وڭتۇستىك كورەيا پرەزيدەنتىنىڭ ساپارى بارىسىندا بىرقاتار مەموراندۋمعا قول قويىلدى

استانا. 19 ماۋسىم. وڭتۇستىك كورەيا باسشىسىنىڭ مەملەكەتىمىزگە ساپارى شەڭبەرىندە ەكى ەل ۇكىمەتتەرى اراسىندا بىرنەشە ماڭىزدى قۇجاتتارعا قول قويىلدى. بۇل تۋرالى «قازاقپارات» حابارلادى. ناقتىلاي ايتقاندا,  «بالقاش جەس» اكتسيونەرلىك قوعامى باسقارماسىنىڭ توراعاسى سۋك ۆون كيم مەن KEGOC اكتسيونەرلىك قوعامىنىڭ باسقارما توراعاسى باقىتجان قاجيەۆ جاڭادان ىسكە قوسىلاتىن ءوندىرۋشى قوندىرعىلاردىڭ ەلەكتر قۋاتىن ازىرلىكتە ۇستاپ تۇرۋعا قاتىستى كورسەتىلەتىن قىزمەتتى ساتىپ الۋعا ارنالعان ۇزاقمەرزىمدى شارتقا قول قويدى. بۇدان بولەك, ادىلەت مينيسترلىگى مەن كورەيا رەسپۋبليكاسى مەملەكەتتىك زاڭناما مينيسترلىگى اراسىندا,  سونداي-اق, ءبىلىم جانە عىلىم مينيسترلىگى مەن كورەيانىڭ عىلىمي اقپاراتتىق-كومۋنيكاتسيالىق تەحنولوگيالار جانە عىلىمي-تەحنيكالىق قىزمەت سالاسىنداعى ءوزارا تۇسىنىستىك تۋرالى مەموراندۋمدارعا قول قويىلدى. سونىمەن قاتار, قورشاعان ورتا جانە سۋ رەسۋرستارى مينيسترلىگى مەن كورەيانىڭ ورمان شارۋاشىلىعى قىزمەتى اراسىندا ءوزارا ىنتىماقتاستىققا نەگىزدەلگەن مەموراندۋم بەكىتىلدى. جولدىباي بازار. دەرەككوز: «قازاقپارات». فوتو: mgorod.kz.