ىزدەۋ-قۇتقارۋ جۇمىستارى جۇرگىزىلە باستاعان كۇننەن باستاپ قازاقستان تجم قۇتقارۋشىلارى 7 ادامدى قۇتقارىپ, مەديتسينا قىزمەتكەرلەرىنە تاپسىردى. قايتىس بولعان 67 ادامنىڭ, ونىڭ ىشىندە 6 بالانىڭ دەنەسى ءۇيىندى استىنان شىعارىلدى.
قازىر قازاقستان تجم قۇتقارۋشىلارى ىزدەۋ-قۇتقارۋ جۇمىستارىن جالعاستىرىپ جاتىر.
گازيانتەپ قالاسى ءبىرىنشى ەشەلونمەن بارعان قۇتقارۋشىلار تاۋلىك بويى ەكى اۋىسىمدا ءۇش ۋچاسكەدە جۇمىس ىستەپ ءجۇر.
قۇتقارۋشىلاردىڭ ءبىرىنشى توبى توعىز قاباتتى عيماراتتا جۇمىس ىستەپ جاتىر. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جالعاسادى. بۇل جەردە ۇيىندىلەردىڭ استىنان 4 ادام قۇتقارىلدى, 14 قازا تاپقان ادامنىڭ دەنەسى شىعارىلدى.
قۇتقارۋشىلاردىڭ ەكىنشى توبى التى قاباتتى عيماراتتا جۇمىس جۇرگىزۋدە. وبەكت تولىعىمەن دەمونتاجدالدى. ينجەنەرلىك تەحنيكانى, اۆاريالىق-قۇتقارۋ جابدىقتارىن, قاراپايىم اسپاپتاردى قولدانا وتىرىپ, 10 000-نان استام تەكشە مەتر ءۇيىندى اراسى اشىلدى. دەمونتاجداۋعا جۇمىلدىرىلعان بولىمشە جۇمىس جۇرگىزىلىپ جاتقان 1 جانە 3 ۋچاسكەلەرگە ءبولىندى. قايتىس بولعان 19 ادامنىڭ دەنەسى شىعارىلدى.
ءۇشىنشى توپ تا التى قاباتتى عيماراتتا جۇمىس ىستەپ جاتىر. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جۇرگىزىلۋدە, قايتىس بولعان 22 ادامنىڭ دەنەسى شىعارىلدى.
قازاقستان تجم ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزۋدە. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ, ۇيىندىلەر استىندا زارداپ شەككەندەرمەن اۋديو بايلانىس ورناتۋ, قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ, جەدەل جانە ساۋاتتى ءىس - قيمىلدىڭ, سونداي-اق زارداپ شەككەندەردى بلوكتان شىعارۋ بويىنشا ۋاقىتىلى قابىلدانعان شارالاردىڭ ناتيجەسىندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديتسينالىق كومەك الدى. قايتىس بولعان 8 ادامنىڭ دەنەسى شىعارىلدى. زارداپ شەككەن ادامداردى ىزدەۋگە تەحنيكالىق قۇرالدار, ۇيىندىلەردى بولشەكتەۋگە ينجەنەرلىك تەحنيكا پايدالانىلىپ جاتىر. ۇيىندىلەردىڭ اراسىنان ادامداردى ىزدەۋ جۇمىستارى ءالى دە جالعاسادى.
