. جازدا اۋىل ىرگەسىندەگى وزەن جاعاسىندا قىزدىرىنىپ جاتقانى. ال كۇزدە كەرزى ەتىكتى كيىپ الىپ, لاڭگى تەۋىپ جۇرگەنى. باسقا اۋىلدى قايدام, قايناردىڭ قارادومالاقتارى وسىنداي. قاشان كورسەڭ ويقاستاپ ويناپ جۇرگەنى. وسى قاتاردان جەتى جاستاعى ايباردى دا تاباسىز. جەلىدە حيت بولعان جەتكىنشەك اۋىل بالاسىنىڭ بويىنان تابىلاتىن بولمىستى كورسەتىپ تۇرعانداي.
«وتكەن جىلى قاينار اۋىلى ناۋرىز مەرەكەسىن اۋقىمدى تۇردە اتاپ وتكەن ەدى. وزگەشە بولسىن دەگەن ويمەن بالالارعا لاق كوتەرۋدەن جارىس ۇيىمداستىرعان جايىمىز بار. اۋىلدىڭ ۇلكەن-كىشىسى جىلى قابىلدادى. سونىڭ ارقاسىندا ايبارىمىز قازاقستانعا تانىلدى. قوزى-لاق كوتەرۋ جارىسى اۋىلدا داستۇرگە اينالىپ كەتتى», دەيدى قاراولەڭ اۋىلدىق وكرۋگىنىڭ اكىمى داۋلەت اسەمباەۆ.
بالا كورگەنىن ىستەيدى دەگەن راس-اۋ. ايباردىڭ اكەسى دۋمان دا قوي كوتەرۋدەن ەكى رەت جەڭىمپاز بولىپ, كوتەرگەن قويىن اتىنا وڭگەرىپ ۇيىنە اكەلگەن. ۇلىستىڭ ۇلى كۇنىندە قويدى 105 رەت كوتەرسە, مامىرداعى مەرەكەدە 112 رەت كوتەرىپتى. «اكە كورگەن وق جونار» دەگەن ماقالدى وسى جەردە قولدانساق, ورىندى سياقتى.
«ايبار – اتاسى مەن اپاسىنىڭ بالاسى. جاز جايلاۋدا اتاسىنا قوي باعىسادى. اپاسى سيىر ساۋعاندا بۇزاۋ تارتىپ, وت جاعۋعا وتىن جيناپ بەرەدى. قىستا اۋىلدا قولداعى مالعا قاراسىپ, قورا تازالاسىپ, ءشوپ سۋىرىپ قاسىمدا جۇرەدى. كورشى-قولاڭنىڭ بالالارىمەن قوزى-لاق كوتەرىپ جارىسىپ جۇرگەنىن كورەمىن. بيىل 1-سىنىپتا وقىپ ءجۇر. ەلگەزەك. اقكوڭىل. ساباعى دا جاقسى, – دەگەن ايباردىڭ اكەسى دۋمان وتكەن جىلعى جارىستىڭ جايىن دا ايتىپ ءوتتى. – ۇلىم لاق كوتەرۋگە شىعادى دەگەن ويىما كەلمەگەن. ءوزى شەشىم قابىلداپ, «مەن دە لاق كوتەرەمىن», دەدى. ول لاقتى كوتەرىپ ءارى قۇلاعانىمەن, تانىمال بولدى دەپ ويلايمىن».
اۋىل بالاسى ءالدى بولسا, اعارعان ىشكەننەن دەۋگە بولاتىن شىعار. قالا بالاسى قىلقيىپ يوگۋرت جەپ, گازدالعان سۋسىن ىشەدى, سوسىن «سۋشي» مەن «پيتستساعا» اۋەس. اۋىل بالاسىنىڭ الەۋەتىن تابا نانعا سارىماي جاعىپ, بەتىنە قانت سەۋىپ جەپ جۇرگەنىنەن بايقاي بەرۋگە بولاتىن شىعار.
– اۋىلدىڭ تاماعىندا قۇنار بار عوي. ءسۇت پەن ايران ىشكەن بالانىڭ قارنى توق. اۋىل ەتسىز وتىرا المايدى. ەت جەگەن, سورپا ىشكەن بالانىڭ دەنساۋلىعى دا مىقتى بولادى. ءوز باسىم اۋىلعا, اكە-شەشەمىزدىڭ جانىنا كوشىپ كەلگەنىمىزگە قۋانامىن, – دەيدى ايباردىڭ اناسى مەرۋەرت ايدىنقىزى.
ويدى وي قوزعايدى عوي. اۋىل مەن قالا بالاسىنىڭ اراسى الشاقتاپ بارا جاتقانعا ۇقسايدى كەيدە ماعان. تەزەك دەگەننەن شىعادى. قالانىڭ بالاسى تەزەك تەرمەك تۇگىلى, ونىڭ نە ەكەنىن بىلە مە ەكەن؟ قوراداعى ءتورت ت ۇلىكتىڭ ءتولىن ءتۇر-تۇسىنە قاراپ اجىراتا الاتىنى دا شامالى. قالا بالاسىن قور ساناپ وتىرعانىمىز جوق. بىراق 15-20 كگ تارتاتىن لاقتى 33 رەت كوتەرە الاتىنىنا ءسىزدىڭ دە, مەنىڭ دە كۇمانىم بار.
ايتپاقشى, قاينار – اباي وبلىسىنىڭ ابىرالى وڭىرىندەگى, قيانداعى اۋىل. سەمەي شارىنەن 250 شاقىرىم شالعايدا. الىستاعى اۋىلدىڭ ناۋرىز مەرەكەسى بيىل وزگەشە بولاتىنعا ۇقسايدى. ويتكەنى كىشكەنتاي بالالار لاق كوتەرۋدەن وتەتىن جارىستى اسىعا كۇتىپ ءجۇر.
اباي وبلىسى
