استانا. 19 ماۋسىم. بۇگىن ءتۇن ورتاسى اۋا ۆ توبىنداعى يسپانيا جانە چيلي قۇرامالارى اراسىنداعى ويىن وينالىپ ءبىتتى. ماتچ 2:0 ەسەبىمەن چيليلىكتەردىڭ پايداسىنا شەشىلدى. بۇل تۋرالى egeven.kz حابارلادى.
يسپانيا – چيلي 0:2 (0:2).
18 ماۋسىم. ريو-دە-جانەيرو. «ماراكانا» ستاديونى. 74 101 كورەرمەن. تورەشى – مارك گەيگەر (چيلي).
يسپانيا: يكەر كاسيلياس, سەسار اسپيليكۋەتا, سەرحيو راموس, حاۆي مارتينەس, حوردي البا, حابي الونسو (كوكە, 46), سەرحيو بۋسكەتس, داۆيد سيلۆا, اندرەس ينەستا, پەدرو (سانتي كاسورلا, 76), ديەگو كوستا (فەرناندو توررەس, 64).
چيلي: كلاۋديو براۆو, ماۋريسيو يسلا, گونسالو حارا, گاري مەدەل, ەۋحەنيو مەنا, چارلز ارانگيس (فەليپە گۋتەررەس, 64), فرانسيسكو سيلۆا, ارتۋرو ۆيدال (كارلوس كارمونا, 88), مارسەلو دياس, ەدۋاردو ۆارگاس (حورحە ۆالديۆيا, 85), الەكسيس سانچەس.
گولدار: ەدۋاردو ۆارگاس (20), چارلز ارانگيس (43).
ەسكەرتۋلەر: حابي الونسو (41) – ارتۋرو ۆيدال (26), ەۋحەنيو مەنا (61).
وسى جەڭىلىسىمەن بىرگە, الەم چەمپيونى يسپانيا قۇراماسى ءوزىنىڭ وكىلەتتىگىن مەرزىمىنەن بۇرىن توقتاتتى. مۇنىمەن قوسا, ەۋروپانىڭ چەمپيونى دەگەن دە اتاعى بار كوماندا مۋنديالدى ابىرويسىز اياقتادى. ءبىرىنشى ويىنىندا گوللانديا فۋتبولشىلارىنان 1:5 ەسەبىمەن ويسىراي ۇتىلعان «قىزىل فۋريا» بۇل ويىندا سول جولى العان اۋىر سوققىدان ءالى ەسىن جيناي الماي جۇرگەن ادامنىڭ كەيپىن كورسەتتى. ول قۇددى ءبىر وسىنىڭ الدىنداعى ويىنعا بار كۇش-قۋاتىن سارقا جۇمساپ قويعانداي اسەر ەتتى. بۇعان قاراعاندا, چيليلىكتەر كەسكەكتى كۇرەسكە ءبىرشاما دايىن بولىپ شىقتى. ولار يسپانداردىڭ بۇرىنعىداي دوپتى ەركىن مەڭگەرۋلەرىنە جول بەرمەدى, بۇل ءۇشىن پرەسسينگتى قاتتى پايدالاندى, اۋماقتاردىڭ ءبارىن جاۋىپ تاستاپ, قارسىلاسىن ءوز مانەرىمەن ويناۋعا ءماجبۇر ەتتى. الاڭداعى وقيعانىڭ بۇلاي وربۋىنە يسپاننىڭ مىقتى دەگەن فۋتبولشىلارىنىڭ ءوزى كەدەرگى كەلتىرە المادى.
جالپى, چيلي قۇراماسىنىڭ ويىنشىلارى ەجەلدەن وزدەرى كەرەمەت ءبىر جارقىراپ كورىنبەگەندەرىمەن, قايسىبىر قارسىلاسىنا باتىل تويتارىس بەرۋگە كەلگەندە العان بەتىنەن قايتپايتىن بولىپ كەلۋشى ەدى, بۇل جولى ولار سول قايسارلىقتارىن شىرقاۋ شىڭىنا جەتكىزدى. ءسويتىپ, ءبىرىنشى تايمنىڭ وزىندە كەزدەسۋدىڭ تاعدىرىن تولىق دەرلىك شەشىپ قويدى. بۇل كوماندا ءبىرىنشى ويىندا اۆستراليا قۇراماسىن دا ەمىن-ەركىن ۇتىپ شىققان. سوندىقتان وسى ماتچتىڭ الدىندا جەڭىستىڭ ءچيليدى كەلەسى كەزەڭگە وتكىزىپ, يسپانيانى مەرزىمىنەن بۇرىن جارىس جولىنان شىعارىپ تاستايتىنى انىق بەلگىلى بولدى.
ايتا كەتۋىمىز كەرەك, بۇل قارسىلاستاردىڭ بۇعان دەيىنگى كەزدەسۋلەرىندە چيلي كومانداسى بۇرىن ءبىر رەت جەڭىپ كورمەپتى. مۇنىڭ الدىنداعى, 2010 جىلعى الەم چەمپيوناتىندا يسپانيا 2:1 ەتىپ ۇتقان ەكەن. سودان كەيىن ولار ەكى رەت جولداستىق كەزدەسۋ وتكىزىپتى. ولاردىڭ بىرىندە يسپاندار تاعى دا ۇتسا (3:2), ەكىنشىسى تەڭ (2:2) ناتيجە اكەلىپتى.
مۋنديالداعى ءسوز ەتىلىپ وتىرعان ماتچتى چيليلىكتەر وتە بەلسەندى باستادى. الدىمەن ارتۋرو ۆيدال دوپ الىپ, ونى قارسى قاقپا جاقتاعى ەدۋاردو ۆارگاسقا جەتكىزدى. ال شابۋىلشىنىڭ سوققىسىنان كەيىن دوپ تورعا بارىپ توپ ەتۋدىڭ ءسال عانا الدىندا قالدى. وسىدان كەيىن بەرىلگەن بۇرىشتامادان تاستالعان دوپتى گونسالو حارا قاقپاعا باعىتتاۋعا ۇمتىلدى. بىراق سوققىسى ءدال بولمادى. مۇنىڭ سوڭىن الا يسپاندار قارسىلاستارىنىڭ ەكپىندەرىن باسىپ, ويىن تىزگىنىن قايتارىپ الۋعا تالاسىپ باقتى. سول ماقساتتا بىرەر رەت العا شاپقىلادى. الايدا, كلاۋديو براۆو قورعاعان قاقپا ماڭىنا جاقىنداپ بارا المادى. بۇل تۇستا ولار تىم جايباراقات قيمىلدادى, ويىندارىندا ويلىلىق پەن تاپقىرلىق جەتىسپەدى. شيرەك ساعاتتىڭ شاماسىندا الەم چەمپيوندارى قاقپاعا جاقىن تۇستان ايىپ دوبىن ۇرۋ مۇمكىندىگىن الدى. سول كەزدەگى حابي الونسونىڭ سوققىسىن چيليلىكتەر تەز قايتاردى. ەۋروپالىقتار بۇدان كەيىن قاۋىرت جورىققا ۇقسايتىن شاپقىن ۇيىمداستىردى. سونىڭ الەتىندە ديەگو كوستا وڭ قاناتتان قۇيعىتتى. بىراق ونىڭ كولبەۋلەتە جىبەرگەن دوبىنا ارىپتەستەرىنەن ەشكىم يە بولا المادى. يسپاندار شابۋىلدى تاعى جالعاستىرماق بولعاندا, وفسايدقا ءتۇسىپ قالدى.
وسىدان كەيىن چەمپيونداردىڭ ءپاتى قايتىپ قالعانداي بولدى. مۇنىمەن دە تىنباي, ولار وڭدى-سولدى قاتەلىكتەر جىبەرە باستادى. سولاردىڭ بىرىندە يسپاندار الاڭنىڭ ورتاسىندا كۇتپەگەن جەردەن دوپتان ايرىلدى. ونى ىلە قاشقان چيلي فۋتبولشىلارى ءبىر-بىرىنە تەز قاقپاقىلداپ جەتكىزە وتىرىپ, قارسى ايىپ الاڭىنان ءبىر-اق شىقتى. كومبيناتسيانى باستاعان ۆيدال ەدى, جالعاستىرعان چارلز ارانگيس پەن ۆارگاس بولدى. بۇلاردىڭ سوڭعىسى ارىپتەسى بەرگەن دوپتى قاقپاشى يكەر كاسيلياستىڭ جانىنان قاقپاعا تاستاي سالدى – 1:0! ال تايمنىڭ سوڭىندا الونسو ءوز ايىپ الاڭى ماڭىندا ءتارتىپ بۇزدى. وعان بەلگىلەنگەن ايىپ دوبىن الەكسيس سانچەس «قابىرعالىقتان» اسىرا ۇردى. تۋرالاي بارعان دوپتى كاسيلياس كەرى قايتارىپ ۇلگەردى. بىراق دوپ ارانگيستىڭ اياعىنا بارىپ تۇرا قالدى. جاعدايدى تەز پايىمداعان چارلز سوسىن كىدىرمەستەن قاقپاعا قاراي قايتادان باعىتتادى. گول! وسىمەن ەسەپ 2:0-گە جەتتى. ءسويتىپ, 20 جانە 43-مينۋتتاردا گول جىبەرىپ العان يسپانيا قۇراماسى شەشۋى قيىن جۇمباقتىڭ قويناۋىنا قويدى دا كەتتى. ولار بۇل ءتۇيىندى ەكىنشى تايمدا دا تارقاتا المادى. چەمپيوننىڭ وكىلەتتىلىكتەن ايىرىلۋ وقيعاسى وسىلاي ورنەكتەلدى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.
