قورىتىندىعا سايكەس, وبلىستىق بيۋدجەتكە ميللياردتاعان تەڭگە قايتارىلىپ, مەملەكەتتىك ساتىپ الۋ راسىمدەرىن بۇزعان 140-تان استام لاۋازىمدى تۇلعا جاۋاپكەرشىلىككە تارتىلدى.
وبلىس اكىمدىگىنە قاراستى ىشكى مەملەكەتتىك اۋديت دەپارتامەنتىنىڭ باسشىسى مارات ەگەمبەرديەۆتىڭ ايتۋىنشا, وتكەن جىلى 119 اۋديتورلىق ءىس-شارا جۇرگىزىلسە, 111-دە جالپى سوماسى 38,8 ملرد تەڭگەنى قۇرايتىن زاڭ بۇزۋشىلىقتار انىقتالعان.
«مەملەكەتتىك ساتىپ الۋ راسىمدەرىن تەكسەرۋ كەزىندە 19,3 ملرد تەڭگەنىڭ بۇزۋشىلىقتارى انىقتالدى. قالپىنا كەلتىرۋگە جانە بيۋدجەتكە وتەۋگە جاتاتىن بۇزۋشىلىقتار سوماسىنىڭ 4 ميلليارد تەڭگەدەن استامى قالپىنا كەلتىرىلىپ, بيۋدجەتكە 3,1 ميلليارد تەڭگە وتەلدى. اۋديتورلىق ءىس-شارانىڭ قورىتىندىسى بويىنشا 106 لاۋازىمدى تۇلعا تارتىپتىك, 37-ءى اكىمشىلىك جاۋاپكەرشىلىككە تارتىلىپ, جالپى ايىپپۇل سوماسى 9,3 ملن تەڭگە نەمەسە 96,8% بيۋدجەتكە وتەلدى», دەدى مارات ەگەمبەرديەۆ وڭىرلىك كوممۋنيكاتسيالار قىزمەتىندە وتكەن بريفينگ بارىسىندا.
بايانداماشى قۇقىق قورعاۋ ورگاندارىنا 9 ماتەريال جىبەرىلگەنىن, ولار بويىنشا زاڭ بۇزۋشىلىق سوماسى 1 ميلليارد تەڭگەدەن استام سومانى قۇراعانىن, جىبەرىلگەن ءتورت ماتەريال بويىنشا قىلمىستىق ءىس قوزعالعانىن اتاپ ءوتتى.
سونىمەن قاتار جامبىل وبلىسى بويىنشا ىشكى مەملەكەتتىك اۋديت دەپارتامەنتى سىبايلاس جەمقورلىققا جول بەرمەۋ, ۋاقتىلى جولىن كەسۋ جانە زاڭ بۇزۋشىلىقتاردىڭ الدىن الۋ, سونداي-اق مەملەكەتتىك اۋديت وبەكتىسىنە مەملەكەتتىك ساتىپ الۋدى ءوز بەتىنشە جويۋعا قۇقىق بەرۋ ماقساتىندا مەملەكەتتىك ساتىپ الۋلارعا كامەرالدىق باقىلاۋ جۇرگىزەتىنىن اتاپ ءوتتى.
