ورال اقشولاق ۇلى اقشولاقوۆ 1936 جىلى 16 ماۋسىمدا گۋرەۆ قالاسىندا ەلدەگى العاشقى مۇناي قۇبىرى قۇرىلىسشىسىنىڭ وتباسىندا دۇنيەگە كەلدى. زامانىنا ساي وقىپ-جەتىلىپ, بار عۇمىرىن جەر قويناۋىن زەرتتەۋگە ارنادى.
ورال اقشولاق ۇلى 170-تەن استام عىلىمي ماقالا جاريالادى. ول اسا ماڭىزدى – «قازاقستان رەسپۋبليكاسىنىڭ كومىرسۋتەك الەۋەتىنىڭ عىلىمي نەگىزدەمەسى» اتتى زەرتتەۋ ەڭبەگى ءۇشىن 2015 جىلى وزگە اۆتورلارمەن بىرگە مەملەكەتتىك سىيلىققا يە بولدى. اتالعان ىرگەلى ەڭبەكتىڭ ارقاسىندا ەلىمىزدەگى كومىرسۋتەك قورى 2012 جىلعى دەرەكتەرمەن سالىستىرعاندا ءۇش ەسە ءوستى.
سونىمەن قاتار ورال اقشولاق ۇلى ءىرى مۇناي كومپانيالارىمەن بىرلەسىپ, سالاداعى باستى باعدار بولعان قازاقستاندا 2040 جىلعا دەيىن مۇناي ءوندىرۋدىڭ تولىق بولجامىن جاسادى. عالىم جەر قويناۋىن پايدالانۋ سالاسىنداعى كوپتەگەن زاڭدى ازىرلەۋگە دە ەلەۋلى ۇلەس قوستى.
بۇگىندە ەلىمىزدىڭ تۇكپىر-تۇكپىرىندە ورال اقشولاقوۆتىڭ ءىزىن جالعاۋشى شاكىرتتەرى, مۇنايشى-گەولوگ ماماندار تابىستى ەڭبەك ەتىپ ءجۇر. ول ۇستاز رەتىندە شاكىرتتەرىنىڭ كاسىبي تۇرعىدا عانا ەمەس, جەكە تۇلعا رەتىندە قالىپتاسۋىنا دا سەپتەستى.
ورال اقشولاق ۇلىنىڭ ۇزاق ءارى جەمىستى ەڭبەك جولىندا بىرگە قىزمەت ەتكەن ارىپتەستەرى ونى ەڭبەكقور, اشىق مىنەزدى, اقجارقىن, ءوز ەلىنىڭ ناعىز پاتريوتى دەپ سيپاتتايدى. مۇناي-گاز سالاسىنىڭ ماقتانىشى بولعان عالىم, گەولوگ, قايراتكەر تۇلعا, مايتالمان ماماننىڭ ەڭبەك جولى – دارا دا داڭقتى جول.
«قازمۇنايگاز» ۇك اق ۇجىمى ەلىمىزدىڭ مۇناي-گاز سالاسىنىڭ ارداقتى ارداگەرى ورال اقشولاق ۇلىنىڭ ومىردەن وتۋىنە بايلانىستى ونىڭ وتباسى مەن جاقىندارىنىڭ قايعىلارىنا ورتاقتاسىپ كوڭىل ايتادى. مارقۇمنىڭ جانى ءجانناتتا بولىپ, نۇرى پەيىشتە شالقىسىن.
«قازمۇنايگاز» ۇك اق ۇجىمى
